(ម៉ានីល)៖ ប្រធានាធិបតីហ្វីលីពីន លោក Ferdinand Marcos Jr បាននិយាយថាប្រទេសរបស់លោក គួរតែត្រៀមខ្លួនសម្រាប់គ្រប់កាលៈទេសៈទាំងអស់ ពីព្រោះ ការគំរាមកំហែងពីខាងក្រៅកាន់តែលេចចេញជារូបរាងឡើង ដោយសារភាពតានតឹងក្នុងតំបន់ឥណ្ឌូប៉ាស៉ីហ្វិក។ នេះបើយោងតាមការចេញផ្សាយដោយទីភ្នាក់ងារ សារព័ត៌មាន Reuters នៅថ្ងៃអង្គារ ទី១១ ខែមិថុនា ឆ្នាំ២០២៤។
ក្នុងសុន្ទរកថាទៅកាន់កងទ័ព នៅឯជំរំយោធាក្នុងខេត្ត Isabela ភាគខាងជើងតំបន់ដែលនៅទល់មុខនឹងកោះតៃវ៉ាន់ កាលពីថ្ងៃចន្ទសប្តាហ៍នេះ លោក Marcos និយាយថា ទីតាំងដែលហ្វីលីពីននៅកៀកនឹងតៃវ៉ាន់ ធ្វើឲ្យវាស្ថិតក្នុងតំបន់ដែលចិនចាប់អារម្មណ៍។ លោក Marcos គូសបញ្ជាក់យ៉ាងដូច្នេះថា «ការគំរាមកំហែងពី ខាងក្រៅលេចឡើងកាន់តែច្បាស់ ហើយក្លាយជារឿងដ៏គួរឱ្យបារម្ភ ហេតុនេះទើបយើងត្រូវតែត្រៀមខ្លួន»។
តាមលោក Marcos ហ្វីលីពីន មិនបានព្យាយាមគូរខ្សែបន្ទាត់នៃដែនដីអធិបតេយ្យឡើងវិញ រួមទាំងតំបន់សេដ្ឋកិច្ចផ្តាច់មុខរបស់ខ្លួនឡើយ ប៉ុន្តែប្តេជ្ញាការពារខ្លួន ខណៈដែលកំពុងចូលរួមក្នុងកិច្ចខិតខំប្រឹងប្រែងផ្នែកការទូត។ ស្ថានទូតចិនប្រចាំទីក្រុងម៉ានីល នៅមិនទាន់ឆ្លើយតបចំពោះសំណើរសុំការអត្ថាធិប្បាយនោះទេ។
គួរបញ្ជាក់ថា ជាយូរមកហើយ ហ្វីលីពីន និងចិនមានវិវាទនឹងគ្នាជុំវិញបញ្ហាទឹកដីនៅតំបន់សមុទ្រចិនខាងត្បូង ដែលជាច្រកផ្លូវទឹកដ៏សំខាន់មួយ សម្រាប់ពាណិជ្ជកម្មនាវា ឆ្លងកាត់គិតជាទំហំទឹកប្រាក់ ៣ទ្រីលានដុល្លារ ក្នុងមួយឆ្នាំៗ៕
