(កំពត-កែប)៖ លោក សយ ស៊ីណុល ប្រធានមន្ទីរទេសចរណ៍ខេត្តកំពត បានឱ្យដឹងថា ខេត្តកំពត រយៈពេល ៤ថ្ងៃ នៃពិធីបុណ្យចូលឆ្នាំថ្មីប្រពៃណីជាតិខ្មែរ គឺចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ ខេត្តកំពត និងខេត្តកែប ទទួលបានភ្ញៀវទេសចរជាតិ និងអន្តរជាតិ ប្រមាណជាង ១,៣៩៩,៨៩៧នាក់។ ក្នុងនោះភ្ញៀវទេសចរណ៍ជាតិ ចំនួន ១,៣៩៦,៧៧៥ នាក់និងភ្ញៀវទេសចរអន្តរជាតិ ចំនួន ៣,១២២នាក់។
បើតាមការកត់សម្គាល់ឃើញថា ភ្ញៀវទេសចរភាគច្រើនទៅលេងកម្សាន្តនៅររមណីយដ្ឋានតំបន់ភូមិកំពត, រមណីយដ្ឋានតតំបន់ដូងទេ ឧទ្យានជាតិព្រះមុនីវង្សបូកគោ, តំបន់កោះស្មៅ, រមណីយដ្ឋានតំបន់ទឹកឈូ និងតំបន់ររមណីយដ្ឋានជាច្រើនផ្សេងទៀនៃខេត្តកំពត។
តាមលោក សយ ស៊ីណុល ពាក់ព័ន្ធសេវាកម្មស្នាក់នៅ រយៈពេល៤ថ្ងៃនេះ ភ្ញៀវបានកក់ និងស្នាក់នៅតាមបណ្ដាសណ្ឋាគារផ្ទះសំណាក់ និងស្នាក់នៅតាមរមណីយដ្ឋាន ស្ទើរតែពេញ ១០០%។ ដោយឡែកសេវាកម្មហូបចុក គឺមានកន្លែងជាច្រើន ដែលផ្តល់ភាពងាយស្រួល សម្រាប់ឱ្យភ្ញៀវរកទទួលទានបាន។ ចំពោះសភាពការណ៍ទូទៅ នៅតាមរមណីយដ្ឋាន និងកន្លែងទេសចរណ៍កម្សាន្តផ្សេងៗ គ្មានអ្វីប្លែកគួរឱ្យកត់សម្គាល់នោះទេ គឺធានាបានសុខសុវត្ថិភាព សណ្ដាប់សាធារណៈ ជូនប្រជាពលរដ្ឋ ក៏ដូចជាភ្ញៀវជាតិ-អន្តរជាតិ បានយ៉ាងល្អប្រសើរ។
ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ រយៈពេល ៤ថ្ងៃ កងកម្លាំងប្រដាប់អាវុធទាំងបីប្រភេទជាង ១,០០០នាក់ ដាក់ពង្រាយតាមគោលដៅ ដើម្បីរក្សាការពារសន្តិសុខ សណ្ដាប់ធ្នាប់សាធារណៈ ជូនដល់ភ្ញៀវទេសចរណ៍គ្រប់រូបភាព សំដៅធ្វើឱ្យពិធីនៃបុណ្យចូលឆ្នាំថ្មីប្រពៃណីជាតិខ្មែរ រយៈពេល ៤ថ្ងៃ គិតចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤នេះ ចូលរួមកំសាន្តលេងកាន់តែអធិកអធម្ម និងមានភាពល្បីល្បាញ សម្រាប់មោទនភាពនៃខេត្តកំពតមួយនេះផងដែរ។
ចំពោះខេត្តកែប រយៈពេល ៤ថ្ងៃនៃពិធីបុណ្យចូលឆ្នាំថ្មីប្រពៃណីជាតិខ្មែរ ដោយគិតចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៤ គឺខេត្តកែប ទទួលបានភ្ញៀវទេសចរ សរុបចំនួន ១៥៩,៧៨៨នាក់ បេីប្រៀបធៀបទៅនឹងឆ្នាំ២០២៣ ភ្ញៀវទេសចរសរុបចំនួន ១៤៩,៤០៦នាក់ កេីនឡេីង៦.៩៤% ក្នុងនោះភ្ញៀវជាតិចំនួន ១៥៨,៨៩៦នាក់ បេីធៀបនឹងឆ្នាំ២០២៣ មានចំនួន ១៤៨,៧៤៤នាក់ កេីនឡេីង ៦.៨២% ភ្ញៀវទេសចរបរទេសចំនួន ៨៩២នាក់ ធៀបនឹងឆ្នាំ២០២៣ មានចំនួន ៦៦២នាក់ កេីនឡេីង ៣៤.៧៤%។ នេះបើយោងតាមរបាយការណ៍ របស់លោក សោម ចិន្តា ប្រធានមន្ទីរទេសចរណ៍ខេត្តកែប។
ចំពោះសភាពការទូទៅក្នុងខេត្តកែប រយៈពេល៤ថ្ងៃ បានប្រព្រឹត្តទៅដោយរលូនពុំមានបាតពាក្យអ្វីគួរឱ្យកត់សម្គាល់ឡើយ៕
