រុស្ស៉ីប្រើយន្តហោះដ្រូន៣៥គ្រឿង ក្នុងការវាយប្រហារថ្មីទៀត លើតំបន់ផ្សេងៗរបស់អ៊ុយក្រែន រួមទាំងរដ្ឋធានីកៀវ

(មូស្គូ)៖  តាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី២១ ខែធ្នូ ឆ្នាំ២០២៣ បញ្ជាក់ថា អ៊ុយក្រែនបានឱ្យដឹងថា កាលពីចន្លោះវេលាយប់ថ្ងៃពុធ-ព្រហស្បតិ៍នេះ ប្រព័ន្ធការពារដែនអាកាសនៅរដ្ឋធានីកៀវ ព្រមទាំងនៅតាម​តំបន់ផ្សេងទៀតពាសពេញប្រទេស បានបាញ់ទម្លាក់យន្តហោះដ្រូនចំនួនរាប់សិបគ្រឿង ដែលកងកម្លាំងរុស្ស៉ីបានបញ្ជូនមក ក្នុងការវាយ ប្រហារថ្មីមួយទៀត។

កងទ័ពអាកាសអ៊ុយក្រែន បានប្រកាសលើប្រព័ន្ធ Telegram ថា កងកម្លាំងរុស្ស៉ីបានធ្វើសកម្មភាព វាយប្រហារ ដោយប្រើយន្តហោះដ្រូន Shahed ផលិតដោយអ៉ីរ៉ង់ ចេញពីទិសដៅចំនួន៣ផ្សេងគ្នា រួមមានក្រុង Chauda នៅឧបទ្វីបគ្រីមៀ ព្រមទាំងក្រុង Primorsko-Akhtarsk, និងក្រុង Kursk នៅប្រទេសរុស្ស៉ី។ បើតាមការអះអាង របស់ទីក្រុងកៀវ កងកម្លាំងរបស់ខ្លួនបាញ់ស្កាត់បានដ្រូន៣៤ គ្រឿង ក្នុងចំណោមយន្តហោះដ្រូនទាំង៣៥គ្រឿង ហើយភ្លាមៗពុំទាន់មានសេចក្តីរាយការណ៍ អំពីមនុស្សរងគ្រោះថ្នាក់ស្លាប់ ឬរបួសនៅឡើយទេ។

គួរបញ្ជាក់ថា រុស្ស៉ីបានបញ្ជូនយន្តហោះដ្រូនខាងលើក្នុងលក្ខណៈជាជុំៗ ដើម្បីប៉ុនប៉ងវាយប្រហារ លើអ៊ុយក្រែន ចាប់ពីវេលាម៉ោងប្រមាណខ្ទង់៨យប់ថ្ងៃពុធ ដល់ម៉ោង៣៖៣០នាទីយប់រំលងអធ្រាត្រ ឈានចូលថ្ងៃព្រហស្បតិ៍។ តំបន់អ៊ុយក្រែនសរុប១២កន្លែង រួមមានទាំងភាគកណ្តាល ភាគអាគ្នេយ៍ និងភាគខាងជើង គឺត្រូវបានកំណត់គោលដៅវាយប្រហារ។ ស្របពេលដែលរដូវរងាកំពុងចូលមកដល់ ទីក្រុងមូស្គូបានបង្កើនការវាយប្រហាររបស់ខ្លួន ប្រឆាំង មកលើអ៊ុយក្រែនអំលុងពេលយប់ ខណៈទីក្រុងកៀវបានស្នើឱ្យសម្ព័ន្ធមិត្ត ឱ្យជួយផ្តល់​ប្រព័ន្ធការពារ ដែនអាកាសបន្ថែម៕