(ប៉ាឡេស្ទីន)៖ យោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៥ ខែតុលា ឆ្នាំ២០២៣ គឺ កងកម្លាំងអ៊ីស្រាអែលបានសម្លាប់ជនសកម្មប្រយុទ្ធប៉ាឡេស្ទីនពីរនាក់ ក្នុងអំឡុង ពេលការប៉ះទង្គិចគ្នានៅតំបន់ West Bank ដែលកាន់កាប់នៅថ្ងៃព្រហស្បតិ៍នេះ ក្នុងអំឡុងពេល នោះទាហានអ៊ីស្រាអែល ០៥នាក់ក៏បានរងរបួសផងដែរ នេះបើយោងតាមប្រភពពីភាគីទាំងពីរ។
យោធាអ៊ីស្រាអែលបាននិយាយថា ជនជាតិប៉ាឡេស្ទីនពីរនាក់បានជិះក្នុងយានជំនិះមួយ នៅពេល ដែលពួកគេបានបាញ់ទៅលើរថយន្តអ៊ីស្រាអែល នៅជិតទីក្រុង Tulkarm ។ ក្រោយការដេញតាម ទាហានបានបាញ់ជនប៉ាឡេស្ទីនទាំងពីរនាក់ ក្នុងការវាយប្រហារដោយកាំភ្លើង ហើយបានរកឃើញកាំភ្លើងខ្លីមួយដើមពីរថយន្តរបស់ពួកគេ។
យោធាអ៊ីស្រាអែលក៏បានបញ្ជាក់បន្ថែមទៀតថា សមាជិករបស់ខ្លួនប្រាំនាក់ក៏បានរងរបួសក្នុង ហេតុការណ៍ខាងលើនេះផងដែរ។ ចលនាអ៊ីស្លាមប្រដាប់អាវុធ ហាម៉ាស បានប្រកាសថា ជនជាតិ ប៉ាឡេស្ទីនដែលស្លាប់ពីរនាក់ខាងលើ ដែលមានអាយុ ២៣ និង ២៧ឆ្នាំ គឺជាសមាជិករបស់ខ្លួន៕
