(កំពង់ស្ពឺ)៖ កងទ័ពកម្ពុជា រួមជាមួយសិក្ខាកាមកងទ័ពមកពីប្រទេសចំនួន១៣ ក្នុងទ្វីបចំនួន៤ បានបិទលំហាត់ហ្វឹកហ្វឺនពហុជាតិ សកម្មភាពមីនមនុស្សធម៌ ក្នុងក្របខណ្ឌក្រុមជំនាញការរដ្ឋ មន្រ្តីការពារជាតិអាស៊ាន-បូក (ADMM-Plus EWG On HMA) ក្រោមប្រធានបទ «មាតុភូមិដ៏បវរ ឆ្នាំ២០២៣»។
ពិធីបិទលំហាត់ហ្វឹកហ្វឺននេះបានធ្វើឡើងនៅព្រឹកថ្ងៃទី២២ ខែកញ្ញា ឆ្នាំ២០២៣នេះ ក្រោមវត្តមាន នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ, ឧត្តមសេនីយ៍ទោ CHEN Liang មេបញ្ជាការរង កងទ័ពជើងគោក យោធភូមិភាគខាងត្បូង នៃកងទ័ពរំដោះប្រជា ជនចិន ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំក្រសួងការពារ អគ្គបញ្ជាការ ព្រម អនុព័ន្ធយោធាប្រទេសជាមិត្តជាច្រើនរូបទៀតផងដែរ។
ពិធីបើកលំហាត់ហ្វឹកហ្វឺននេះបានធ្វើឡើងកាលពីថ្ងៃទី១៣ ខែកញ្ញា ឆ្នាំ២០២៣ ក្រោមអធិបតីភាព នាយឧត្តមសេនីយ៍ សែម សុវណ្ណនី អនុ ប្រធានទី១ នៃគណៈកម្មាធិការជាតិ និងជាអគ្គនាយកមជ្ឈ មណ្ឌលជាតិរក្សាសន្តិភាព។ វគ្គហ្វឹកហ្វឺននេះបានធ្វើឡើងនៅសាលាហ្វឹកហ្វឺនកងកម្លាំងរក្សាសន្តិភាពពហុសាសន៍ ខេត្តកំពង់ស្ពឺ។
សូមគូសបញ្ជាក់ថា កម្ពុជា-ចិន បានក្លាយជាសហប្រធាននៃក្រុមជំនាញការរដ្ឋមន្រ្តីការពារជាតិ អាស៊ាន-បូក (ADMM-Plus EWG On HMA) ស្តីពីការសកម្មភាពមីនមនុស្សធម៌ ក្នុងអាណត្តិ “២០២១-២០២៣” ជាលើកដំបូង។ លំហាត់នេះ កងទ័ពមកពីប្រទេសសមាជិកអាស៊ាន និង ប្រទេសដៃគូ ចំនួន១៤ មកពីទ្វីបទាំង៤ «អាស៊ី អ៊ឺរ៉ុប អាមេរិក អូសេអានី»។
ក្នុងនោះមានប្រទេសអូស្ត្រាលី ប្រ៊ុយណេដារូសាឡឹម ព្រះរាជាណាចក្រកម្ពុជា សាធារណរដ្ឋ ប្រជា មានិតចិន សាធារណរដ្ឋឥណ្ឌា សាធារណរដ្ឋ ឥណ្ឌូនេស៊ី ប្រទេសជប៉ុន សាធារណរដ្ឋកូរ៉េ សាធា រណរដ្ឋ ប្រជាធិបតេយ្យប្រជាមានិតឡាវ សាធារណរដ្ឋហ្វីលីពីន សហព័ន្ធរុស្សី សាធារណរដ្ឋសិង្ហបុរី សហរដ្ឋអាមេរិក និងសាធារណរដ្ឋសង្គមនិយម វៀតណាម ចូលរួមសរុបចំនួនប្រមាណជាង ៥០០នាក់។
លំហាត់ហ្វឹកហ្វឺនពហុជាតិសកម្មភាពមីនមនុស្សធម៌ ក្រោមប្រធានបទ «មាតុភូមិដ៏បវរឆ្នាំ២០២៣» ដែលធ្វើឡើងរយៈពេល១០ថ្ងៃនេះ ត្រូវបានឈានដល់ការបិទបញ្ចប់ដោយរលូនជាស្ថាពរនិងប្រកប ដោយផ្លែផ្កា។ លំហាត់ហ្វឹកហ្វឺននេះបានឆ្លុះបញ្ចាំងពីកិច្ចខិតខំប្រឹងប្រែងរួមគ្នារវាងអាស៊ាន និង ប្រទេសដៃគូសំដៅដោះស្រាយនូវរាល់បញ្ហាមីន កាកសំណល់សង្គ្រាម និងបច្ច័យអវិជ្ជមាននានា ដើម្បីផ្តល់សុវត្ថិភាព សុខុមាលភាព និងចូលរួមអភិវឌ្ឍ សង្គម-សេដ្ឋកិច្ច ដោយយក «ប្រជាជនជាស្នូល»។
គួរកត់សម្គាល់ថា យោធាចារ្យ សិក្ខាកាមពហុជាតិទាំងអស់ បានហ្វឹកហ្វឺនរួមគ្នាប្រកបដោយមិត្តភាព សាមគ្គីភាព និងភាតរភាព ព្រមទាំងបានផ្លាស់ប្តូរ និងចែករំលែកបទពិសោធន៍ បច្ចេកវិទ្យា ឧត្តមា នុវត្តន៍ និងរិះរកវិធីសាស្ត្រថ្មីៗដើម្បីពង្រឹងសមត្ថភាពកងទ័ព និងវិសាលភាពក្នុងប្រតិបត្តិការដោះមីន មនុស្សធម៌តាមរយៈបច្ចេកវិទ្យាទំនើបថ្មីៗដូចជាដ្រូនប្រព័ន្ធ ឡាស៊ែ រ៉ូបូត ក្នុងសកម្មភាពមីន។
សូមជម្រាបជូន សមាជិកប្រទេសអាស៊ានភាគច្រើនដូចជា៖ កម្ពុជា ឡាវ មីយ៉ាន់ម៉ា ហ្វីលីពីន ថៃ និងវៀតណាម បាននឹងកំពុងទទួលផលវិបាកដែលបន្តជះឥទ្ធិពលអវិជ្ជមានដល់សន្តិសុខ សុខុមាល ភាពមនុស្ស សេដ្ឋកិច្ច និងការអភិវឌ្ឍដោយសារគ្រាប់យុទ្ធភណ្ឌមិនទាន់ផ្ទុះគ្រាប់មីន និងអាវុធជាតិ ផ្ទុះផ្សេងៗ។
ដូចនេះ យន្តការដឹកនាំដោយអាស៊ានបូកមានការយល់ដឹងច្បាស់លាស់អំពីបញ្ហានេះ រដ្ឋមន្ត្រីការពារ ជាតិអាស៊ានបូក បានអនុម័តក្រុមការងារជំនាញលំហាត់ហ្វឹកហ្វឺនជាក់ស្តែងមានគោលបំណងចំនួន៥ រួមមាន៖
ទី១៖ បង្កើនការយល់ដឹងអំពីការគំរាមកំហែងបញ្ហាប្រឈម និងទំនួលខុសត្រូវរបស់ប្រជាជាតិ នីមួយៗ និងសហគមន៍អន្តរជាតិ
ទី២៖ បង្កើនសមត្ថភាពរបស់ប្រទេសដែលរងផលប៉ះពាល់ក្នុងការដោះស្រាយជាមួយសំណល់សង្គ្រាម
ទី២៖ លើកទឹកចិត្តដល់រដ្ឋសមាជិកអាស៊ានបូក ប្រទេស និងសហគមន៍អន្តរជាតិ ខិតខំប្រឹងប្រែង រួមគ្នា ដើម្បីជួយប្រទេសរងគ្រោះ
ទី៤៖ អភិវឌ្ឍដំណោះស្រាយសហប្រតិបត្តិការ និងគំនិតផ្តួចផ្តើមដើម្បីដោះស្រាយប្រកបដោយ ប្រសិទ្ធភាពជាមួយវិនាសកម្មដោយសារមីន
និង៥៖ បង្កើតយន្តការសមស្របសម្រាប់កិច្ចសហប្រតិបត្តិការក្នុងចំណោមវិស័យការពារជាតិ កង កម្លាំងយោធានៃប្រទេស ADMM-Plus និងសម្រាប់ការសម្របសម្រួលយោធា និងក្រុមជនស៊ីវិល ក្នុងការយកឈ្នះលើផលវិបាកនៃសំណល់សង្គ្រាម ស្របតាមចក្ខុវិស័យរបស់រាជរដ្ឋាភិបាលកម្ពុជា តាមរយៈយុទ្ធនាការ «កម្ពុជា គ្មានមីនឆ្នាំ២០២៥» ព្រមទាំងគាំទ្រដល់គំនិតផ្តួចផ្តើមរបស់សម្តេច តេជោ ក្នុងការ «ផ្តល់ដីសុវត្ថិភាពបង្កើតស្នាម ញញឹម» ជូនប្រជាពលរដ្ឋកម្ពុជា៕
