(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងថា សម្តេចមិនជឿថា មាន ការឈ្លានពានវប្បធម៌ទេ តែអ្វីដែលសម្តេចបារម្ភ និងត្រូវប្រុងប្រយ័ត្ននោះ គឺការស្ម័គ្រចិត្តទទួល យកវប្បធម៌របស់ប្រជាពលរដ្ឋ ដែលនាំឱ្យបាត់បង់វប្បធម៌ជាតិ។
សម្តេចតេជោ ហ៊ុន សែន បានលើកករណីជាក់ស្តែងនៅពេលកម្ពុជា ស្ថិតក្រោមអាណានិគមបារាំង រយៈពេល៩០ឆ្នាំ បារាំងមិនអាចប្តូរឲ្យប្រជាជនខ្មែរ ទទួលយកវប្បធម៌បារាំងនោះទេ ទាំងភាសា អក្សរសាស្ត្រ កម្ពុជានៅតែរក្សាបានដដែល មិនមានការផ្លាស់ប្តូរនោះឡើយ។
ការលើកឡើងរបស់សម្តេចតេជោ យ៉ាងដូច្នេះធ្វើឡើងក្នុងឱកាសអញ្ជើញសម្ពោធទីតាំងថ្មី សាកល វិទ្យាល័យភូមិន្ទវិចិត្រសិល្បៈ និងចែកសញ្ញាបត្រដល់និស្សិត នៅព្រឹកថ្ងៃទី២៤ ខែឧសភា ឆ្នាំ ២០២៣នេះ។ សម្តេចតេជោ ហ៊ុន សែន បានថ្លែងយ៉ាងដូច្នេះថា «ខ្ញុំសុំស្នើឲ្យមានការប្រុងប្រយ័ត្ន ជាពិសេសបញ្ហាបដិមា រូបចម្លាក់ផ្សេងៗ បើសិនជាធ្វើមិនត្រូវទេ ថ្ងៃក្រោយមិនទៅជាអ្វី។ យើងទទួលមរកតពីមុនមក យើងស្គាល់ទម្រង់ ប៉ុន្តែឥឡូវនេះនាំគ្នាស្អីក៏ខ្មែរៗ ប៉ុន្តែវាមិនមែនជាទម្រង់ ខ្មែរ រួចហើយថ្ងៃក្រោយវាក្លាយទៅជាខ្មែរដែរ យើងថាខ្មែរចុះ ប៉ុន្តែប្រសិទ្ធនាមឲ្យច្បាស់ថាខ្មែរសម័យ ណា ព្រោះមានសម័យរបស់វា […] ត្រូវប្រយ័ត្នឲ្យមែនទែន ភាពក្លាយ។ ខ្ញុំអត់ជឿទេ ការឈ្លានពាន ខាងវប្បធម៌ ខ្ញុំនៅតែអះអាងថាខ្ញុំមិនជឿថាមានការឈ្លានពានវប្បធម៌ ព្រោះមិនអាចនឹងឈ្លានពាន កើតទេ តែអ្វីដែលភ័យខ្លាចបំផុត គឺការទទួលយកដោយការស្ម័គ្រចិត្ត នេះទើបជារឿងដែលត្រូវប្រុង ប្រយ័ត្ន»។
សម្តេចតេជោ ហ៊ុន សែន បានថ្លែងទៀតថា នយោបាយឈ្នះ-ឈ្នះ មិនត្រឹមបញ្ចប់សង្គ្រាម និងការ បង្រួបបង្រួមជាតិប៉ុណ្ណោះទេតែក៏បានជួយឱ្យរបាំសួយរក្សាវត្តមានបានមកដល់ពេលបច្ចុប្បន្នផងដែរ។ គ្រប់អ្វីៗទាំងអស់ គឺសុទ្ធតែស្ថិតនៅក្រោមសន្តិភាព សន្តិភាពមានសារៈសំខាន់ណាស់ មានសន្តិ ភាពហើយ ប្រឹងថែរក្សាទៅ កុំចាំបាច់បាត់សន្តិភាព ទើបនាំគ្នាសោកស្តាយ៕
