(អ៉ីស្លាម៉ាបាដ)៖ តុលាការជាន់ខ្ពស់នៃទីក្រុងអ៉ីស្លាម៉ាបាដ នៅថ្ងៃសុក្រនេះ បានបង្គាប់ឱ្យអតីតនាយករដ្ឋមន្រ្តីប៉ាគីស្ថាន លោក អ៉ីមរ៉ាន់ ខាន់ (Imran Khan) ត្រូវបានដោះលែងឱ្យនៅក្រៅឃុំសម្រាប់រយៈពេល២សប្តាហ៍ ក្រោយមានការចាប់ខ្លួនរូបលោកពាក់ព័ន្ធសំណុំរឿងពុករលួយ ដែលបានបង្កឱ្យផ្ទុះភាពវឹកវរយ៉ាងកក្រើក នៅក្នុងប្រទេសអាស៉ីខាងត្បូងមួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី១២ ខែឧសភា ឆ្នាំ២០២៣។
ការចាប់ខ្លួនលោក ខាន់ ដែលបានកើតឡើងកាលពីថ្ងៃអង្គារសប្តាហ៍នេះ ត្រូវបានតុលាការកំពូលប៉ាគីស្ថាន សម្រេចកាលពីថ្ងៃព្រហស្បតិ៍ថា ជាទង្វើមិនមានសុពលភាពនិងខុសច្បាប់។ នៅថ្ងៃសុក្រនេះ លោកអតីតនាយករដ្ឋមន្រ្តីប៉ាគីស្ថាន បានធ្វើដំណើរទៅបង្ហាញខ្លួននៅតុលាការ ក្នុងទីក្រុងអ៉ីស្លាម៉ាបាដ ក្រោមសន្តិសុខយ៉ាងតឹងរ៉ឹង ខណៈដែលក្រុមអ្នកគាំទ្ររបស់លោក បានប៉ះទង្គិចគ្នាជាមួយប៉ូលិសនៅតាមកន្លែងផ្សេងៗទៀត ក្នុងរដ្ឋធានីរបស់ប៉ាគីស្ថាន។ មេធាវីរបស់លោក បាននិយាយដូច្នេះថា «តុលាការបានអនុញ្ញាតឱ្យនៅក្រៅឃុំរយៈពេល២សប្តាហ៍»៕
