(ប៉េកាំង)៖ អ្នកនាំពាក្យក្រសួងការបរទេសចិនបាននិយាយនៅថ្ងៃសុក្រថា ប្រទេសចិនគឺជាជនរងគ្រោះនៃគោលនយោបាយបង្ខិតបង្ខំ និងសម្លុតគំរាមផ្នែកសេដ្ឋកិច្ចរបស់សហរដ្ឋអាមេរិក ដោយជំរុញឱ្យប្រទេស G7 បញ្ឈប់ការចូលរួមក្នុង «រង្វង់តូច» ផ្តាច់មុខ និងជៀសវាងពីការក្លាយជាអ្នកសមគំនិតចំពោះការបង្ខិតបង្ខំសេដ្ឋកិច្ច។នេះបើយោងតាមការចេញផ្សាយដោយ ទីភ្នាក់ងារសារព័ត៌មានស៊ីនហួរ នៅថ្ងសុក្រ ទី១២ ខែឧសភា ឆ្នាំ២០២៣។
អ្នកនាំពាក្យ លោក Wang Wenbin បានធ្វើការកត់សម្គាល់បែបនេះ នៅក្នុងសន្និសីទសារព័ត៌មានប្រចាំថ្ងៃ ដើម្បីឆ្លើយតបទៅនឹងរបាយការណ៍ប្រព័ន្ធផ្សព្វផ្សាយថ្មីៗនេះថា សមាជិក G7 នឹងប្រកាសការឆ្លើយតបរួមគ្នាចំពោះ «ការបង្ខិតបង្ខំផ្នែកសេដ្ឋកិច្ច» ដើម្បីបញ្ជូនសញ្ញាមួយទៅកាន់ប្រទេសចិន។
និយាយអំពីការបង្ខិតបង្ខំផ្នែកសេដ្ឋកិច្ចនេះ លោក Wang បាននិយាយថា ប្រទេសដំបូងគេដែលត្រូវថ្កោលទោសគឺប្រហែលជាសហរដ្ឋអាមេរិក។ លោកបាននិយាយថា សហរដ្ឋអាមេរិកបានពង្រីកម្តងហើយម្តងទៀតនូវគោលគំនិត នៃសន្តិសុខជាតិ ការរំលោភលើការគ្រប់គ្រងការនាំចេញ និងអនុវត្តការរើសអើង និងលម្អៀងប្រឆាំងនឹងក្រុមហ៊ុនបរទេស ដែលបំពានយ៉ាងធ្ងន់ធ្ងរលើគោលការណ៍សេដ្ឋកិច្ចទីផ្សារ និងការប្រកួតប្រជែងដោយយុត្តិធម៌។
ដោយលើកឡើងពីស្ថិតិពាក់ព័ន្ធលើការដាក់ទណ្ឌកម្មរបស់សហរដ្ឋអាមេរិកប្រឆាំងនឹងប្រទេសដទៃទៀត លោក Wang បានកត់សម្គាល់ថា គិតត្រឹមឆ្នាំសារពើពន្ធ ២០២១ ទណ្ឌកម្មច្រើនជាង ៩,៤០០លើក ដែលដាក់ដោយសហរដ្ឋអាមេរិកត្រូវបានអនុវត្ត។ លោកបានបន្ថែមថា សហរដ្ឋអាមេរិកបានដាក់ទណ្ឌកម្មសេដ្ឋកិច្ចជាឯកតោភាគីលើប្រទេសជិត ៤០ ជុំវិញពិភពលោក ដែលប៉ះពាល់ដល់ជិតពាក់កណ្តាលនៃចំនួនប្រជាជនពិភពលោក។
លោក Wang បាននិយាយទៀតថា សមាជិក G7 ផ្សេងទៀតក៏ពិបាកក្នុងការគេចចេញពីការបង្ខិតបង្ខំផ្នែកសេដ្ឋកិច្ច និងការសម្លុតដោយសហរដ្ឋអាមេរិកនេះណាស់ ដោយលើកឡើងពីការគាបសង្កត់របស់សហរដ្ឋអាមេរិកទៅលើក្រុមហ៊ុន Toshiba របស់ជប៉ុន ក្រុមហ៊ុន Siemens របស់អាល្លឺម៉ង់ និងក្រុមហ៊ុន Alstom របស់បារាំង ដែលជាសម្ព័ន្ធមិត្តរបស់សហរដ្ឋអាមេរិកទាំងអស់៕
