(ខាទុំ)៖ យោង តាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី២៦ ខែ មេសាឆ្នាំ២០២៣ បានអោយដឹងថា ការប្រយុទ្ធគ្នាបានផ្ទុះឡើងជាថ្មីក្នុងប្រទេសស៊ូដង់កាលពីល្ងាច ថ្ងៃអង្គារសប្តាហ៍នេះ (ម៉ោងក្នុងតំបន់) បើទោះបីជាមានការប្រកាសបទឈប់បាញ់ក៏ដោយ ខណៈ ដែល បេសកជនអង្គការសហប្រជាជាតិនិយាយថា បទឈប់បាញ់ត្រូវបានអនុវត្តដោយផ្នែកខ្លះ ប៉ុណ្ណោះ ហើយមិនមានសញ្ញានៃការត្រៀមខ្លួនសម្រាប់កិច្ចពិភាក្សាគ្នានោះទេ។
កងទ័ពស៊ូដង់ និងកងកម្លាំងទាហានប៉ារ៉ា (RSF) បានយល់ព្រមលើបទឈប់បាញ់រយៈពេល ៧២ម៉ោងកាលពីថ្ងៃអង្គារ ក្រោមការសម្របសម្រួលដោយសហរដ្ឋអាមេរិក និងអារ៉ាប៊ីសាអូឌីត។ ប៉ុន្តែ អ្នកយកព័ត៌មាន Reuters ម្នាក់និយាយថា ការបាញ់កាំភ្លើង និងការផ្ទុះនៅតែមាននៅទីក្រុង អូមឌូម៉ាន់ (Omdurman) ក្បែរទីក្រុងខាទុំ នៅលើដងទន្លេ នីល (Nile) ជាកន្លែងដែលកងទ័ពបាន ប្រើយន្តហោះដ្រូន ដើម្បីកំណត់ទីតាំងរបស់កងកម្លាំងទាហានប៉ារ៉ា។
បេសកជនពិសេសរបស់អង្គការសហប្រជាជាតិទទួលបន្ទុកកិច្ចស៊ូដង់ លោក វ៉ុលឃឺ ភឺត (Volker Perthes) បានប្រាប់ក្រុមប្រឹក្សាសន្តិសុខថា បទឈប់បាញ់ហាក់ដូចជាកំពុង មានតែនៅក្នុងផ្នែក ខ្លះប៉ុណ្ណោះ រហូតមកដល់ពេលនេះ។ ភាគីទាំងពីរក៏នៅមិនទាន់បានបង្ហាញពីការត្រៀមខ្លួន ដើម្បី យ៉ាងចរចានោះទេ ហើយបន្តគិតថាការធានាជ័យជម្នះផ្នែកយោធាលើភាគីម្ខាងទៀត គឺអាចធ្វើទៅបាន៕
