(ភ្នំពេញ)៖ ក្រសួងអប់រំ យុវជន និងកីឡា បានណែនាំដល់គ្រឹះស្ថានអប់រំទាំងរដ្ឋ និងឯកជន លើក កម្ពស់ការសិក្សាវប្បធម៌ និងអរិយធម៌ខ្មែរ ដើម្បីបណ្តុះ និងពង្រឹងស្មារតីស្នេហាជាតិ ឱ្យកាន់តែខ្លាំង ក្លា ព្រមទាំងចូលរួមអភិរក្ស និងលើកកម្ពស់វប្បធម៌ជាតិខ្មែរឱ្យបានគង់វង្ស និងរីកចម្រើនថែមទៀត។
សេចក្តីណែនាំរបស់ក្រសួងអប់រំ ធ្វើឡើងបន្ទាប់ពីគេមើលឃើញពីឱនភាពនៃការយល់ដឹងរបស់កូនខ្មែរពីវប្បធម៌ និងអរិយធម៌ជាតិសាសន៍របស់ខ្លួន។ ឯកឧត្តម បណ្ឌិត ហ៊ុន ម៉ាណែត នាពេល កន្លងទៅ ក៏ធ្លាប់បានបង្ហាញការបារម្ភចំពោះឱនភាពនេះផងដែរ។ ឯកឧត្តម បានស្នើឱ្យពង្រឹងការ អប់រំផ្នែកវប្បធម៌ អរិយធម៌ និងសីលធម៌របស់ខ្មែរនៅតាមគ្រឹះស្ថានអប់រំ ជាពិសេសកម្រិតចំណេះដឹង ទូទៅ។
ដើម្បីលើកកម្ពស់ការយល់ដឹងផ្នែកវប្បធម៌ និងអរិយធម៌របស់ខ្មែរនេះ ក្រសួងអប់រំ យុវជន និងកីឡា បានណែនាំដល់គ្រប់គ្រឹះស្ថានសិក្សាសាធារណៈ និងឯកជនត្រូវអនុវត្តន៍នូវសេចក្តីណែនាំមួយចំនួន ដូចខាងក្រោម៖
១៖ គ្រឹះស្ថានសិក្សាសាធារណៈ និងឯកជនទាំងអស់ ត្រូវចាត់ចែងរៀបចំ និងរកឯកសារពាក់ព័ន្ធនឹង ការពង្រីកចំណេះលើផ្នែកវប្បធម៌-អរិយធម៌ ដូចមានរាយចំណងជើងក្នុងឧបសម្ព័ន្ធខាងក្រោមដាក់ នៅក្នុងបណ្ណាល័យសាលា ដើម្បីឆ្លើយតបនឹងការសិក្សារបស់សិស្ស។
២៖ រៀបចំយន្តការចូលអាន និងសិក្សាក្នុងបណ្ណាល័យ ដោយចែកវេន ឬរៀបកាលវិភាគឱ្យបានច្បាស់លាស់និងបង្កលក្ខណៈងាយស្រួលក្នុងការអាន សិក្សា និងស្រាវជ្រាវ។
៣៖ ជំរុញសិស្សឱ្យចូលអាន សិក្សា និងស្រាវជ្រាវលើឯកសារទាំងនេះ ដោយមានការដឹកនាំ និង សម្របសម្រួលសិក្សា ដោយគ្រូឈរថ្នាក់ ឬគ្រូឯកទេសភាសាខ្មែរ អក្សរសាស្ត្រខ្មែរ និងសិក្សាសង្គម ព្រមទាំងមានការផ្ដល់សេវាយ៉ាងល្អ និងត្រឹមត្រូវពីបណ្ណារក្ស។
៤៖ ជំរុញសិស្សឱ្យចូលខ្ចី និងបំផុសឱ្យសិស្សរកជាវសៀវភៅទាំងនេះយកទៅអាននៅផ្ទះ ដោយ គ្រូដាក់បញ្ហា ដូចជាសំណួរ ឬលំហាត់ និងធ្វើការត្រួតពិនិត្យ កែលម្អនាពេលបន្ទាប់។
៥៖ អង្គភាពពាក់ព័ន្ធ គណៈគ្រប់គ្រងសាលា និងអ្នកទទួលបន្ទុកបច្ចេកទេស ត្រូវជំរុញតាមដាន និងវាយតម្លការអនុវត្តការសិក្សាខ្លឹមសារវប្បធម៌-អរិយធម៌ខ្មែរ ឱ្យបានហ្មត់ចត់ និងមានប្រសិទ្ធភាព។
៦៖ រៀបចំចេញវិញ្ញាសាប្រឡងប្រចាំខែ ប្រឡងឆមាស និងប្រឡងថ្នាក់ជាតិ ក្នុងមុខវិជ្ជាភាសាខ្មែរ និងអក្សរសាស្ត្រខ្មែរ និងសិក្សាសង្គម។
៧៖ នាយកដ្ឋានអភិវឌ្ឍកម្មវិធីសិក្សាត្រូវរៀបចំគម្រោងថវិកាសម្រាប់ជា ឬថតចម្លង សម្រាប់ដាក់ក្នុងបណ្ណាល័យ ឆ្លើយតបទៅនឹងតម្រូវការជាក់ស្តែងរបស់គ្រឹះស្ថានសិក្សាសាធារណៈមួយចំនួន ដែលគ្មានលទ្ធភាពដើម្បីបម្រើឱ្យការសិក្សាទាន់ពេលវេលា និងមានប្រសិទ្ធភាព។
៨៖ នាយកដ្ឋានអភិវឌ្ឍកម្មវិធីសិក្សាត្រូវសហការជាមួយអង្គភាព និងស្ថាប័នពាក់ព័ន្ធ ដៃគូអភិវឌ្ឍ នានាដោយកៀរគររកមូលនិធិ ដើម្បីទ្រទ្រង់ និងបម្រើឱ្យការសិក្សាវប្បធម៌-អរិយធម៌ខ្មែរឱ្យមានគុណ ភាព និងនិរន្តរភាព៕
