(ពោធិ៍សាត់)៖ នៅព្រឹកថ្ងៃអង្គារ ទី១៤ ខែមីនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋ មន្ត្រីកម្ពុជា អញ្ជើញពិនិត្យវឌ្ឍនភាពសាងសង់វារីអគ្គិសនី ស្ទឹងពោធិ៍សាត់១ និងសំណេះសំណាល ជាមួយប្រជាពលរដ្ឋ ដែលរងផលប៉ះពាល់ដោយសារគម្រោង។
វារីអគ្គិសនីស្ទឹងពោធិ៍សាត់១ មានអានុភាពប្រមាណ ៨០មេហ្កាវ៉ាត់ មានទីតាំងស្ថិតនៅតាមដង ស្ទឹងពោធិ៍សាត់ ក្នុងឃុំប្រមោយ ស្រុកវាលវែង ខេត្តពោធិ៍សាត។ រាជរដ្ឋាភិបាលកម្ពុជា បានអនុញ្ញាត ឱ្យក្រុមហ៊ុន SPHP (Cambodia) Co., Ltd. សាងសង់កាលពីថ្ងៃទី០៥ ខែមេសា ឆ្នាំ២០១៩។
បន្ទាប់ពីទទួលបានសិទ្ធិក្នុងការសាងសង់ និងវិនិយោគរួចមក ក្រុមហ៊ុនបានខិតខំស្វែងរកប្រភពទុន វិនិយោគ និងក្រុមហ៊ុនដៃគូសាងសង់ដែលមានបទពិសោធន៍ខ្ពស់ ដោយបានជ្រើសយកក្រុមហ៊ុន Power China មកពីប្រទេសចិន ដែលធ្លាប់មានបទពិសោធន៍ក្នុងការសាងសង់គម្រោងវារីអគ្គិសនី នៅកម្ពុជានាពេលកន្លងមក។
គម្រោងវារីអគ្គិសនីស្ទឹងពោធិ៍សាត់១ បានចាប់ផ្តើមដំណើរការសាងសង់នៅខែកុម្ភៈ ឆ្នាំ២០២២ រហូតមកដល់បច្ចុប្បន្នក្រុមហ៊ុន បានយកចិត្តទុកដាក់សាងសង់ និងសម្រេចបានលទ្ធផលមួយចំនួន រួមមាន បោសសំអាតមីន យុទ្ធភ័ណ្ឌមិនទាន់ផ្ទុះលើផ្ទៃដី ៥៦៦ហិកតា, កាប់ឆ្ការព្រៃនៅទីតាំង សំខាន់ៗរបស់គម្រោងលើផ្ទៃដីទំហំ ៥៦៦ហិកតា ព្រមទាំងបានសាងសង់ផ្លូវចូលទៅកាន់ទំនប់ និងទីតាំងសំខាន់ៗរបស់គម្រោងសរុបជិត ៣៦គីឡូម៉ែត្រ។
គម្រោងកំពុងដំណើរការសាងសង់ហេដ្ឋារចនាសម្ព័ន្ធសំខាន់ៗមួយចំនួនទៀត។ គម្រោងនេះគ្រោងនឹងបញ្ចប់ការសាងសង់ ព្រមទាំងដាក់ឱ្យដំណើរការនៅឆ្នាំ២០២៦។
លោក ខូច រីដា អភិបាលខេត្តពោធិ៍សាត់ បានឱ្យដឹងថា គម្រោងវារីអគ្គិសនីនេះ ប៉ះពាល់ប្រជាពល រដ្ឋប្រមាណ ៣៤៧គ្រួសារ។ ក្នុងនោះប្រជាពលរដ្ឋប្រមាណ ៣៤២គ្រួសារ ស្មើនឹង ៩៨ភាគរយ បានដោះស្រាយគោលនយោបាយសំណងរួចរាល់។
សម្រាប់ការដោះស្រាយផលប៉ះពាល់ និងផ្តល់សំណង ត្រូវបានចែកជា៣លក្ខខណ្ឌ។ លក្ខខណ្ឌទី១ សម្រាប់គ្រួសារពលរដ្ឋដែលមានផ្ទះ និងដីស្ថិតក្នុងតំបន់គម្រោងចំនួន ១២គ្រួសារ។ ក្នុងមួយគ្រួសារ ទទួលបានផ្ទះទំហំ ៨០ម៉ែត្រការ៉េ និងដីកសិកម្មដែលបានឈូសឆាយភួររាស់រួចរាល់ទំហំ៥ហិកតា ស្ថិតនៅភូមិតាំងយ៉ ឃុំប្រម៉ោយ ស្រុកវាលវែង ខេត្តពោធិ៍សាត់។
លក្ខខណ្ឌទី២ សម្រាប់គ្រួសារពលរដ្ឋដែលប៉ះពាល់តែដីកសិកម្ម និងពុំមានផ្ទះក្នុងតំបន់គម្រោង មានចំនួន ៦០គ្រួសារ។ ក្នុងមួយគ្រួសារ ទទួលបានដីកសិកម្មដែលបានឈូសឆាយភ្ជួររាស់ រួចរាល់ទំហំ ៥ហិកតា ស្ថិតនៅភូមិទួលក្រួស ឃុំប្រម៉ោយ ស្រុកវាលវែង ខេត្តពោធិ៍សាត់។
លក្ខខណ្ឌទី៣ សម្រាប់គ្រួសារដែលមានតែខ្ទម និងដីក្នុងតំបន់គម្រោង មានចំនួន ២១៨គ្រួសារ។ ប្រជាពលរដ្ឋទាំង២១៨គ្រួសារនេះ ព្រមទទួលសំណងជាប្រាក់សុទ្ធ។ ថ្លៃសំណង ត្រូវបានដោះ ស្រាយតាមការសិក្សា ដែលត្រូវបានកំណត់តម្លៃទៅតាមការកំណត់របស់ក្រសួងសេដ្ឋកិច្ច និងហិរញ្ញ វត្ថុ។ ដោយឡែកប្រជាពលរដ្ឋប្រមាណ ៤៣គ្រួសារទៀត បន្ទាប់ពីសិក្សាជាក់ស្តែង គឺមាន ៣៧ គ្រួសារ មិនរងផលប៉ះពាល់ និង ៦គ្រួសារ បាត់ដំណឹងរកម្ចាស់មិនឃើញ។
គម្រោងវារីអគ្គិសនីស្ទឹងពោធិ៍សាត់១ គឺជាវារីអគ្គិសនីទី២ហើយនៅក្នុងខេត្តពោធិ៍សាត់ បន្ទាប់ពី វារីអគ្គិសនីអាតៃ។ វារីអគ្គិសនីស្ទឹងពោធិ៍សាត់១ ត្រូវបានសិក្សា និងវាយតម្លៃមានប្រយោជន៍ខ្ពស់ សម្រាប់សេដ្ឋកិច្ច។
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុក អគ្គិសនីកម្ពុជា បានឱ្យដឹងថា គម្រោងនេះក្រៅពីផ្តល់ការងាររាប់រយកន្លែងជូនដល់ប្រជាពល រដ្ឋហើយនោះ គម្រោងនេះ ក៏ជួយផ្តល់បន្ថែមនូវថាមពលអគ្គិសនីសម្រាប់ខេត្តពោធិ៍សាត់ ក៏ដូចជា ក្របខណ្ឌទូទាំងប្រទេស។ បន្ថែមពីលើនេះគម្រោងនេះ ក៏ជួយទប់ទឹកជំនន់ក្នុងខែវស្សា មិនឱ្យជន់ លិចភូមិសាស្ត្រមួយចំនួនដូចជាក្រុងពោធិ៍សាត់ ស្រុកកណ្តៀង និងបាកានជាដើម។
លើសពីនេះទៀត គម្រោងវារីអគ្គិសនីស្ទឹងពោធិ៍សាត់១ ក៏ជួយផ្តត់ផ្គង់ទឹកសម្រាប់ប្រជាពលរដ្ឋ ប្រើប្រាស់ និងស្រោចស្រពនៅក្នុងរដូវប្រាំងផងដែរ។
បើតាមឯកឧត្តម កែវ រតនៈ ក្រៅតែពីប្រយោជន៍រៀបរាប់ខាងលើហើយនោះ គម្រោងវារីអគ្គិសនីស្ទឹង ពោធិ៍សាត់១ ក៏ផ្តល់ជាប្រយោជន៍សម្រាប់វិស័យទេសចរណ៍ផងដែរ៕
