(ភ្នំពេញ)៖ អ្នកនាំពាក្យ នៃអគ្គស្នងការដ្ឋាននគរបាលជាតិ នាថ្ងៃទី២២ ខែធ្នូ ឆ្នាំ២០២២នេះ បានចេញសេចក្តីប្រកាសព័ត៌មានបដិសេធ និងថ្កោលទោសចំពោះការចោទប្រកាន់ទាំងបំពានមក លើកងកម្លាំង នគរបាលជាតិថាជាចោរដ៏សាហាវ និងជាមេខ្លោងធំនៃអំពើជួញដូរគ្រឿងញៀន។
ការចេញបដិសេធនេះធ្វើឡើងបន្ទាប់ពីពេលនាពេលថ្មីៗនេះ មានគេហរទំព័រហ្វេសប៊ុក IMan-KH របស់ឈ្មោះ ណាក់ បានបង្ហោះសារផ្សព្វផ្សាយព័ត៌មានប្រឌិត មានចរិតមួលបង្កាច់ បរិហារកេរ្តិ៍ ដោយបានប្រមាថយ៉ាងធ្ងន់ធ្ងរ ដល់កិត្តិយស និងសេចក្តីថ្លៃថ្នូររបស់កងកម្លាំងនគរបាលជាតិ ពាក់ ព័ន្ធដល់ការបង្ក្រាប និងការចាប់យកសារធាតុញៀន ជាពិសេសចោទប្រកាន់ថាយកសារធាតុ ផ្សេងៗមកដុតបំផ្លាញក្លែងបន្លំជាសារធាតុញៀន។ លើសពីនេះទៅទៀត ក៏បានចោទប្រកាន់ទាំង បំពានមកលើកងកម្លាំងនគរបាលជាតិថាជាចោរដ៏សាហាវ និងជាមេខ្លោងធំនៃអំពើជួញដូរគ្រឿង ញៀនទៀតផង។
អ្នកនាំពាក្យ នៃអគ្គស្នងការដ្ឋាននគរបាលជាតិបានបន្តថា ខ្លឹមសារដែលបានបង្ហោះផ្សព្វផ្សាយខាង លើនេះ បានបង្ហាញឱ្យឃើញយ៉ាងច្បាស់ថាម្ចាស់ទំព័រហ្វេសប៊ុក IMan-KH របស់ឈ្មោះ ណាក់ មានចេតនាយ៉ាងពិតប្រាកដ ក្នុងការវាយ ប្រហារបំផ្លាញកិត្យានុភាព កិត្តិយស និងសេចក្តីថ្លៃថ្នូរ របស់កងកម្លាំងនគរបាលជាតិ ក្នុងគោលដៅលាបពណ៌ ញុះញង់ ធ្វើឱ្យសាធារណជនមានការភន្ត័ ច្រឡំ អស់ជំនឿ បាត់បង់ភាពកក់ក្តៅ និងរើសអើងចំពោះកងកម្លាំង នគរបាលជាតិ។
ពាក់ព័ន្ធព័ត៌មានប្រឌិតបែបអគតិបែបនេះ អ្នកនាំពាក្យនៃអគ្គស្នងការដ្ឋាននគរបាលជាតិក៏បានបក ស្រាយបំភ្លឺថា៖
*ទី១៖ សារធាតុញៀនដែលចាប់យកបានក្នុងការបង្ក្រាបបទល្មើសគ្រឿងញៀន សុទ្ធតែបានធ្វើ កោសល្យវិច្ច័យបច្ចេកទេស រក្សាទុកយ៉ាងត្រឹមត្រូវ ដើម្បីដាក់បន្ទុក និងផ្តន្ទាទោសជនល្មើសតាម ច្បាប់។
*ទី២៖ ការដុតបំផ្លាញសារធាតុញៀនត្រូវបានអនុវត្តទៅតាមនីតិវិធីដោយមានសេចក្តីសម្រេច សាលក្រម សាលដីការបស់តុលាការ និងមានក្រុមការងារមកពីអាជ្ញាធរមានសមត្ថកិច្ច និងស្ថាប័ន ពាក់ព័ន្ធ ដែលមានព្រះរាជអាជ្ញារាជធានី-ខេត្ត ជាប្រធាន។ មិនត្រឹមតែប៉ុណ្ណោះ មុនពេលដុតបំផ្លាញ ត្រូវមានគណៈកម្មការចម្រុះត្រួតពិនិត្យការដឹកជញ្ជូន និងការដុតបំផ្លាញយ៉ាងហ្មត់ចត់រហូតដល់ចប់ សព្វគ្រប់ ដោយគ្មានជនណាម្នាក់អាចលួចលាក់យកគ្រឿងញៀនទាំងនោះបានឡើយ។ ការដុតបំផ្លាញសារធាតុញៀនត្រូវបានអនុវត្តរៀងរាល់ឆ្នាំក្នុងពិធីប្រារព្ធទិវាអន្តរជាតិប្រឆាំងគ្រឿងញៀន ដោយបានធ្វើការផ្សព្វផ្សាយយ៉ាងទូលំទូលាយតាមគ្រប់ប្រព័ន្ធព័ត៌មានទៀតផង។
*ទី៣៖ ថ្នាក់ដឹកនាំក្រសួងមហាផ្ទៃ និងអគ្គស្នងការដ្ឋាននគរបាលជាតិ បានយកចិត្តទុកដាក់ខ្ពស់ក្នុង ការគ្រប់គ្រង ដឹកនាំនគរបាលជាតិ និងអនុវត្តយ៉ាងម៉ឺងម៉ាត់នូវគោលការណ៍ លើកសរសើរ ជូនរង្វាន់ ចំពោះបុគ្គលមានស្នាដៃ និងដាក់ទោសចំពោះមន្ត្រីអសកម្ម ល្មើសវិន័យ និងល្មើសច្បាប់ ដោយមិន ទុកឱ្យមន្ត្រីណាម្នាក់ប្រព្រឹត្តល្មើសច្បាប់បានឡើយ។
អ្នកនាំពាក្យនៃអគ្គស្នងការដ្ឋាននគរបាលជាតិបានចេញបដិសេធ និងថ្កោលទោសចំពោះទង្វើអសី លធម៌ គ្មានវិចារណញ្ញាណ ដែលបានប្រព្រឹត្តហួសព្រំដែននៃសិទ្ធិបញ្ចេញមតិរបស់បុគ្គល ណាក់ និងតម្រូវឱ្យបុគ្គលរូបនេះធ្វើការសុំទោសជាសាធារណៈនូវរាល់កំហុសឆ្គង ដែលបានចោទប្រកាន់ ប្រមាថដល់កិត្តិយស និងសេចក្តីថ្លៃថ្នូររបស់កងកម្លាំងនគរបាលជាតិ។
ក្នុងនាមកងកម្លាំងអនុវត្តច្បាប់ អគ្គស្នងការដ្ឋាននគរបាលជាតិនឹងប្រើប្រាស់គ្រប់វិធានការស្រប តាមច្បាប់ ប្រឆាំងនូវរាល់ទង្វើទាំងឡាយណាដែលធ្វើឱ្យប៉ះពាល់ដល់កិត្យានុភាព និងកិត្តិយសរបស់ កងកម្លាំងនគរបាលជាតិ៕
