ព្យុះស៊ីមប៉ាកា បានថយឥទ្ធិពល មកនៅត្រឹមកម្រិត ជាសម្ពាធទាបសកម្ម (ACTIVE ) លើដីគោក ក្បែរឆ្នេរប្រទេសចិន នៅព្រឹកថ្ងៃទី២២ ខែកក្កដា ហើយវានឹងដើរចុះមកក្នុង ឈូងសមុទ្រតុងកឹងវិញ រួចបង្កើនឥទ្ធិពល ទៅជាវិសម្ពាធ (TD) ឬជាកូនព្យុះ (TS) ដើរកាត់លើកោះហៃណាំ ទៅរកកោះតៃវ៉ាន់ ។
ព្រមពេលជាមួយគ្នានោះ ភ្លៀងធ្លាក់ក្នុងបរិមាណច្រើន អាចកើតមាន នៅតំបន់អាង ទន្លេមេគង្គលើ និងក្នុងប្រទេសកម្ពុជា ពិសេសនៅតំបន់មាត់សមុទ្រ ចាប់ពីថ្ងៃទី២៣ ខែកក្កដា ទៅ។
ឯកឧត្តម ចាន់ យុត្ថា អ្នកនាំពាក្យ និងជារដ្ឋលេខាធិការ ក្រសួងធនធានទឹក និងឧតុនិយម បានប្រាប់ឱ្យ រស្មីកម្ពុជាដឹង នៅថ្ងៃទី២២ ខែកក្កដា ឆ្នាំ២០២១ថាៈ ព្យុះស៊ីមប៉ាកា បានថយឥទ្ធិពល មកនៅត្រឹមកម្រិត សម្ពាធទាបសកម្ម (ACTIVE ) លើដីគោកក្បែរឆ្នេរប្រទេសចិន នៅព្រឹកថ្ងៃទី២២ ខែកក្កដា។
ស៊ីមប៉ាកា វានឹងដើរ ចុះមកក្នុងឈូងសមុទ្រតុងកឹងវិញ នៅល្ងាចថ្ងៃទី២៣ រួចបង្កើនឥទ្ធិពល ទៅជាវិសម្ពាធ (TD) ឬ ជាកូនព្យុះ ( TS) ដើរកាត់លើកោះហៃណាំ ទៅរកកោះតៃវ៉ាន់។
អ្នកនាំពាក្យក្រសួងជំនាញ ខាងលើ បាននិយាយឱ្យដឹងទៀតថាៈ ចំណែកព្យុះទី៦ ឈ្មោះអីន ហ្វា ដែលជាព្យុះទីហ្វុង ស្ថិតក្នុងកម្រិត២ នឹងបង្កើនឥទ្ធិពលដល់កម្រិត ៣ និងអាចទៅជាព្យុះ មានឥទ្ធិពលខ្លាំង លើសពីកម្រិត ៤ គឺ sTY មានដំណើរបន្តទៅ រកឆ្នេរភាគខាងកើត ប្រទេសចិន (សមុទ្រលឿង) ដែលពេលនេះ (២២កក្កដា) កំពុង ស្ថិតនៅខាងកើត កោះតៃវ៉ាន់។
ឯកឧត្តម ចាន់ យុត្ថា បានបញ្ជាក់ថាៈ ពេលស៊ីមប៉ាកា ដើរចូលមកក្នុងឈូងសមុទ្រ តុងកឹងវិញ ក្នុងពេល ដែលប្រព័ន្ធសម្ពាធទាប (ITCZ ) នៅលើតំបន់អាងទន្លេមេគង្គ មិនទាន់ដាច់ដោច នាំឱ្យ មានភ្លៀង ធ្លាក់រាយប៉ាយច្រើន ស្ទើរពេញមួយសប្តាហ៍ ចាប់ពីថ្ងៃសុក្រទី២៣ ខែកក្កដា ទាំងនៅតំបន់អាង ទន្លេមេគង្គលើទាំងនៅក្នុង ប្រទេសកម្ពុជា ពិសេសតំបន់មាត់សមុទ្រ ៕
