ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រម៉ាញ់ និងនេសាទកាលពីម្សិលមិញនេះបានរំលឹកដល់ថ្ងៃទី 1 ខែកក្កដាដែលជាថ្ងៃ ទិវាមច្ឆាជាតិ។ឯកឧត្តម បានថ្លែងថា ក្នុងនាមថ្នាក់ដឹកនាំ និងមន្ត្រីរាជការ ក្រសួងកសិកម្ម រុក្ខាប្រមាញ់ និងនេសាទ ខ្ញុំសូមចូលរួមអបអរសាទរ ទិវាមច្ឆាជាតិ ០១ កក្កដា ។
ឯកឧត្តម រដ្ឋមន្ត្រីបានបញ្ជាក់ទៀតថា ថ្ងៃទី ០១ ខែកក្កដា ជាទិវាដ៏មហានក្ខត្តឫក្ស ដែលក្រសួងកសិកម្ម រុក្ខាប្រមាញ់ និងនេសាទ តែងតែប្រារព្ធ « ទិវា-មច្ឆជាតិ» ជារៀងរាល់ឆ្នាំពុំដែលអាក់ខានឡើយ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងស្មារតីចូលរួមផ្សព្វផ្សាយ គ្រប់គ្រង ការពារ អភិរក្ស ធនធានធម្មជាតិ វារិជាតិ និងអភិវឌ្ឍន៍ធនធានជលផលឱ្យបានស្ថិតស្ថេរ និងនិរន្តរភាព សម្រាប់កូនចៅ ជំនាន់ក្រោយ។
សូមរំឮកជូនថា ចាប់តាំងពីឆ្នាំ២០០៣ « ទិវាមច្ឆជាតិ» ត្រូវបានប្រារព្ធជារៀងរាល់ឆ្នាំ ដោយមានការលែងមេពូជត្រី កូនត្រី និងវារីសត្វ ពូជក្នុងស្រុកប្រមាណ៥លាន កូនក្នុង១ឆ្នាំ ចូលទៅក្នុងដែនទឹកធម្មជាតិ ដើម្បីបង្កើនផលស្តុកមច្ឆជាតិ ឱ្យកើនឡើង សម្រាប់ជួយទ្រទ្រង់ជីវភាពរស់នៅរបស់ប្រជាពលរដ្ឋនៅមូលដ្ឋាន។
ប៉ុន្តែដោយសារហានិភ័យបណ្តាលមកពីជំងឺឆ្លងកូវីដ១៩ ដែលបាននិងកំពុងរាត ត្បាតជាសកល និងក្នុងព្រះរាជាណាចក្រកម្ពុជា រាជរដ្ឋាភិបាលបានសម្រេចផ្អាក ការរៀបចំ «ទិវាមច្ឆជាតិ» នេះ ចាប់ពីឆ្នាំ២០២០មកទល់ពេលនេះ ក្នុងគោលបំណង ទប់ស្កាត់ការរាតត្បាតជំងឺឆ្លងជាសកលនេះនៅក្នុងសហគមន៍។
ទោះជាមានបញ្ហាដូចនេះក្តី ការលែងកូនត្រី ទៅក្នុងដែនសហគមន៍ មានលក្ខណៈ ទ្រង់ទ្រាយតូចអាចប្រព្រឹត្តទៅបាន ប៉ុន្តែត្រូវអនុវត្តវិធានការសុខាភិបាលឱ្យបានខ្ជាប់ខ្លួន។ ជាមួយនឹងការអបអរ សាទរ « ទិវាមច្ឆជាតិ ០១ កក្កដា » ក្រសួងកសិកម្ម រុក្ខាប្រមាញ់ និងនេសាទ សូមអំពាវនាវដល់ បងប្អូនជនរួមជាតិ និងប្រជានេសាទ ទាំងអស់ ត្រូវចងចាំ និងបន្តអនុវត្តនូវអនុសាសន៍ដ៏ត្រចះត្រចង់ទាំង៧ចំណុចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឱ្យបានខ្ជាប់ខ្លួន៖
១. សូមកុំប្រើឧបករណ៍នេសាទខុសច្បាប់សម្រាប់ធ្វើនេសាទ ដូចជា ថ្មស្អុយ ឧបករណ៍ឆកត្រី ស្បៃមុង គ្រឿងផ្ទុះ អ្វីក៏ដោយដែលឧបករណ៍នេសាទហាមឃាត់។
២. សូមកុំចាប់ត្រីក្នុងរដូវហាមឃាត់ គឺរដូវត្រីពង (ពីថ្ងៃទី ០១ ខែមិថុនា ដល់ថ្ងៃទី ៣១ ខែតុលា)សូមមេត្តារួមគ្នាដើម្បីទុកត្រី ទុកឱ្យវាធំ ឱ្យវាពង ឱ្យវាញាស់ឡើងកុំចាប់វា កុំបំផ្លាញវា។
៣. សូមមេត្តាកុំកាប់ព្រៃលិចទឹក ដែលជាជម្រកត្រីពងកូន ជម្រកត្រី និងជាកន្លែងស្វែង រកចំណី ហើយក៏សុំជួយដាំព្រៃលិចទឹកឡើងវិញផងដែរ។
៤. ត្រូវជួយការពារតំបន់អភិរក្ស រាប់ទាំងការជួយផ្តល់ព័ត៌មានអំពីជនខិលខូច ឬមន្ត្រីខិលខូចចូលទៅបំផ្លាញក្នុងតំបន់អភិរក្ស។
៥. កុំយកបឹងព្រែកប្រើប្រាស់ខុសគោលដៅនេសាទគ្រួសារ ដូចជាការដាំឈូក ឬចាក់ដីចូលលុបដើម្បីកសាងសំណង់ផ្សេងៗ។
៦. សូមកុំឱ្យមានទំនាស់រវាងប្រជាជន និងប្រជាជនលើបញ្ហាអ្នកនេសាទជាមួយ អ្នកធ្វើស្រែប្រាំង និងទំនាស់ដែនទឹករវាងឃុំនិងឃុំ ស្រុកនិងស្រុក ខេត្តនិងខេត្ត។
៧. ស្នើចូលរួម « ទិវាមច្ឆជាតិ ០១ កក្កដា » ជំរុញការចិញ្ចឹមត្រី ការធ្វើវារីវប្បកម្ម ការរក្សាទុកពូជត្រីធំៗ ឬជិតផុតពូជ៕
