អាគារមួយបានដួលរលំក្នុងពេលវាយកំទេចចោលនៅទីក្រុងក្វាងជូ របស់កូរ៉េខាងត្បូងកាលពីថ្ងៃពុធ ដោយបណ្តាលអោយស្លាប់មនុស្ស៩នាក់និង៨នាក់ទៀតរងរបួសធ្ងន់។មន្ត្រីអគ្គិភ័យបាននិយាយថា គេបានទទួលរបាយការណ៍នៅម៉ោង៤និង២២នាទីរសៀលថា អាគារកំពស់៥ជាន់មួយបានដួលរលំនៅក្រុងក្វាងជូ នៅចម្ងាយ២៧០គីឡូម៉ែត្រពីទីក្រុងសេអ៊ូល និងវាបានបាក់សង្កត់លើរថយន្តក្រុងមួយនៅជិតការដ្ឋានសំណង់។
គិតត្រឹមម៉ោងជាង៨យប់ មនុស្ស៩នាក់ត្រូវបានបញ្ជាក់ថាស្លាប់ និង៨នាក់ទៀតរងរបួសធ្ងន់។
ជនរងគ្រោះសុទ្ធតែជាអ្នកដំណើរក្នុងរថយន្តក្រុងទាំងអស់។ក្រុមអ្នកជួយ សង្គ្រោះបានស្វែងរកក្នុងគំនរបាក់បែកក្រែងមានកម្មករសំណង់ឬអ្នកដំណើរឆ្លងកាត់ជាប់នៅក្រោមគំនរបាក់បែក នៅពេលមូលហេតុនៃការបាក់នេះគេនៅមិនទាន់ដឹងភ្លាមនៅឡើយ៕
