ខេត្តកំពង់ចាម ៖ ក្រុមជំនាញក្នុងប្រតិបត្តិការបានប្រទះឃើញឆ្អឹងមនុស្សដែលគេសន្និដ្ឋានថាជារបស់កងទ័ពម៉ារីនខ្មែរម្នាក់ខាងភាគីលោកសេនាប្រមុខ លន់ ណុល នៃរបបសាធារណរដ្ឋខ្មែរ រួមទាំងគ្រាប់ភ្លើងរាប់តោនដែលជាប់ក្នុងនាវាចម្បាំងលិចក្នុងសម័យសង្គ្រាមនៅបាតទន្លេមេគង្គ ជម្រៅ១៩ម៉ែត្រក្នុងភូមិសាស្ត្រភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ។ ការប្រទះឃើញនេះ ស្ថិតក្នុងអំឡុងប្រតិបត្តិការរុករកចាប់ពីខែតុលា ឆ្នាំ២០២០ មកដល់ចុងខែមករា ឆ្នាំ២០២១។
ផ្អែកតាមស្លាកបន្ទះលោហធាតុមួយសន្លឹក អាចឱ្យគេដឹងថា ជាអដ្ឋិធាតុរបស់ទាហានម្នាក់ឈ្មោះ ឈឹម ឈាងលី (សរសេរជាអក្សរឡាតាំង)។ ការរកឃើញក្នុងប្រតិបត្តិការនោះរួមមាន ៖ ឆ្អឹងភ្លៅ១ មួកដែក១ ផ្លាកលោហធាតុសម្គាល់ឈ្មោះ១ កាំភ្លើង AK ១ដើម កាំបិតយោធា ១ និងគ្រាប់កាំភ្លើងជាង ៦តោន។ នេះបើតាម លោកឧត្តមសេនីយ៍ទោ ម៉ី សុភា មេបញ្ជាការបោសសម្អាតគ្រាប់មិនទាន់ផ្ទុះ នៃមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសម្អាតមីន និងកាកសំណល់សង្គ្រាម (NPMEC)។
គួរជម្រាបថា ប្រតិបត្តិការរុករកធ្វើឡើងក្រោយពេលសាឡង់បូមខ្សាច់ បានបូមជាប់គ្រាប់កាំភ្លើងក្នុងទុយោទើបបង្កឲ្យមានការភ្ញាក់ផ្អើលទៅដល់សមត្ថកិច្ច។
លោក នាង ផាត បានបញ្ជាក់ថា រហូតមកទល់ពេលនេះ ដំណើរការប្រតិបត្តិការបានរុករកឃើញទីតាំងនាវាលិច ហើយកំពុងប្រតិបត្តិការបូមខ្សាច់បណ្តើរ រុករកស្រង់យកគ្រាប់ពីនាវាបណ្ដើរ ព្រមទាំងស្តារស្រង់យកគល់ឈើ និងគល់ឫស្សីដែលជាប់គាំងជុំវិញនាវានារាំងស្ទះដល់ប្រតិបត្តិការស្រង់យកគ្រាប់ចេញពីនាវានោះ។
លោកឧត្តមសេនីយ៍ទោ ម៉ី សុភា មេបញ្ជាការកងបោសសម្អាតគ្រាប់យុទ្ធភណ្ឌមិនទាន់ផ្ទុះនៅក្រោមទឹកបានឱ្ឱ្យដឹងថា ក្រុមមន្ត្រីជំនាញកំកំពុងតែព្យាយាមចូលយកគ្រាប់មិនទាន់ផ្ទុះពីនាវាចម្បាំងដែលលិចក្នុងទន្លេកាលពីសម័យសង្គ្រាម។ នាវាលិចនេះ មានចំនួន២គ្រឿង គឺ១ មានទំហំតូច និនិងមួយទៀតទំហំធំ ដែលមានគ្រាប់ប្រមាណពី ១០០ ទៅ ២០០តោន ប៉ុន្តែនាវាតូចត្រូវបានពលរដ្ឋពុះច្រៀកលក់អេតចាយ បន្សល់តែគ្រាប់នៅរាយប៉ាយ។
លោកថ្លែងថា ៖ «ចំពោះការចុះទៅយកគ្រាប់នេះ មានការលំបាក និងគ្រោះថ្នាក់យ៉ាងខ្លាំងដែលទាមទារឱ្យមានសម្ភារទំនើប និងជំនាញពិតប្រាកដ បើមិនដូច្នោះវាប្រឈមនឹងគ្រោះថ្នាក់។ យើងគ្រោះថ្នាក់ច្រើនណាស់ ព្រោះទឹកមានជម្រៅប្រមាណ ៣០ម៉ែត្រ គ្រាប់យុទ្ធភណ្ឌមិនទាន់ផ្ទុះ និងវត្ថុរារាំង ដែលជាវត្ថុផ្ទុះដែលត្រូវបានផ្សំ និងផលិតឡើង ហើយមកដល់បច្ចុប្បន្ននេះ វាមានប្រតិកម្មខ្លាំង នៅពេលយើងប៉ះពាល់វានឹងអាចនាំឱ្យកើតដំបៅ និងរមាស់ជាដើម »។
លោកបន្តថា ៖ ក្រៅពីនេះ ក៏មានគល់ឈើធំៗ និងខ្សាច់ដែលហូរជាប់នឹងកប៉ាល់ដែលធ្វើឱ្យលំបាកក្នុងការយកគ្រាប់ និងកប៉ាល់ចេញពីក្នុងទឹក»។
គួរបញ្ជាក់ថា សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជាកាលពីថ្ងៃទី៣០ ខែសីហា ឆ្នាំមុន បានចេញសេចក្តីសម្រេចមួយ ដើម្បីសិក្សាស្រាវជ្រាវលម្អិតស្តីពីប្រវត្តិសង្គ្រាមនៅតំបន់នោះ មូលហេតុនៃការលិចនាវា ការគំរាមកំហែងដោយគ្រាប់មិនទាន់ផ្ទុះ និងបញ្ហាផ្សេងៗនៅភូមិសាស្ត្រ ឃុំមានជ័យ ស្រុកស្រីសន្ធរ ខេត្តកំពង់ចាម ដែលជាទីតាំងមាននាវាចម្បាំងលិច និងបន្សល់ទុកគ្រាប់យុទ្ធភណ្ដមិនទាន់ពីអំឡុងសង្គ្រាមឆ្នាំ១៩៧០-១៩៧៥៕
