EU ៖ លោក Paolo Gentiloni ស្នងការសហភាពអ៊ឺរ៉ុបទទួលបន្ទុកសេដ្ឋកិច្ច បាននិយាយថា សហភាពអ៊ឺរ៉ុប (EU) គ្រោងនឹងចាប់ផ្តើមបង្កើននិងបែងចែកនៅក្នុងរយៈពេលប៉ុន្មានខែខាងមុខនេះនូវផ្នែកដ៏សំខាន់នៃមូលនិធិស្តារឡើងវិញចំនួន ៧៥០ ពាន់លានអឺរ៉ូ ឬ៩០៦ ពាន់លានដុល្លារ ដែលត្រូវបានរៀបចំឡើងដើម្បីជួយដល់សេដ្ឋកិច្ចរបស់ប្លុកអឺរ៉ុបដែលរងផលប៉ះពាល់យ៉ាងខ្លាំងដោយជម្ងឺកូវិត-19។
លោក Gentiloni បានប្រាប់អ្នកយកព័ត៌មានបន្ទាប់ពីកិច្ចប្រជុំថ្នាក់រដ្ឋមន្រ្តី Eurogroup ថា ការដាក់ចេញនូវមូលនិធិស្តារឡើងវិញនិងភាពធន់ដែលភាគច្រើននៃមូលនិធិ នឹងក្លាយជាគន្លឹះក្នុងការដោះស្រាយអតុល្យភាពនិងវិសមភាពដែលត្រូវបានធ្វើឱ្យកាន់តែធ្ងន់ធ្ងរដោយសារវិបត្តិសុខភាពសាធារណៈ។
លោក Gentiloni បាននិយាយថាផែនការជាតិនឹងត្រូវបានទទួលចាប់ពីពាក់កណ្តាលខែកុម្ភៈ ហើយវានឹងចំណាយពេលពីរខែទៀតដើម្បីឱ្យគណៈកម្មការអឺរ៉ុបធ្វើការវាយតម្លៃនិងអនុម័តលើគម្រោងទាំងនោះនិង បន្ថែម ១ ខែទៀតសម្រាប់ក្រុមប្រឹក្សាអឺរ៉ុបដើម្បីអនុម័តសេចក្តីសម្រេចអនុវត្តចុងក្រោយលើផែនការនីមួយៗ។
ខណៈពេលដែលវាជាពេលវេលាដ៏តឹងរឹង លោក បាននិយាយថាផែនការទាំងអស់ដែលត្រូវបានដាក់ស្នើដោយរដ្ឋជាសមាជិកសហភាពអឺរ៉ុបគួរតែបង្ហាញពីតុល្យភាពត្រឹមត្រូវរវាងការវិនិយោគនិងកំណែទម្រង់៕
