ខេត្តកំពង់ស្ពឺ ៖ យោងតាមផេកហ្វេសប៊ុកចំនួន២ បានបង្ហោះសារដ៏ក្ដុកក្ដួលសម្ដែងនូវការសោកស្ដាយចំពោះ លោកគ្រូ លឹម សាយ គឺជាគ្រូបង្វឹកលោតឆត្រយោងមួយរូប បានស្លាប់បាត់បង់ជីវិតនៅក្នុងបេសកកម្មលោតឆត្របញ្ជា ( Free Fall ) ក្នុងការបិទវគ្គហ្វឹកហ្វឺនជំនាញកុម្ម៉ង់ដូ ជំនាន់ទី១០ វគ្គហ្វឹកហ្វឺនជំនាញឆត្រយោងជំនាន់ទី២៩ និង បើកវគ្គហ្វឹកហ្វឺនជំនាញឆត្រយោង ជំនាន់ទី៣០ នៅសាលាហ្វឹកហ្វឺនទ័ពពិសេស តេជោសែនឱរ៉ាល់ ខេត្តកំពង់ស្ពឺនៅថ្ងៃទី១៤ ខែមករា ឆ្នាំ២០២១។ ហ្វេសប៊ុកទី១ គឺជាអតីតសិក្ខាកាមឆត្រយោងជំនាន់ទី២២ (PARA22) និងមួយទៀត គឺជាសមាជិកទ័ពឆត្រយោង ជំនាន់ទី២៣ គណនីហ្វេសប៊ុកទី១ ឈ្មោះ «Hoeun SoPhorn» បានបង្ហោះភ្ជាប់ដោយរូបភាពលោកគ្រូ លឹម សាយ អមដោយសារខ្លីថា ៖ «ខ្ញុំបាទក្នុងនាមជាអតីតសិក្ខាកាមឆត្រយោងជំនាន់ទី២២ PARA22 ពិតជាមានការសោកស្តាយខ្លាំងបំផុតចំពោះលោកគ្រូ លឹម សាយ ដែលបានទទួលមរណភាព សូមលោកគ្រូទៅកាន់លោកខាងមុខ» ។
ហ្វេសប៊ុកទី២ ឈ្មោះ «សឹង្ហ ជ័យ» ក៏បានបង្ហោះរូបភាពលោកគ្រូលឹម សាយ អមដោយសារខ្លីដូចគ្នាផងដែរថា «ក្នុងនាមជាសមាជិកទ័ពឆត្រយោងជំនាន់ទី២៣ សូមចូលរួមសោកស្ដាយជាទីបំផុតចំពោះការបាត់បង់ លោកគ្រូ លឹម សាយ ដែលបានពលីក្នុងបេសកកម្មលោតឆត្របញ្ជា ( Free Fall ) នេះគឺជាការបាត់បង់នូវធនធាន ការពារជាតិ គ្រូបង្វឹកដ៏ល្អ មានបទពិសោធន៍ ចំពោះកងយោធពលខេមរភូមិន្ទ ខ្ញុំសូមបួងសួងឲ្យវិញ្ញាណក្ខន្ធលោកគ្រូ ទៅកាន់សុគតិភព» ។
តាមប្រភពព័ត៌មានបានឲ្យដឹងថា លោកគ្រូ លឹម សាយ បានជួបគ្រោះថ្នាក់ដល់អាយុជីវិតខណៈពេលដែលលោកលោតឆត្រខុសបច្ចេកទេស ដោយការទាក់ខ្សែគ្នា ហើយក៏ធ្លាក់ចុះមកដីបណ្ដាលឲ្យស្លាប់តែម្ដង។
សូមបញ្ជាក់ថាកាលពីព្រឹកថ្ងៃទី១៤ ខែមករា ឆ្នាំ២០២១ លោកវរសេនីយ៍ត្រី លឹម សាយ ជាគ្រូបង្វឹកលោតឆត្រយោង និងក្រុមគ្រូផ្សេងទៀតចំនួន ១៣នាក់ បានអនុវត្តលោតឆត្របញ្ជាសម្តែងក្នុងពិធីបិទវគ្គហ្វឹកហ្វឺនកម្មុង់ដូរជំនាន់ទី10 វគ្គហ្វឹកហ្វឺនឆត្រយោងជំនាន់ទី29 និងបើកវគ្គហ្វឹកហ្វឺនឆត្រយោងជំនាន់ទី30 នៅសាលាហ្វឹកហ្វឺនទ័ពពិសេសតេជោសែនឱរ៉ាល់ដោយលោក វីរ:សេនីយ៍ត្រី លឹម សាយ បានខុសលក្ខណ:បច្ចេកទេសក្នុងការបញ្ជាឆត្រ បានធ្វើអោយមានគ្រោះថ្នាក់រងរបួសធ្ងន់បន្ទាប់មកត្រូវបានអង្គភាពដឹកយកទៅសង្រ្គោះបន្ទាន់នៅមន្ទីពេទ្យបង្អែកខេត្តកំពង់ស្ពឺ រហូតដល់វេលាម៉ោង ១២ ព៖ ៣០ នាទីទើបអង្គភាពទទួលបានដំណឹងថាលោកវរ:សេនីយ៍ត្រី លឹម សាយ បានពលីជីវិតទៅហើយ។
ពេលនេះក្រុមគ្រួសារបានស្នើសុំយកសពលោកទៅធ្វើបុណ្យតាមប្រពៃណីនៅឯស្រុកកំណើត នៅខេត្តកំពង់ឆ្នាំង ហើយ អង្គភាពនិងនាយទាហាន ពលទាហាននៃបញ្ជាការដ្ឋានទ័ពពិសេសចូលរួមកម្មវិធីបុណ្យសពតាមប្រពៃណី សូមបងប្អូនមិត្តភ័ក្ររួមជំនាន់ និង អតីត:សិស្សឆត្រយោង សិស្សកម្មុង់ដូរទាំងអស់ចូលរួមបុណ្យសពតាមប្រពៃណីការគួរ សូមបងប្អូនជ្រាបជាដំណឹង៕
