មនុស្ស២នាក់រងរបួសក្នុងករណីគ្រោះថ្នាក់ចរាចរណ៍លើកំណាត់ផ្លូវជាតិលេខ៦ក្នុងស្រុកជ់ើងព្រៃ

កំពង់ចាម ÷ នៅថ្ងៃទី២៤ ខែមិថុនា ឆ្នាំ២០២០ នៅវេលាម៉ោង ១១ និង៣០នាទី មានករណីគ្រោះថ្នាក់ចរាចរណ៍នៅលើផ្លូវជាតិលេខ៦ ចន្លោះគីឡូម៉ែត្រ លេខ ៦៥-៦៦ ស្ថិតនៅចំណុចភូមិគោករវៀង ឃុំគោករវៀង ស្រុកជើងព្រៃ ខេត្តកំពង់ចាម រវាងរថយន្តពីគ្រឿងបុកគ្នា និងក្រឡាប់ទៅប៉ះជាមួយរថយន្ដមួយគ្រឿងផ្សេងបណ្ដាលឲ្យរបួសមនុស្ស ២នាក់ និងខូចខាតរថយន្តយ៉ាងដំណំ។

បេីតាមប្រភពពីលោក ប្រាក់ សុគន្ធ អធិការនគរបាលស្រុកជើងព្រៃ បានឱ្យដឹងថា រថយន្តដឹកដី ម៉ាកហ៊ីយ៉ាន់ដាយ ពណ៍៌ ស លាយក្រម៉ៅ ពាក់ស្លាកលេខ ភ្នំពេញ 3C.8402 បើកបរដោយឈ្មោះ ប៉ាង ស្រស់ ភេទប្រុស អាយុ ៣៩ឆ្នាំ មានទីលំនៅភូមិតាំងរលាប ឃុំមេព្រីង ស្រុកបាធាយ ខេត្តកំពង់ចាម បើកពីកើតទៅលិច លុះមកដល់កន្លែងកេីតហេតុ រថយន្តនេះបានបែកកង់ ហើយរេចង្កូតឡើងសួនពុះចែកទ្រូងផ្លូវ រួចជ្រុលទៅបុករថយន្តម៉ាកស្តារិច ពណ៌ ទឹកប៊ិច ពាក់ស្លាកលេខ កំពង់ចាម 2A.4565 បើកបរដោយឈ្មោះ រ៉េន រី ភេទប្រុស អាយុ​ ៣០ឆ្នាំ មានទីលំនៅភូមិបឹងជ្រោយ ឃុំសូទិព្វ ស្រុកជើងព្រៃ ខេត្តកំពង់ចាម បើកពីលិចទៅកើត ដោយបានក្រឡាប់ទៅប៉ះរថយន្តសណ្តោងធុនធ្ងន់មួយគ្រឿងទៀត ម៉ាកហ៊ីយ៉ាន់ដាយ ពណ៌ទឹកមាស ពាក់ស្លាកលេខ ព្រះសីហនុ 3A.7673 បើកបរដោយឈ្មោះ ម៉ន វ៉ាន់ រីម ភេទប្រុស អាយុ ៤២ឆ្នាំ មានទីលំនៅភូមិឡ ឃុំក្រហែង ស្រុកសំរោងទង ខេត្តកំពង់ស្ពឺ បើកពីលិចទៅកើត។

ក្រោយពីកេីតហេតុសមត្ថកិច្ចបានចុះមកវាស់វែង និងបាននាំវត្ថុតាងយកមករក្សាទុកនៅអធិការដ្ឋាន នគរបាលស្រុកជើងព្រៃ រង់ចាំការដោះស្រាយតាមនីតិវិធីនៅពេលករោយ៕ ដោយ ៖ ប៉ែន សុផល