ខេត្តកណ្តាល ៖ រថយន្ដមួយបាំងកន្លះមួយគ្រឿងបានបើកឆ្លងកាត់ផ្លូវរថភ្លើង តែមិនផុតត្រូវរថភ្លើងបុកចំ ផ្នែកខាងក្រោយពេញទំហឹង រួចអូសជាង១០០ម៉ែត្រ ប៉ុន្ដែសំណាងល្អ អ្នកដំណើមានក្មេង ចាស់ ប្រុសស្រីមិនមានអ្នកណាម្នាក់រងគ្រោះថ្នាក់នោះទេ។
ហេតុការណ៍នេះ បានកើតឡើងនៅរសៀលថ្ងៃទី១៩ ខែមិថុនា ឆ្នាំ២០២០នេះ ស្ថិតក្នុងភូមិត្រពាំងត្នោត ឃុំម្កាក់ ស្រុកអង្គស្នួល ខេត្តកណ្ដាល។
វីដេអូឃ្លីបមួយបានចែកចាយពេញបណ្ដាញសង្គម Facebook បានបង្ហាញថា រថយន្ដនៅខាងមុខបានឈប់ដើម្បីឲ្យរថភ្លើងមួយខ្សែឆ្លងកាត់ បន្ទាប់រថយន្ដមួយគ្រឿង ម៉ាក Ford Ranger ពណ៌ទឹកប្រាក់ ពាក់ផ្លាកលេខភ្នំពេញ 2AC-2252 មិនបានឈប់នោះទេ ដោយព្យាយាមបើកទៅមុខឲ្យផុត ដើម្បីបានទៅមុនរថភ្លើង ប៉ុន្ដែមិនបានសម្រេចក៏ត្រូវរថភ្លើង បើកចំផ្នែកខាងក្រោយពេញទំហឹងតែម្ដង៕
