រដ្ឋសភាថៃ នឹងបើកសម័យប្រជុំពិសេស នៅថ្ងៃទី១៦ សីហា ដើម្បីជ្រើសរើសនាយករដ្ឋមន្ត្រីថ្មី ក្រោយលោក សេដ្ឋា ត្រូវដកតំណែង

(បាងកក)៖ រដ្ឋសភាថៃ នឹងបើកសម័យប្រជុំពិសេសមួយ នៅថ្ងៃទី១៦ ខែសីហា ដើម្បីជ្រើសរើសនាយករដ្ឋមន្ត្រីថ្មី បន្ទាប់ពីលោក សេដ្ឋា ថាវីស៊ីន ត្រូវបានតុលាការធម្មនុញ្ញ ដកចេញពីតំណែងជានាយករដ្ឋមន្ត្រី កាលពីថ្ងៃពុធសប្ដាហ៍នេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

បើតាមនីតិវិធីរបស់រដ្ឋសភាថៃ អ្នកដែលត្រូវបានជ្រើសតាំងជាបេក្ខជននាយករដ្ឋមន្ត្រី ត្រូវប្រមូលឱ្យបានសំឡេងគាំទ្រលើសពាក់កណ្ដាល នៃចំនួនសមាជិករដ្ឋសភាសរុប ទាំង ៤៩៣រូប។ បើតាម AFP ការបោះឆ្នោតជ្រើសរើសនាយករដ្ឋមន្ត្រីថ្មីរបស់ថៃ នឹងត្រូវធ្វើឡើងនៅម៉ោង ១០ព្រឹក ថ្ងៃទី១៦ ខែសីហា (ម៉ោងនៅទីក្រុងបាងកក) ខណៈ ក្រុមចម្រុះដឹកនាំរដ្ឋាភិបាលថៃសព្វថ្ងៃ ត្រូវបានរំពឹងថានឹងបើកកិច្ចប្រជុំជ្រើសរើសបេក្ខជននាយករដ្ឋមន្ត្រី នៅថ្ងៃទី១៥ ខែសីហានេះ។

គួរបញ្ជាក់ថា តុលាការធម្មនុញ្ញថៃ កាលពីថ្ងៃទី១៤ ខែសីហា បានចេញសាលក្រមដកលោក សេដ្ឋា​ ចេញពីតំណែងនាយករដ្ឋមន្ត្រី។ ការសម្រេចចិត្តនេះធ្វើឡើងក្នុងសំឡេង គាំទ្រ៥ ទល់នឹងសំឡេងប្រឆាំង៤។ តាមសាលក្រមតុលាការធម្មនុញ្ញថៃ លោក សេដ្ឋា ត្រូវបានដកចេញពីតំណែងនាយករដ្ឋមន្ត្រីដោយសារតែលោកបានបំពានក្រមសីលធម៌ ដែលមានចែងក្នុងរដ្ឋធម្មនុញ្ញ និងមិនមានភាពស្មោះត្រង់ ពាក់ព័ន្ធនឹងការតែងតាំងរដ្ឋមន្ត្រីម្នាក់ដែលធ្លាប់មានប្រវត្តិជាប់ពន្ធនាគារ។ ប៉ុន្តែខណៈទទួលយកការសម្រេចរបស់ តុលាការធម្មនុញ្ញ លោក សេដ្ឋា បានការពារខ្លួនឯងដោយនិយាយថាជិតមួយឆ្នាំមកនេះ លោកបានដឹកនាំប្រទេសដោយភាពស្មោះត្រង់៕