(កៀវ)៖ លោក Mykhailo Podolyak ដែលជាទីប្រឹក្សារបស់ប្រធានាធិបតីអ៊ុយក្រែន បាននិយាយកាលពីថ្ងៃអង្គារសប្តាហ៍នេះថា រុស្ស៉ីគួរតែត្រូវបានបង្ខំឱ្យចូលរួមក្នុងកិច្ចប្រជុំកំពូលស្តីពីសន្តិភាព ព្រោះរុស្ស៉ីនឹងមិនព្រមចូលរួមដោយឆន្ទៈទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី១៤ ខែសីហា ឆ្នាំ២០២៤។
លោក Podolyak បានប្រាប់ទូរទស្សន៍ជាតិថា វិធីសាស្រ្តបង្ខិតបង្ខំមួយ នោះគឺជាសកម្មភាពនៅសមរភូមិ ដោយសំដៅលើការវាយលុកឆ្លងព្រំដែន មិនធ្លាប់មានរបស់អ៊ុយក្រែន ចូលទៅ ក្នុងតំបន់ Kursk របស់រុស្ស៉ី។ លោក Podolyak គូសបញ្ជាក់បន្ថែមថា «ការអញ្ជើញតាមធម្មតាទៅកាន់ប្រទេសរុស្ស៉ីមិនដំណើរការទេ ដូចនេះមានតែបង្ខំ រួមទាំងការដាក់សម្ពាធសេដ្ឋកិច្ច និងផ្នែកការទូតផងដែរ»។
គួរបញ្ជាក់ថា តាមលោក Podolyak ប្រតិបត្តិការយោធានៅតំបន់ព្រំដែនរុស្ស៉ី គឺអ៊ុយក្រែនកំពុងដោះស្រាយបញ្ហាចម្បងនៃសន្តិសុខរបស់ខ្លួន។ មួយសប្តាហ៍បន្ទាប់ពីវាយលុកឆ្លងព្រំដែន អ៊ុយក្រែនអះអាងថាបាននិងកំពុងកាន់កាប់ ៧៤ទីតាំងក្នុងតំបន់ Kursk របស់រុស្ស៉ី ហើយបន្តការរុលទៅមុខទៀត៕
