កោះកុង÷ អាកាសធាតុប្រែប្រួល ទឹក ភ្លៀងបង្អោរជាច្រើនមេ ធ្លាក់ឥតស្រាកស្រាល បង្កឲ្យតំបន់ជាច្រើន នៃសង្កាត់ទាំង៣ ក្នុងក្រុងខេមរភូមិន្ទ ខេត្តកោះកុង បានរងការជន់លិចទឹកភ្លៀងដែលមិនធ្លាប់មាន ខណៈដំណក់ទឹកភ្លៀងធ្លាក់ឥតដាច់គ្រាប់រយៈ ពេល៣ថ្ងៃនេះ បណ្ដាលឱ្យលំនៅដ្ឋាន និងផ្លូវថ្នល់ជាច្រើនខ្សែ ស្ថិត នៅក្នុងសង្កាត់ស្មាច់មានជ័យ សង្កាត់ដងទង់ និងសង្កាត់ស្ទឹងវែង បានកំពុងរងការជន់លិចយ៉ាងខ្លាំង ស្របពេលបរិមាណទឹកភ្លៀងហូរធ្លាប់ច្រើន ធ្វើឲ្យប្រព័ន្ធលូ ហូររំដោះទឹកមិនទាន់ តំបន់ខ្លះប្រព័ន្ធរំដោះទឹកតូច។
ប្រជាពលរដ្ឋរស់នៅក្នងសង្កាត់ស្មាច់មាន ជ័យ និងសង្កាត់ដងទង់ លើកឡើងនៅថ្ងៃទី២៣ ខែមិថុនា ឆ្នាំ២០២៤ថា ផ្ទះរបស់ពួកគាត់ត្រូវបានទឹកលិចទាំងក្នុង និងក្រៅរយៈពេល២-៣ថ្ងៃហើយ ដែលនាំឱ្យពិបាករស់នៅ ពិសេសសត្វអសេរពិលជាច្រើនទៀត។
ពលរដ្ឋដដែល ស្នើសុំឱ្យអាជ្ញាធរខេត្តកោះ កុង និងមន្ទីរជំនាញ ចុះពិនិត្យទីតាំងដែល ប្រឈមនឹងការលិចលង់អំឡុងពេលរដូវវស្សានេះ ដើម្បីរំដោះទឹកចេញទៅតាមប្រឡាយធម្មជាតិ ឬប្រព័ន្ធបង្ហូរទឹកនានា។
ទាក់ទិនបញ្ហាជំនន់ទឹកភ្លៀងនេះ លោក ឈឹម ចិន អភិបាលស្តីទីក្រុងខេមរភូមិន្ទ បានឱ្យដឹងថា អាជ្ញាធរមូលដ្ឋានពាក់ព័ន្ធ តាមដានយ៉ាងយកចិត្តទុកដាក់យ៉ាងខ្លាំងចំពោះភូមិសាស្រ្តរបស់ពលរដ្ឋដែលជន់លិចទឹកខ្លាំង។ មូលហេតុដែលមានជន់លិចលំនៅឋាន និងផ្លូវថ្នល់មួយចំនួន បណ្ដាលមកពីទឹកភ្លៀងធ្លាក់ទាំងយប់ទាំងថ្ងៃ ដែលរយៈ ពេល២-៣ ថ្ងៃនេះ បរិមាណទឹកភ្លៀងមានច្រើនមិនធ្លាប់មានទេ ម្យ៉ាងខណៈទឹកសមុទ្រជោឡើងខ្លាំង បណ្ដាលឱ្យប្រព័ន្ធបង្ហូរទឹក មិនអាចបង្ហូររំលោះទឹកបានទាន់ពេល។ ម៉្យាងពលរដ្ឋមួយចំនួនកង្វះការយល់ដឹងពីការទុកដាក់សំរាមឱ្យមានរបៀបរៀបរយ បណ្តាលឱ្យកកស្ទះមាត់លូ តែទោះយ៉ាងណាអាជ្ញាធរសមត្ថកិច្ចបានចុះស្តារបើកមុខទឹកតាមចំណុចលូស្ទះផងដែរ។
គួរបញ្ជាក់ថា ជំនន់ទឹកភ្លៀងនេះ បានបង្កឲ្យរថយន្ត១គ្រឿង ត្រូវចរន្តទឹកហូរបុកធ្លាក់ក្រឡាប់ចូលក្នុងទឹក ខណៈកំពុងបើកបរឆ្លងផ្លូវ នៅចំណុចស្ពាន១៧៥ លើកំណត់ផ្លូវជាតិលេខ១០ ជាកម្មសិទ្ធិរបស់មេការស្ថាបនាផ្លូវ នេះបើតាមការបញ្ជាក់ពីលោក អន ដាវុធ ប្រធានមន្ទីរសាធារណ ការ និងដឹកជញ្ជូនខេត្ត៕ ដោយ សេន ពិសិដ្ឋ
