កោះកុង÷ នៅថ្ងៃទី ១៧ ខែមិថុនា ឆ្នាំ ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួង ការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកោះកុង បានអញ្ជើញជាអធិបតី ក្នុងពិធីប្រកាសចូលកាន់តំណែងក្រុមប្រឹក្សាខេត្តកោះកុង អាណត្តិទី ៤ ដែលបានជាប់ឆ្នោតនៅក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណិតទី៤ ឆ្នាំ២០២៤ នៅសាលមហោស្រពខេត្តកោះកុង។
លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានលើក ឡើងថា ក្រោមការដឹកនាំដ៏ឈ្លាសវៃប្រកបដោយគតិបណ្ឌិត និងនយោបាយឈ្នះ.ឈ្នះ របស់ សម្ដេចអគ្គមហាសេនាបតីតេជោ ហ៊ុន សែន អគ្គមគ្គុទ្ទេសឯកដ៏ឆ្នើម បានដឹកនាំប្រទេសឲ្យចេញផុតពីស្ថានភាពដែលវិនាសខ្ទេចខ្ទី ដោយបានបញ្ចប់ទាំងស្រុងនៅសង្គ្រាម ស៊ីវិលនៅកម្ពុជា ព្រមទាំងបាននាំមកនូវសន្តិភាពពេញលេញ និងមានការអភិវឌ្ឍលើគ្រប់វិស័យ ប្រកបដោយមោទនភាពជាទីបំផុត។ ប្រជាពលមានសិទ្ធិសេរីភាពគ្រប់យ៉ាង បានរស់នៅយ៉ាងសុខដុមរមនាក្នុងសន្តិភាព ឯកភាពជាតិ អធិបតេយ្យ បូរណៈភាពទឹកដី និងប្រជាធិបតេយ្យហើយបាននិងកំពុងរួមសាមគ្គីគ្នាក្រោមដំបូលរដ្ឋធម្មនុញ្ញតែមួយ យកអស់កម្លាំងកាយ កម្លាំងចិត្ត ដើម្បីបន្តកសាង និងការពារជាតិមាតុភូមិ តាមរយៈការអនុវត្តនយោបាយការបរទេសឯករាជ្យ ដោយផ្អែកលើច្បាប់អន្តរជាតិ និងគោរពដាច់ ខាតនៅ អធិបតេយ្យភាព បូរណភាពទឹក ដី និងឯករាជ្យរបស់រដ្ឋសមាជិក អនុលោមតាមធម្មនុញ្ញអង្គការសហប្រជាជាតិ និងគោលការណ៍ដែលទទួលស្គាល់ជាសកល។
ជាមួយគ្នានេះដែរ លោកជំទាវ អភិបាល ខេត្តកោះកុង បានអានរបាយការណ៍សង្ខេប ជូនគណៈអធិបតី អំពីលទ្ធផលការងាររបស់រដ្ឋបាលខេត្តក្នុងអាណត្តិទី ៣ របស់ក្រុមប្រឹក្សាខេត្តកោះកុងកន្លងទៅ។
មានប្រសាសន៍ក្នុងពិធីតែងតាំង ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានថ្លែងថា កិច្ចការជាអាទិភាពបន្តសម្រាប់ក្រុមប្រឹក្សាខេត្តអាណត្តិទី៤ ទី១.ពីការ រៀបចំផែនការអភិវឌ្ឍន៍រយៈពេល ៥ ឆ្នាំនិងកម្មវិធីវិនិយោគ៣ឆ្នាំរំកិល ផ្អែកតាម ច្បាប់ ស្ដីពី ការគ្រប់គ្រងរដ្ឋបាលរាជធានីខេត្ត ក្រុង ស្រុក ខណ្ឌ និងអនុក្រឹត្យលេខ ២១៩ អនក.បក ស្ដីពីផែនការអភិវឌ្ឍន៍ និងកម្មវិធវិនិយោគ៣ឆ្នាំរំកិល រាជធានីខេត្ត ក្រុង ស្រុក ខណ្ឌ បានតម្រូវឲ្យក្រុម ប្រឹក្សាថ្មី ត្រូវរៀបចំនិងអនុម័តផែនការអភិវឌ្ឍន៍រយៈពេល ៥ឆ្នាំ នឹងត្រូវធ្វើបច្ចុប្បន្នភាពជារៀងរាល់ឆ្នាំ តាមការរៀបចំ
កម្មវិធីវិនិយោគ ៣ ឆ្នាំរំកិល។ ដូចនេះក្នុងឆ្នាំទី ១ នៃអាណត្តិរបស់ខ្លួន ក្រុមប្រឹក្សាខេត្តកោះកុង ត្រូវកសាងផែនការអភិវឌ្ឍន៍ដែលមានសុពលភាពរយៈពេល ៥ ឆ្នាំ និងត្រូវរៀបចំកម្មវិធីវិនិយោគ៣ឆ្នាំរំកិលសម្រាប់ថ្នាក់រដ្ឋបាលរបស់ខ្លួន ស្របតាមគោលការណ៍ និងនីតិវិធីដែលបានចែងក្នុងច្បាប់ និងលិខិតបទដ្ឋានគតិយុត្តិជាធរមាន ក្នុងការរៀបចំផែនការអភិវឌ្ឍន៍រយៈពេល ៥ឆ្នាំ។
ជាមួយគ្នានេះដែរ ឯកឧត្តម នាយឧត្តម សេនីយ៍ ទៀ សីហា មានប្រសាសន៍ផ្ដាំផ្ញើបន្ថែម ដល់លោកជំទាវអភិបាលខេត្ត និងឯកឧត្តមប្រធានក្រុមគ្រួសារខេត្ត ធ្វើយ៉ាង ណាឱ្យខេត្តកោះកុងមានភាពទាក់ទាញពាក់ព័ន្ធទៅលើវិស័យទេសចរណ៍ និង ពាក់ព័ន្ធវិស័យផ្សេងៗ ធ្វើយ៉ាងណាឱ្យពលរដ្ឋសំណាកស្រុក មកធ្វើការនៅខេត្តកោះកុងបានយូរអង្វែង។
ប្រធានក្រុមប្រឹក្សាខេត្តមានតួនាទីសំខាន់ ណាស់ ក្នុងការដឹកនាំ ជាពិសេស សម្រប សម្រួល ត្រួតពិនិត្យ នៅរាល់កិច្ចការរបស់រដ្ឋបាលខេត្ត ឲ្យបានមុឺងម៉ាត់ និងផ្ទៀងទាត់ ធ្វើយ៉ាងណាដោះស្រាយបញ្ហារបស់បងប្អូនប្រជាពលរដ្ឋឲ្យបានឆាប់រហ័ស និងទាន់ពេល។ កងកម្លាំងប្រដាប់អាវុធ ត្រូវសហការគ្នា ក្នុងការរក្សាសន្តិសុខសណ្ដាប់ធ្នាប់ ជូនបងប្អូនប្រជាពលរដ្ឋឲ្យបានល្អ៕ ដោយ សេន ពិសិដ្ឋ
