(គៀវ)៖ រដ្ឋមន្ត្រីការបរទេសជប៉ុន លោកស្រី Yoko Kamikawa បាននិយាយក្នុងអំឡុងដំណើរទស្សនកិច្ចដ៏គួរឱ្យភ្ញាក់ផ្អើលមួយ ទៅកាន់ទីក្រុងគៀវកាលពីថ្ងៃអាទិត្យ (៧ មករា) ថា ទីក្រុងតូក្យូបានប្តេជ្ញាចិត្តបន្តគាំទ្រអ៊ុយក្រែន ខណៈខួប ២ ឆ្នាំនៃការលុកលុយរបស់ទីក្រុងម៉ូស្គូលើអ៊ុយក្រែនខិតជិតមកដល់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៧ ខែមករា ឆ្នាំ២០២៤។
ក្នុងអំឡុងពេលដំណើរទស្សនកិច្ចក្រៅប្រទេសលើកដំបូងរបស់ខ្លួន ក្នុងឆ្នាំ ២០២៤ លោកស្រី Kamikawa បានធ្វើសន្និសីទសារព័ត៌មានមួយ ជាមួយសមភាគីអ៊ុយក្រែន លោក Dmytro Kuleba នៅឯទីជម្រកគ្រាប់បែកក្នុងទីក្រុងគៀវ ខណៈសំឡេងស៊ីរ៉ែនបានបន្លឺឡើង។ នាឱកាសនោះ លោកស្រីបាននិយាយដូច្នេះថា «ជប៉ុនប្ដេជ្ញាចិត្តគាំទ្រអ៊ុយក្រែនរហូតដល់សន្តិភាពត្រឡប់មកអ៊ុយក្រែនវិញ…ខ្ញុំអាចដឹងអំពីស្ថានការណ៍នៅអ៊ុយក្រែនថាតើវាមានភាពតានតឹងប៉ុណ្ណានៅពេលនេះ»។
ដំណើរទស្សនកិច្ចរបស់លោកស្រី កើតឡើងចំពេលមានការវាយប្រហារកាន់តែខ្លាំងឡើងរវាងភាគីទាំងពីរនៃជម្លោះ។ លោកស្រី Kamikawa ដែលជាភ្ញៀវបរទេសដំបូងដែលមកទស្សនាអ៊ុយក្រែននៅឆ្នាំនេះ បាននិយាយថា «ខ្ញុំថ្កោលទោសយ៉ាងខ្លាំងម្តងទៀត ចំពោះការវាយប្រហារដោយមីស៊ីល និងយន្តហោះដ្រូនរបស់រុស្ស៊ី ជាពិសេសកាលពីថ្ងៃចូលឆ្នាំថ្មី»។
រដ្ឋមន្ត្រីការបរទេសជប៉ុនរូបនេះ ក៏បានប្រកាសថាទីក្រុងតូក្យូ «នឹងបែងចែលប្រាក់ចំនួន ៣៧ លានដុល្លារអាមេរិក ដើម្បីផ្តល់ប្រព័ន្ធស្វែងរកយន្តហោះដ្រូន»។ លោកស្រីបានបន្ថែមថា ប្រទេសជប៉ុនក៏នឹងផ្គត់ផ្គង់ដល់អ៊ុយក្រែនផងដែរ នូវម៉ាស៊ីនភ្លើងចំនួន ៥ ដើម្បីជួយអ៊ុយក្រែនក្នុងរដូវរងារ ខណៈរស្ស៉ីកំពុងបង្កើនការវាយប្រហារ៕
