(ហ្សឺណែវ)៖ យោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី២៨ ខែធ្នូ ឆ្នាំ២០២៣ បានអោយដឹងថា អង្គការសហប្រជាជាតិបាននិយាយនៅថ្ងៃព្រហស្បតិ៍សប្តាហ៍នេះថា ស្ថានភាពសិទ្ធិមនុស្សនៅតំបន់ West Bank កំពុងធ្លាក់ដុនដាបខ្លាំង ហើយបានជំរុញឱ្យអ៊ីស្រាអែល «បញ្ចប់ការសម្លាប់ដោយខុសច្បាប់» ប្រឆាំងនឹងប្រជាជនប៉ាឡេស្ទីន។
របាយការណ៍មួយដែលបានចេញផ្សាយកនៅថ្ងៃព្រហស្បតិ៍នេះ បានអំពាវនាវឱ្យបញ្ឈប់ជាបន្ទាន់ ចំពោះការប្រើប្រាស់អាវុធ និងមធ្យោបាយយោធាក្នុងអំឡុងពេលអនុវត្តច្បាប់ និងបញ្ឈប់ការឃុំខ្លួន តាមអំពើចិត្ត ការធ្វើទុក្ខបុកម្នេញ និងការរើសអើងប្រឆាំងនឹងប្រជាជនប៉ាឡេស្ទីននៅតំបន់ West Bank។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោក Volker Türk បាននិយាយនៅ ក្នុងសេចក្តីថ្លែងការណ៍មួយថា «ការប្រើប្រាស់យុទ្ធសាស្ត្រយោធា និងអាវុធនៅក្នុងបរិបទនៃការ អនុវត្តច្បាប់ ការប្រើប្រាស់កម្លាំងដែលមិនចាំបាច់ ឬមិនសមាមាត្រ និងការអនុវត្តចាប់ទូលំទូលាយ ពេកតាមអំពើចិត្ត និងការរើសអើង បានប៉ះពាល់យ៉ាងធ្ងន់ធ្ងរដល់ប្រជាជនប៉ាឡេស្ទីន»។ លោកបានសង្កត់ធ្ងន់ថា «ភាពតានតឹងនៃអំពើហិង្សា និងការគាបសង្កត់ជាអ្វីដែលយើងមិនធ្លាប់ឃើញក្នុងរយៈពេលជាច្រើនឆ្នាំមកនេះ»។
របាយការណ៍នេះបានលើកឡើងអំពីស្ថានភាពសិទ្ធិមនុស្ស នៅតំបន់ West Bank និង Jerusalem ខាងកើត ដែលអ៊ីស្រាអែលបានដាក់បញ្ចូលតាំងពីថ្ងៃទី ៧ ខែតុលា៕
