(អាប៊ូដាប៊ី)៖ តាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃទី០៦ ខែធ្នូ ឆ្នាំ ២០២៣នេះ បានប្រាប់អោយដឹងថា ប្រព័ន្ធផ្សព្វផ្សាយរដ្ឋនៃប្រទេសអេមីរ៉ាត់អារ៉ាប់រួម (UAE) បានរាយការណ៍ថា ប្រធានាធិបតីរុស្ស៉ី លោក វ្ល៉ាឌីមៀ ពូទីន បានទៅដល់ប្រទេសអេមីរ៉ាត់អារ៉ាប់រួម ហើយនៅថ្ងៃពុធសប្តាហ៍នេះ ក្នុងដំណើរទស្សនកិច្ចដ៏កម្រមួយ ក្រៅពីអតីតសហភាពសូវៀត ខណៈ ដែលទីក្រុងម៉ូស្គូកំពុងស្វែងរកការគាំទ្រឡើងវិញនៅលើឆាកអន្តរជាតិ ។
ទីភ្នាក់ងារសារព័ត៌មានរដ្ឋរុស្ស៉ី RIA Novosti ក៏បានរាយការណ៍នៅលើប្រព័ន្ធផ្សព្វផ្សាយសង្គម របស់ខ្លួនផងដែរថា «យន្តហោះរបស់ពូទីនបានចុះចតនៅទីក្រុង Abu Dhabi» ដោយមានការ ទទួលស្វាគមន៍យ៉ាងកក់ក្តៅពីប្រទេសម្ចាស់ផ្ទះ។
យន្តហោះរបស់ លោក ពូទីន អមដោយយន្តហោះយោធាជាច្រើនគ្រឿងដើម្បីទទួលស្វាគមន៍ ពេលវាចូលដល់ដែនអាកាសអារ៉ាប់រួម។ ប្រធានាធិបតីអារ៉ាប់រួម Sheikh Mohammed បានមកទទួល លោក ពូទីន ខណះទទួលស្វាគមន៍ជាផ្លូវការនៅវិមាន Al Watan។ ក្បួនរថយន្តប្រធានាធិបតីរុស្ស៊ីអមដោយក្រុមឆ្មាំកិត្តិយសជិះសេះអារ៉ាប់ទៀតផង។
ទីភ្នាក់ងារសារព័ត៌មានអេមៀរ៉ាត់អារ៉ាប់រួម (WAM) បានរាយការណ៍ថា ភ្លេងជាតិរបស់ប្រទេសទាំង ពីរត្រូវបានលេង ហើយការបាញ់កាំជ្រួចចំនួន ២១ គ្រាប់ត្រូវបានបាញ់ចេញជាផ្នែកនៃពិធីស្វាគមន៍។ បន្ទាប់មកក៏មានការបង្ហាញ ពីលើអាកាស ដោយគូរលើផ្ទៃមេឃជាពណ៌ទង់ជាតិរុស្ស៊ីផងដែរ៕
