(ហ្សេរុយសាឡឹម)៖ តាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី៨ ខែ តុលា ឆ្នាំ២០២៣ អោយដឹងថា កងកម្លាំងការពារជាតិអ៉ីស្រាអែល បានឱ្យដឹងនៅថ្ងៃអាទិត្យនេះថា កងទ័ពរបស់ខ្លួនបានផ្តាច់ជីវិតជនសកម្មប្រយុទ្ធប៉ាឡេស្ទីន សរុបចំនួន៤០០នាក់ ទាំងនៅភាគខាង ត្បូងអ៉ីស្រាអែល និងនៅតំបន់ Gaza Strip ហើយថែមទាំងចាប់ខ្លួនបានប៉ុន្មាននាក់ទៀតផង ក្នុងការប្រយុទ្ធគ្នាដែលបានចាប់ផ្តើមកាលពីថ្ងៃសៅរ៍ និងកំពុងតែបន្តប្រព្រឹត្តទៅ។
អ្នកនាំពាក្យយោធាអ៉ីស្រាអែល បាននិយាយក្នុងសន្និសីទសារព័ត៌មានថា អ្នកប្រយុទ្ធរបស់ក្រុម ប៉ាឡេស្ទីន Hamas ចំនួនជាង៤០០នាក់ ត្រូវបានសម្លាប់ ក្នុងអំពើហិង្សាដែលកំពុងបន្តប្រព្រឹត្តទៅ នៅភាគខាងត្បូងប្រទេសអ៉ីស្រាអែល និងនៅតំបន់ Gaza ដែលជាមូលដ្ឋានរបស់ក្រុម Hamas។ អំពើហិង្សាថ្មីចុងក្រោយបំផុតនេះ ត្រូវបានចាប់ផ្តើមឡើង ដោយការឆ្មក់វាយប្រហារទ្រង់ទ្រាយធំ សម្បើមពុំធ្លាប់មានរបស់ក្រុម Hamas ទៅលើអ៉ីស្រាអែល កាលពីថ្ងៃសៅរ៍។
បើតាមអ្នកនាំពាក្យខាងលើ បេសកកម្មចម្បងរបស់យោធាអ៉ីស្រាអែល នាពេលនេះ គឺធ្វើយ៉ាងណា ជម្លៀសប្រជាជនទាំងអស់ចេញពីក្រុងនានា ដែលនៅក្បែរព្រំប្រទល់តំបន់ Gaza, បញ្ចប់ការប្រយុទ្ធ គ្នានៅក្នុងទឹកដីអ៉ីស្រាអែល, គ្រប់គ្រងកន្លែងធ្លុះធ្លាយនៃរនាំងសន្តិសុខ ហើយបន្តប្រតិបត្តិការវាយ ប្រហារសងសឹក ទៅលើទីតាំងរបស់ក្រុម Hamas នៅតំបន់ Gaza៕
