(ភ្នំពេញ)៖ នៅព្រឹកថ្ងៃចន្ទ ២រោច ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៥ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញជាអធិបតីភាព ក្នុងពិធីប្រគល់សញ្ញាបត្រ ជូននិស្សិតបញ្ចប់ការសិក្សា ពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ចសរុបជិត ៦ពាន់នាក់។
យោងតាមរបាយការណ៍របស់លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឱ្យដឹងថា និស្សិតជ័យលាភីដែលនឹងត្រូវទទួលសញ្ញាបត្រនេះ មានចំនួនសរុប ៥,៦១០នាក់ (នារី ២.៩៥២នាក់ ត្រូវជា ៥២.៦ភាគរយ)។ ក្នុងនោះ និស្សិតថ្នាក់បរិញ្ញាបត្រ ៥,៤២៣នាក់ (នារី ២,៨៨០នាក់) និងនិស្សិតថ្នាក់បរិញ្ញាបត្រជាន់ខ្ពស់ ១៨៧នាក់ (នារី ៧២នាក់)។
ដោយយោងតាមលទ្ធផលស្ទង់មតិរបស់សាកលវិទ្យាល័យ លោករដ្ឋមន្ត្រីបានឱ្យដឹងថា ក្នុងចំណោមនិស្សិតជ័យលាភី ដែលទទួលសញ្ញាបត្រនេះ មាននិស្សិតប្រមាណ ៩៦.០៦ភាគរយ មានការងារ ធ្វើ។ ក្នុងនោះនិស្សិតថ្នាក់បរិញ្ញាបត្រមាន ៩៦ភាគរយ និងនិស្សិតថ្នាក់បរិញ្ញាបត្រជាន់ខ្ពស់មាន ៩៧.៨៦ភាគរយ។
ការបណ្តុះបណ្តាលធនធានមនុស្ស គឺជាគោលនយោបាយដ៏អាទិភាពនៅក្នុងការដឹកនាំរបស់ សម្តេចតេជោនាយករដ្ឋមន្ត្រី។ ចាប់តាំងពីរំដោះប្រទេសចេញពីរបបប្រល័យពូជសាសន៍ប៉ុលពត ៧ មករា ឆ្នាំ១៩៧៩ សម្តេចតេជោ ហ៊ុន សែន បានប្រឹងប្រែងអស់ពីលទ្ធភាពជំរុញការបណ្តុះបណ្តាល ដើម្បីកសាងឡើងវិញធនធានមនុស្ស ដែលត្រូវបានកាប់សម្លាប់ក្នុងរបបខ្មែរក្រហម។
ទន្ទឹមការដាក់ចេញគោលនយោបាយលើកកម្ពស់ការអប់រំ ប្រឹងប្រែងកសាងសាលា ពង្រាយសាលា ទៅកៀកផ្ទះប្រជាពលរដ្ឋហើយនោះ សម្តេចតេជោមិនដែលនឿយណាយ នឹងការចុះចែកសញ្ញាបត្រ ដើម្បីជាការលើកទឹកចិត្តនិស្សិតបញ្ចប់ការសិក្សានោះឡើយ។
វត្តមានដ៏ខ្ពង់ខ្ពស់របស់សម្តេចតេជោ ក្នុងពិធីប្រគល់សញ្ញាបត្រ គឺជាការផ្តល់នូវថាមពលផ្លូវចិត្ត និងផ្តល់កិត្តិយសដ៏ធំធេងសម្រាប់និស្សិតបញ្ចប់ការសិក្សា បន្ទាប់ពីពួកគេ បានប្រឹងប្រែងមិនសំចៃកម្លាំងជម្នះការលំបាកទាំងឡាយក្នុងពេលសិក្សា។
សូមបញ្ជាក់ថា សាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច ជាគ្រឹះស្ថានអប់រំថ្នាក់ ឧត្តមសិក្សាសាធារណៈដ៏ល្បីឈ្មោះបោះសំឡេងមួយ ស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡា។
សាកលវិទ្យាល័យនេះ បាននិងកំពុងដើរតួនាទីយ៉ាងសំខាន់ ក្នុងការបណ្តុះបណ្តាលធនធានមនុស្ស ផ្នែកច្បាប់ រដ្ឋបាលសាធារណៈ សេដ្ឋកិច្ច និងផ្នែកផ្សេងៗទៀត ដើម្បីបម្រើឱ្យការអភិវឌ្ឍសេដ្ឋកិច្ច និងសង្គមនៅកម្ពុជា។ គិតចាប់ពីឆ្នាំ១៩៨២ ដល់បច្ចុប្បន្ននេះ សិក្ខាកាម និងនិស្សិតដែលបាន បញ្ចប់ការសិក្សាជាស្ថាពរសរុប ៦៦,៨០៦នាក់ (នារី ២៦,៤៤៩នាក់ ត្រូវជា ៣៩.៥ភាគរយ) ក្នុងនោះនិស្សិតបរទេសមានចំនួន ២២៦នាក់ (នារី ៩៦នាក់ ត្រូវជា ៤២.៤ភាគរយ)។
និស្សិតជ័យលាភីទាំងនោះកំពុងបម្រើការងារនៅក្នុងក្រសួង ស្ថាប័នរដ្ឋ វិស័យឯកជន អង្គការមិន មែនរដ្ឋាភិបាលជាតិនិងអន្តរជាតិ និងខ្លះទៀតកំពុងប្រកបអាជីវកម្មផ្ទាល់ខ្លួន ប្រកបដោយសមត្ថភាព សេចក្តីថ្លៃថ្នូរ និងកិត្តិយស។ បច្ចុប្បន្ននេះ សាកលវិទ្យាល័យមានក្រុមប្រឹក្សាភិបាល គណៈគ្រប់គ្រង មន្រ្តី បុគ្គលិក សាស្រ្តាចារ្យ ក្របខណ្ឌ និងជាប់កិច្ចសន្យាជាតិ-អន្តរជាតិសរុប ៧៤៦នាក់ (នារី ១៧៩នាក់ ត្រូវជា ២៤ភាគរយ) និងមាននិស្សិតកំពុងបណ្តុះបណ្តាលសរុប ១៨,១១៣នាក់ (នារី ៩,៣៩៤នាក់ ត្រូវជា ៥១.៨ភាគរយ) ក្នុងនោះមាននិស្សិតបរទេសចំនួន ៥៥នាក់ នារី ៣២នាក់ ដែលរួមមាន៖ ជនជាតិបារាំង ណូវែលសេឡង់ តួគី កូរ៉េ ចិន ហុងកុង វៀតណាម ថៃ និងឡាវ។
ដើម្បីធានាបានការបណ្តុះបណ្តាលប្រកបដោយគុណភាព និងនិរន្តរភាព សាកលវិទ្យាល័យបាន អនុវត្តយន្តការធានាគុណភាពអប់រំ ជាពិសេសបានពង្រឹងប្រព័ន្ធវាយតម្លៃគុណភាពអប់រំជាប្រចាំ ដោយអនុវត្តតាមស្តង់ដាធានាគុណភាពអប់រំ និងកំពុងធ្វើកិច្ចសហប្រតិបត្តិការជាមួយបណ្តា សាកលវិទ្យាល័យបរទេស នៃបណ្តាប្រទេសមួយចំនួន តាមរយៈការចុះអនុស្សារណៈនៃការយោគ យល់គ្នាបានចំនួន៤៦ ដើម្បីធ្វើការផ្លាស់ប្តូរ បទពិសោធន៍និស្សិត និងសាស្រ្តាចារ្យលើការសិក្សា ការបង្រៀន និងការស្រាវជ្រាវ ក្នុងគោលបំណងលើកកម្ពស់គុណភាពអប់រំឲ្យកាន់តែល្អប្រសើរ។
ចាប់តាំងពីឆ្នាំ១៩៩៣ ដល់បច្ចុប្បន្ន សាកលវិទ្យាល័យបានបញ្ជូននិស្សិតទៅសិក្សាបន្តថ្នាក់បរិញ្ញា បត្រជាន់ខ្ពស់ និងថ្នាក់បណ្ឌិតនៅបរទេស តាមរយៈអាហារូបករណ៍របស់សាកលវិទ្យាល័យជា ដៃគូនានាបានចំនួន ១,៧៩៩នាក់។
ក្នុងឆ្នាំសិក្សា២០២២-២០២៣ នេះ សាកលវិទ្យាល័យបានបញ្ជូននិស្សិតចំនួន ៦៤នាក់ (នារី ៣៩នាក់) ទៅបន្តការសិក្សានៅបរទេស ក្នុងនោះថ្នាក់បណ្ឌិតចំនួន ១នាក់ ទៅសិក្សាផ្នែកសេដ្ឋកិច្ច នៅប្រទេសបារាំង និងថ្នាក់បរិញ្ញាបត្រជាន់ខ្ពស់ ៣៣នាក់ (នារី ២០នាក់) ទៅសិក្សាផ្នែកនីតិសាស្រ្ត និងសេដ្ឋកិច្ចនៅប្រទេសបារាំង ស៊ុយអែត អូស្រ្តាលី អាឡឺម៉ង់ ជប៉ុន និងកូរ៉េ និងបានបញ្ជូននិស្សិត ចូលរួមក្នុងកម្មវិធីផ្លាស់ប្តូរការសិក្សាចំនួន ៣០នាក់ (នារី ១៨នាក់) នៅប្រទេសបារាំង ជប៉ុន ចិន និងឥណ្ឌូនេស៊ី។
ក្រៅពីនេះ និស្សិតចំនួន ២២រូប បានចូលរួមការប្រកួតសវនការប្រឌិតអន្តរជាតិ ដោយផ្ទាល់ចំនួន ៦ក្រុម ពាក់ព័ន្ធនឹងនីតិអន្តរជាតិ ដែលរៀបចំឡើងដោយប្រទេសអាមេរិក អូទ្រីស ឥណ្ឌា ហុងកុង និងអាល់បានៀ។ នៅពាក់កណ្តាលឆ្នាំ២០២៣ ខាងមុខនេះ សាកលវិទ្យាល័យត្រៀមនឹងបញ្ជូន និស្សិតចំនួន ១២រូប ទៅចូលរួមការប្រកួតសវនការប្រឌិតអន្តរជាតិចំនួន៤ប្រកួត នៅប្រទេសហូឡង់ អាឡឺម៉ង់ និងឥណ្ឌា៕
