(ភ្នំពេញ)៖ នៅព្រឹកថ្ងៃសៅរ៍ ១៥កើត ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា អញ្ជើញជួបសំណេះសំណាលជាមួយកម្មករ និយោជិតសរុបជិត ២ម៉ឺននាក់ មកពីរោងចក្រ សហគ្រាសនានា នៅក្នុងខេត្តកណ្តាល កំពង់ស្ពឺ និងកំពង់ឆ្នាំង។ ជំនួបសំណេះសំណាលធ្វើឡើងនៅក្នុងសួនឧស្សាហកម្មខេមតុន (CAMTON INDUSTRIAL PARK)។
លោក អ៉ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា សម្តេចតេជោនាយករដ្ឋមន្តី ធ្លាប់បានអញ្ជើញជួបជាមួយកម្មករ និយោជិត នៅឃុំផ្សារដែក ស្រុកពញាឮ ខេត្តកណ្តាល មួយដងរួចមកហើយកាលពីឆ្នាំ២០១៨ ដែលមាន កម្មករ និយោជិតចូលរួមចំនួន ១៥,៦០៦នាក់ មកពី ២២រោងចក្រ នៅក្នុងខេត្ត កណ្តាល។
លោក អ៉ិត សំហេង ក៏បានឱ្យដឹងថា ក្នុងជំនួបសំណេះសំណាលនៅថ្ងៃស្អែកនេះ មានកម្មករ និយោជិតសរុបចំនួន ១៧,៣០៧នាក់ មកពីរោងចក្រ សហគ្រាស ចំនួន ១៩ ក្នុងនោះ មកពីសួនឧស្សាហកម្មខេមតុន និងតំបន់ផ្សេងទៀតនៃខេត្តកណ្តាលចំនួន ១៣រោងចក្រ ដែលមានកម្មករនិយោជិតចំនួន ៩,៤៦៨នាក់, ខេត្តកំពង់ស្ពឺ ចំនួន ៤រោងចក្រ ដែលមានកម្មករនិយោជិតសរុប ១,៥៦៥នាក់, និងខេត្តកំពង់ឆ្នាំង ចំនួន ២រោងចក្រ ដែលមានកម្មករនិយោជិតសរុប ៦,២៧៤នាក់។
លោករដ្ឋមន្ត្រី បានឱ្យដឹងទៀតថា សួនឧស្សាហ៍កម្មខេមតុន ត្រូវបានបង្កើតឡើងនៅថ្ងៃទី២ ខែកញ្ញា ឆ្នាំ២០២១ មានទំហំផ្ទៃដី ១៩ហិកតា បានបោះទុនវិនិយោគចំនួន ៨លានដុល្លារអាមេរិក ដែលមានរោងចក្រកាត់ដេរសម្លៀកបំពាក់ចំនួន២ កំពុងដំណើរការ គឺរោងចក្រ ផៅវ៉រ៉ហ៊្វុល រីចឈីស ហ្គាម៉ិន (ខេមបូឌា) ឯ.ក (Powerful Riches Garment (Cambodia) Co., LTD) និងរោងចក្រវាយអ៊ុន ធិច ឯ.ក (YNTEX CO., LTD) និងមានកម្មករនិយោជិតសរុប ចំនួន ២,៨៣៣នាក់។
ដោយឡែករោងចក្រ សហគ្រាស ចំនួន ១៧ ផ្សេងទៀត ជាប្រភេទរោងចក្រកាត់ដេរសម្លៀកបំពាក់ចំនួន៨, ផលិតផលិតផលធ្វើដំណើរនិងកាបូបចំនួន៥, ផលិត និងផ្ដុំ ដំឡើងបន្ទះសូឡាចំនួន ២ និងផលិតស្បែកជើងចំនួន២។ ផលិតផលរបស់រោងចក្រទាំងនេះ គឺនាំចេញទៅទីផ្សារអន្តរជាតិ ជាពិសេសសហគមន៍អឺរ៉ុប សហរដ្ឋអាមេរិក ប្រទេសកាណាដា ប្រទេសជប៉ុន ។ល។
បើតាមលោករដ្ឋមន្ត្រី នៅឆ្នាំ២០២៣ រោងចក្រកាត់ដេរនៅខេត្តកណ្តាល, ខេត្តកំពង់ស្ពឺ និងខេត្តកំពង់ឆ្នាំង សរុបចំនួន ៣៨២រោងចក្រ មានកម្មករនិយោជិតសរុប ៣៣ម៉ឺននាក់ ក្នុងនោះខេត្តកណ្តាល មាន ១៧១រោងចក្រ ដែលមានកម្មករនិយោជិតសរុប ១៣ម៉ឺននាក់, ខេត្តកំពង់ស្ពឺ មាន ១៩១រោងចក្រ ដែលមានកម្មករនិយោជិតសរុប ១៥ម៉ឺននាក់ និងខេត្តកំពង់ឆ្នាំង មាន ២០រោងចក្រ ដែលមានកម្មករនិយោជិតសរុប ៥ម៉ឺននាក់។
ក្រោមការដឹកនាំរបស់សម្ដេចតេជោនាយករដ្ឋមន្ត្រី ប្រទេសកម្ពុជាបន្តរក្សា បានសន្តិភាព ស្ថិរភាព និងអភិវឌ្ឍលើគ្រប់វិស័យ សង្គម និងសេដ្ឋកិច្ចជាតិបន្តមានការរីកចម្រើនគួរជាទីមោទនៈ។ សេដ្ឋកិច្ចកម្ពុជា បានកើនឡើងជាមធ្យមក្នុងអត្រា ៧ភាគរយ ជាងពីរទស្សវត្សរ៍ លើកលែងតែក្នុងអំឡុងដំណាក់កាលន ការរីករាលដាលជំងឺកូវីដ-១៩ ស្ថានភាពទីផ្សារការងារនៅកម្ពុជាមានភាពរឹងមាំដោយរក្សាបាននូវអត្រាមានការងារធ្វើខ្ពស់ប្រមាណ ៩៩,៣ភាគរយ នៃកម្លាំងពលកម្មសរុបចំនួនប្រមាណ ១០,៨លាននាក់។
បច្ចុប្បន្នសហគ្រាស គ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីនៅក្រសួងការងារ និងបណ្តុះបណ្តាលវិជ្ជាជីវៈ មានចំនួន ១៧,២៥៦សហគ្រាស ដែលមានកម្មករ និយោជិតចំនួន ១,៥លាននាក់។ នៅឆ្នាំ១៩៩៧ រោងចក្រ សហគ្រាសវិស័យកាត់ដេរ មានចំនួនត្រឹមតែ៦៤ ដែលមានកម្មករនិយោជិត ប្រមាណ ៨ម៉ឺននាក់ ការនាំចេញមានចំនួន ២២៧លានដុល្លារអាម៉េរិក។
នៅឆ្នាំ២០២៣ នេះ រោងចក្រវិស័យកាត់ដេរ បានកើនដល់ចំនួន ១,៣២៦ ដែលមានកម្មករនិយោជិតចំនួនប្រមាណ
នៅឆ្នាំ២០២៣ នេះ រោងចក្រវិស័យកាត់ដេរ បានកើនដល់ចំនួន ១,៣២៦ ដែលមានកម្មករនិយោជិតចំនួនប្រមាណ ៨៤ម៉ឺននាក់ (ស្រី ៦៦ម៉ឺននាក់) ការនាំចេញមានរហូតដល់ប្រមាណ ១៣ពាន់លានដុល្លារអាម៉េរិក (ឆ្នាំ២០២២) ដែលក្នុងនោះ នៅរាជធានីភ្នំពេញមានចំនួន ៧២៧រោងចក្រ មានកម្មករនិយោជិតចំនួនប្រមាណ ៣៤ម៉ឺននាក់ (ស្រី ២៦ម៉ឺននាក់)។
បើសរុបនៅត្រឹមឆ្នាំ២០២៣ នេះ រោងចក្រសហគ្រាស មានចំនួនសរុបជាង ១៧, ០០០ ដែលប្រើប្រាស់កម្លាំងពលកម្មសរុបចំនួនប្រមាណ ១,៥លាននាក់។
ដើម្បីបន្តជំរុញកំណើនសេដ្ឋកិច្ច វិនិយោគ និងឱកាសការងារនិងមុខរបរ ឱ្យកាន់តែប្រសើរឡើង ចាប់តាំងពីថ្ងៃអាទិត្យ ទី២០ ខែសីហា ឆ្នាំ២០១៧ ដល់ថ្ងៃទី១ ខែឧសភា ឆ្នាំ២០១៩ សម្តេចតេជោ បានជួបសំណេះសំណាលជុំទី១ ជាមួយកម្មករនិយោជិតចំនួន ៧៧លើក ដែលមានកម្មករនិយោជិតចំនួនប្រមាណ ១លាននាក់ និងបានផ្តល់អនុសាសន៍ចំនួន ១០ចំណុច។
ប៉ុន្តែដោយសារវិបត្តិជំងឺកូវីដ-១៩ ការសំណេះសំណាលត្រូវបានផ្អាករហូតដល់ថ្ងៃទី២២ ខែឧសភា ឆ្នាំ២០២៣ កន្លងទៅ សម្ដេចតេជោ បានចុះសំណេះសំណាលជុំទី២ ហើយមកដល់ថ្ងៃស្អែកនេះ បានចំនួន ៤លើក ដែលមានកម្មករនិយោជិតសរុបចំនួនប្រមាណ ៧ម៉ឺន ៩ពាន់នាក់ និងនៅសល់កម្មវិធីបន្តចំនួន ១៥លើកទៀត ដែលនឹងជួបកម្មករនិយោជិតសរុបប្រមាណ ២៦ម៉ឺននាក់ទៀត៕
