(វ៉ាស៉ីនតោន)៖ តាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃសុក្រ ទី៥ ខែ ឧសភា ឆ្នាំ២០២៣ បានប្រាប់អោយដឹងថា កាលពីថ្ងៃព្រហស្បតិ៍សប្តាហ៍នេះ ប្រធានាធិបតីហ្វីលីពីន លោក ហ្វឺឌីណាន់ ម៉ាកូស ចេអរ (Ferdinand Marcos Jr) បាននិយាយថា ការអនុញ្ញាតឱ្យសហរដ្ឋ អាមេរិកប្រើប្រាស់ មូលដ្ឋានយោធារបស់ប្រទេសហ្វីលីពីន គឺជាចំណាត់ការការពារមួយ ដែលអាចនឹងមានប្រយោជន៍ ប្រសិនបើចិនវាយប្រហារលើតៃវ៉ាន់។
ថ្លែងនៅចុងបញ្ចប់នៃដំណើរទស្សនកិច្ចរយៈពេល៤ថ្ងៃ ក្នុងទីក្រុងវ៉ាស៉ីនតោន ដែលរួមមាននូវកិច្ច ប្រជុំកំពូលជាមួយប្រធានាធិបតីអាមេរិក លោក ចូ បៃដិន ព្រមទាំងការធ្វើបច្ចុប្បន្នភាពលើសន្ធិសញ្ញា ការពារជាតិ ដែលមានរយៈពេលជាង៧០ឆ្នាំរបស់ប្រទេសទាំងពីរផងដែរនោះ លោក ម៉ាកូស មិន បានឆ្លើយតបដោយចំៗឡើយ នៅពេលត្រូវបានសាកសួរថា តើសហរដ្ឋអាមេរិកអាចនឹងដាក់ ពង្រាយសព្វាវុធ នៅតាមមូលដ្ឋានហ្វីលីពីនឬទេ ប្រសិនបើចិនសម្រេចបើកការវាយប្រហារលើ តៃវ៉ាន់។
ក្នុងបទសម្ភាសន៍ជាមួយទីភ្នាក់ងារព័ត៌មាន Reuters លោកប្រធានាធិបតីហ្វីលីពីន បាននិយាយថា កិច្ចព្រមព្រមព្រៀង EDCA ស្តីពីការផ្តល់សិទ្ធិប្រើប្រាស់មូលដ្ឋានយោធា ឱ្យកងទ័ពអាមេរិក កាលពី ឆ្នាំ២០១៤ គឺត្រូវបានបង្កើតឡើងដំបូងក្នុងគោលបំណងពង្រឹងសមត្ថភាពឆ្លើយតប ចំពោះគ្រោះ មហន្តរាយតែប៉ុណ្ណោះ។
លោក ម៉ាកូស បាននិយាយដូច្នេះថា «ប៉ុន្តែឥឡូវគឺមានចំណុចបន្ថែមមួយទៀត ពាក់ព័ន្ធកិច្ចព្រម ព្រៀងនេះ នោះគឺភាពតានតឹងនៅតំបន់ច្រកសមុទ្រតៃវ៉ាន់ ដែលហាក់កំពុងតែបន្តកើនឡើង។ ហេតុដូច្នេះហើយ សុវត្ថិភាពរបស់ប្រជាជនហ្វីលីពីនយើងនៅឯកោះតៃវ៉ាន់ បានក្លាយជារឿងដ៏សំខាន់ បំផុត។ ម៉្យាងវិញទៀត មូលដ្ឋាន EDCA ទាំងនេះ ក៏នឹងអាចផ្តល់ប្រយោជន៍សម្រាប់យើងផងដែរ ប្រសិនបើហេតុការណ៍អាក្រក់កើតឡើង» ដោយលោកចង់សំដៅលើការវាយប្រហាររបស់ចិនទៅលើតៃវ៉ាន់៕
