ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី១៦ ខែមីនា ឆ្នាំ២០២៣នេះ បានប្រើប្រាស់វេទិកាសាធារណៈ ណែនាំដល់បណ្តារដ្ឋមន្ត្រីគ្រប់ក្រសួងស្ថាប័ន ត្រូវពិនិត្យឱ្យបាន ច្បាស់លាស់ លើលិខិតរបស់ខ្លួន ទាំងអក្ខរាវិរុទ្ធ និងការចុះថ្ងៃខែ មុននឹងចុះហត្ថលេខា បញ្ជូនចូល មកសម្តេចដើម្បីពិនិត្យ និងសម្រេច។
សម្តេចតេជោ ហ៊ុន សែន បានលើកឡើងថា តាមការកត់សម្គាល់មានតែរដ្ឋមន្ត្រីក្រសួងចំនួន៤ ដែលធ្វើការងារបានល្អ ពាក់ព័ន្ធនឹងការលិខិតចូលមកសម្តេច ក្នុងនោះរួមមានក្រសួងមហាផ្ទៃ, ក្រសួងសេដ្ឋកិច្ច និងហិរញ្ញវត្ថុ, ក្រសួងវប្បធម៌ និងវិចិត្រសិល្បៈ និង ក្រសួងទំនាក់ទំនងជាមួយ រដ្ឋសភា-ព្រឹទ្ធសភា និងអធិការកិច្ច ដោយធ្វើលិខិតមានខ្លឹមសារខ្លី មិនវែងឆ្ងាយ ហើយមានដាក់នូវ ជម្រើសសម្រាប់ ការសម្រេចចិត្តថែមទៀតផង។សម្តេចតេជោ ហ៊ុន សែន បានរំលឹកពីភាពខុសឆ្គង នៃការធ្វើលិខិតពាក់ព័ន្ធសំណើវិនិយោគថ្មម៉ាត នៅកំពង់ស្ពឺ របស់ទីស្តីការគណៈរដ្ឋមន្ត្រី ដោយ សម្តេចលើកឡើងថា លិខិតដើមរបស់ក្រសួងរ៉ែ និងថាមពល ដាក់ចូលតាមទីស្តីការគណៈរដ្ឋមន្ត្រី ដោយគ្រាន់តែរាយកាណ៍ ពីវឌ្ឍនភាពក្រុមហ៊ុន ដែលទទួលបានសិទ្ធិវិនិយោគប៉ុណ្ណោះ តែបែរជា លិខិតទីស្តីការគណៈរដ្ឋមន្ត្រី ដាក់ចូលទៅសម្តេច ស្នើសុំមតិដឹកនាំទៅវិញ។
សម្តេចតេជោ ហ៊ុន សែន បានបញ្ជាក់ថា សម្តេចផ្តល់អាទិភាពឲ្យតែក្រសួងចំនួន៤ ប៉ុណ្ណោះដែល អាចដាក់លិខិតត្រង់ទៅសម្តេច គឺក្រសួងមហាផ្ទៃ ក្រសួងការពារជាតិ ក្រសួងសេដ្ឋកិច្ច និងហិរញ្ញវត្ថុ និងក្រសួងការបរទេស និងសហប្រតិបត្តិការអន្តរជាតិ ហើយក្រៅពីក្រសួងទាំង៤នោះ គឺត្រូវដាក់ លិខិតតាម ទីស្តីការគណៈរដ្ឋមន្ត្រី មុននឹងបញ្ជូនទៅដល់សម្តេច។
សម្តេចតេជោ ជំរុញឲ្យបណ្តាថ្នាក់ដឹកនាំ តាមបណ្តាក្រសួងស្ថាប័ន ទាំងថ្នាក់ជាតិ និងថ្នាក់ក្រោមជាតិ បើមិនចេះពីការធ្វើលិខិតស្នាម ត្រូវខិតខំរៀនសូត្របន្ថែម កុំខ្មាសអៀន ទោះខ្លួនជាប់ថ្នាក់បណ្ឌិត រួចហើយក្តី។
ការថ្លែងរបស់សម្តេចតេជោ ហ៊ុន សែន ធ្វើឡើងក្នុងឱកាសអញ្ជើញចែកសញ្ញាបត្រ ជូននិស្សិតសាកលវិទ្យាល័យបៀលប្រាយជាង ៤ពាន់នាក់ នាព្រឹកថ្ងៃទី១៦ ខែមីនា ឆ្នាំ២០២៣។
សម្តេចតេជោ ហ៊ុន សែន បានថ្លែងយ៉ាងដូច្នេះថា «ប៊ិចក្រហមរបស់ខ្ញុំទៅច្រើនណាស់ តែវានៅ តែដដែល ក្រែងមិនបានទៅដល់រដ្ឋមន្ត្រី ខ្ញុំសុំអង្វរក ឲ្យលោករដ្ឋមន្ត្រីទាំងឡាយ មុនចុះហត្ថលេខា មើលឲ្យច្បាស់មើល ទាំងពីអក្ខរាវិរុទ្ធ ទាំងពីស្អីៗ លិខិតត្រូវផ្ញើមកនាយករដ្ឋមន្ត្រី មិនមែនផ្ញើទៅណាទេ ទោះបីផ្ញើទៅណាក៏ដោយ ខ្លួនឋានៈរដ្ឋមន្ត្រី ត្រូវធ្វើឲ្យច្បាស់»។
សម្តេចតេជោនាយករដ្ឋមន្ត្រីបន្ថែមថា «ពេលបានឡើងធ្វើរដ្ឋមន្ត្រីកុំខ្ជិល ឡើងធ្វើចៅហ្វាយខេត្តកុំ ខ្ជិល ធ្វើមេនេះ មេនោះកុំខ្ជិល រៀនទៅ រៀនសួរគេ ទៅកុំខ្ចាសអៀនអី ខ្ញុំសុំស្នើឲ្យពិនិត្យឡើងវិញ»។
សម្តេតេជោ ហ៊ុន សែន បានព្រមានផងដែរថា ធ្វើជារដ្ឋមន្ត្រីកុំខ្ជិល ដោយសារតែសល់ប៉ុន្មានខែ ទៀតប៉ុណ្ណោះនឹងបញ្ចប់អាណត្តិទី៦។ ជាមួយគ្នានេះ សម្តេចក៏បានព្រមានបង្ហោះជាសាធារណៈ នូវលិខិតរបស់រដ្ឋមន្ត្រីណាដែលខ្ជីខ្ជា បើសិនទទួលបានកែណែនាំពីសម្តេចរួចហើយ នៅតែប្រព្រឹត្ត កំហុសដដែលជាដដែលនោះ៕
