(តូក្យូ)៖ តាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី៨ ខែកុម្ភៈ ឆ្នាំ២០២៣ បានប្រាប់អោយដឹងថា ប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជូនៀ (Ferdinand Marcos Jr) បានចាប់ផ្តើមដំណើរបំពេញទស្សនកិច្ចរបស់លោក ទៅកាន់ប្រទេសជប៉ុន នៅថ្ងៃពុធ នេះ ខណៈវាត្រូវបានរំពឹងថានឹងជួយត្រួសត្រាយផ្លូវ សម្រាប់ការរឹតបន្តឹងចំណងទាក់ទង ផ្នែកសន្តិ សុខជាមួយទីក្រុងតូក្យូ ឱ្យកាន់តែជិតស្និទ្ធជាងមុន ស្របពេលដែលទីក្រុងម៉ានីល កំពុងឈរនៅខាង សហរដ្ឋអាមេរិកកាន់តែខ្លាំង ក្នុងការប្រជែងឥទ្ធិពលរវាងទីក្រុងវ៉ាស៉ីនតោន និងទីក្រុងប៉េកាំង។
លោក ម៉ាកូស និងនាយករដ្ឋមន្រ្តីជប៉ុន លោក ហ្វូមីអុ គីស៉ីដា ត្រូវគេរំពឹងថានឹងពង្រឹងកិច្ចសហ ប្រតិបត្តិការ ឱ្យកាន់តែស៊ីជម្រៅ ក្នុងផ្នែកជួយសង្រ្គោះគ្រោះមហន្តរាយ ដែលអាចជាជំហានដំបូង ដើម្បីឆ្ពោះទៅបង្កើត ក្របខណ្ឌច្បាប់ទូលំទូលាយមួយ ដែលនឹងអនុញ្ញាតឱ្យកងកម្លាំងជប៉ុន អាចត្រូវ ដាក់ពង្រាយទៅកាន់ហ្វីលីពីន បានងាយស្រួលជាងមុន។ ប្រភពពីក្រសួងការពារជាតិជប៉ុន បាន បង្ហើបឱ្យដឹងថា «ខណៈដែលសហរដ្ឋអាមេរិកកំពុងតែពង្រឹងទំនាក់ទំនង ឱ្យកាន់តែស៉ីជម្រៅជាមួយ ហ្វីលីពីន វាគឺជារឿងសំខាន់ខ្លាំងណាស់ សម្រាប់សន្តិសុខក្នុងតំបន់ ប្រសិនបើជប៉ុនចូលរួម»។
គួរបញ្ជាក់ថា ដំណើរទស្សនកិច្ចរបស់លោក ម៉ាកូស នៅទីក្រុងតូក្យូ នឹងមានរយៈពេលសរុប៥ថ្ងៃ គឺបញ្ចប់នៅថ្ងៃទី១២ ខែកុម្ភៈ ហើយវាជាទស្សនកិច្ចលើកដំបូង របស់លោកនៅប្រទេសជប៉ុន ចាប់ តាំងពីការឡើងកាន់អំណាច កាលពីខែកក្កដា ឆ្នាំ២០២២មក។ កាលពីសប្តាហ៍មុន ទីក្រុងម៉ានីល ទើបតែបានចុះហត្ថលេខាលើកិច្ចព្រមព្រៀង ដែលសំដៅអនុញ្ញាតឱ្យទីក្រុងវ៉ាស៉ីនតោន អាចប្រើ ប្រាស់មូលដ្ឋានទ័ពរបស់ខ្លួនចំនួន ៤កន្លែងបន្ថែមទៀត៕
