(តេអេរ៉ង់)៖ យោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអាទិត្យ ទី២៩ ខែមករា ឆ្នាំ២០២៣ បញ្ជាក់ថា ប្រព័ន្ធផ្សព្វផ្សាយរដ្ឋរបស់អ៊ីរ៉ង់បានរាយការណ៍ឲ្យដឹងនៅថ្ងៃអាទិត្យនេះថា ការផ្ទុះដ៏ធំមួយនៅរោងចក្រផលិតគ្រាប់រំសេវ នៅកណ្តាលទីក្រុង Isfahan គឺបណ្តាលមកពី ការវាយប្រហារដោយយន្តហោះគ្មានមនុស្សបើក។
ភ្លាមៗមិនមានការអះអាងពីការទទួលខុសត្រូវចំពោះការបំផ្ទុះ ដែលបានកើតឡើង ចំពេលមានភាព តានតឹងខ្លាំង ជាមួយបណ្តាប្រទេសលោកខាងលិចជុំវិញកម្មវិធីនុយក្លេអ៊ែរ និងការផ្គត់ផ្គង់អាវុធដល់ រុស្ស៉ីសម្រាប់សង្គ្រាមនៅអ៊ុយក្រែនក៏ដូចជាបាតុកម្មប្រឆាំងនឹងរដ្ឋាភិបាលអស់ជាច្រើនខែមកនេះនោះទេ។
ទំហំនៃការខូចខាតក៏នៅមិនទាន់អាចបញ្ជាក់ឲ្យបានច្បាស់លាស់នោះដែរ ខណៈក្រសួងការពារ ជាតិអ៊ីរ៉ង់បានត្រឹមគូសបញ្ជាក់ថា ការផ្ទុះនេះបណ្តាលឱ្យមានការខូចខាតតិចតួចប៉ុណ្ណោះ ហើយមិន មានអ្នករងរបួសនោះទេ។
គួរបញ្ជាក់ថា កាលពីខែកក្កដា អ៊ីរ៉ង់បានប្រកាសពីការចាប់ខ្លួនក្រុមបំផ្លិចបំផ្លាញមួយ ដែលមានសមាសភាពពីក្រុមសកម្មប្រយុទ្ធឃឺដ ដែលធ្វើការឲ្យអ៊ីស្រាអែល។ យោងតាមរបាយការណ៍ អ្នកដែលត្រូវបានចាប់ខ្លួន គ្រោងនឹងបំផ្ទុះមជ្ឈមណ្ឌលឧស្សាហកម្មការពារជាតិនៅទីក្រុង Isfahan ។ ក្នុងរយៈពេលប៉ុន្មានឆ្នាំចុងក្រោយនេះ មានការបំផ្ទុះ និងការបាញ់ជាច្រើនករណីនៅជុំវិញរោង ចក្រយោធារបស់អ៊ីរ៉ង់។ នៅឆ្នាំ២០២១ អ៊ីរ៉ង់បានចោទប្រកាន់អ៊ីស្រាអែលថា បានបំផ្លាញរោងចក្រ នុយក្លេអ៊ែរ Natanz ដ៏សំខាន់របស់ខ្លួន ហើយបានប្តេជ្ញាសងសឹកចំពោះការវាយប្រហារនេះ៕
