(បាងកក)៖ តុលាការនៅប្រទេសថៃ បានសម្រេចផ្តន្ទាទោសលើបុរសម្នាក់ ឱ្យជាប់ពន្ធនាគាររយៈពេល២៨ឆ្នាំ ដោយសារតែការប្រមាថព្រះមហាក្សត្រថៃ តាមរយៈការបង្ហោះសារលើប្រព័ន្ធអ៉ីនធើណិត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី២៧ ខែមករា ឆ្នាំ២០២៣។ ច្បាប់ស្តីពីការប្រមាថព្រះមហាក្សត្ររបស់ប្រទេសថៃ គឺមានលក្ខណៈតឹងរ៉ឹងខ្លាំងជាទីបំផុត ដោយបទល្មើសនីមួយៗអាចប្រឈមការជាប់ពន្ធនាគារជាអតិបរមារហូតដល់១៥ឆ្នាំ។ បុរសខាងលើដែលមានឈ្មោះ មង្គល ទីរ៉ាកុត អាយុ២៩ឆ្នាំ ដែលមានមុខរបរជាអ្នកលក់សម្លៀកបំពាក់តាមអនឡាញ ត្រូវបានតុលាការនៅទីក្រុងឆៀងរ៉ាយ ភាគខាងជើងប្រទេសថៃ រកឃើញថាពិតជាមានទោស ក្នុងបទល្មើសប្រមាថព្រះមហាក្សត្រ ចំនួន២ករណីដាច់ដោយឡែកពីគ្នា។ បើតាមមេធាវីរបស់លោកផ្ទាល់ តាមពិតទៅពីមកដំបូងឡើយ លោក មង្គល គឺត្រូវជាប់ពន្ធនាគារសរុបរហូតដល់៤២ឆ្នាំ ប៉ុន្តែតុលាការបានសម្រេចបន្ថយរយៈពេលមកត្រឹម២៨ឆ្នាំវិញ ក្រោយការផ្តល់សក្ខីកម្មរបស់លោក។ មេធាវីដដែលបានបន្ថែមថា លោក មង្គល គ្រោងប្តឹងឧទ្ធរណ៍ប្រឆាំងនឹងសាលក្រមនេះ ខណៈតុលាការបានអនុញ្ញាតឱ្យរូបលោក អាចនៅក្រៅឃុំជាបណ្តោះអាសន្ន ជាមួយថវិកាតម្កល់ ៣០០,០០០បាត ឬស្មើនឹងជិត១០,០០០ដុល្លារ។ មិនតែប៉ុណ្ណោះ លោក មង្គល ក៏ប្រឈមនឹងបទចោទប្រកាន់ទី៣ ដាច់ដោយឡែកមួយទៀតផងដែរ ពាក់ព័ន្ធការប្រមាថព្រះមហាក្សត្រ ជុំវិញការបង្ហោះសារអនឡាញ កាលពីឆ្នាំមុន ហើយនឹងត្រឡប់ទៅបង្ហាញវត្តមានក្នុងតុលាការ សាជាថ្មីនៅខែមីនា។ បើតាមអង្គការសិទ្ធិមនុស្ស ទោសជាប់ពន្ធនាគារ២៨ឆ្នាំរបស់លោក គឺមានរយៈពេលយូរជាងគេលំដាប់ទី២ សម្រាប់សំណុំរឿងប្រមាថព្រះមហាក្សត្រនៅក្នុងប្រទេសថៃ៕
