(កំពង់ធំ)៖ សាលាបឋមសិក្សាឯក អេម សង់ឃ្លាំង ទទួលបានអគារសិក្សាថ្មីមួយខ្នង៣បន្ទប់ ជាអំ ណោយរបស់លោក ជា ចាន់តូ សមាជិកអចិន្ត្រៃយ៍គណៈកម្មាធិការកណ្តាល គណបក្សប្រជាជន កម្ពុជា និងជាប្រធានក្រុមការងារថ្នាក់កណ្តាល ចុះជួយខេត្តកំពង់ធំ និងលោកស្រី ខៀវ ស៊ីណា បន្ទាប់ពី ឯកឧត្តម បានមើលឃើញពីការខ្វះខាតថ្នាក់ សម្រាប់ការសិក្សារបស់សិស្សនុសិស្ស នៅ ទីនោះ។
អគារថ្មីមួយខ្នង៣បន្ទប់ដែលបានផ្ដល់ជូន ដល់សាលាបឋមសិក្សាឯក អេម សង់ឃ្លាំងនេះ ត្រូវបាន ប្រារព្ធពិធីបញ្ចុះបឋមសិលា បើកការសាងសង់ជាផ្លូវការនៅថ្ងៃទី៩ ខែមករា ឆ្នាំ២០២៣ ក្រោមការ ចូលរួមរបស់ឯកឧត្តម ជា ចាន់តូ។
លោកអភិបាលស្រុកសន្ទុក ក្នុងនាមមាតា បិតា អាណាព្យាបាលលោកគ្រូអ្នកគ្រូ និងសិស្សានុសិស្ស សាលាបឋមសិក្សាឯក អេម សង់ឃ្លាំង បានថ្លែងអំណរគុណយ៉ាងជ្រាលជ្រៅ ចំពោះទឹកចិត្តនឹង កាយវិការសប្បុរសរបស់ឯកឧត្តម ជា ចាន់តូ និង លោកស្រី ខៀវ ស៊ីណា ដែលបានជួយកសាង អគារថ្មីបន្ថែម ដល់សាលាបឋមសិក្សាឯក អេម សង់ឃ្លាំង ដើម្បីបំពេញដល់សេចក្ដីត្រូវការថ្នាក់ រៀនរបស់សិស្សានុសិស្ស សម្រាប់ឆ្នាំសិក្សាថ្មី និងឆ្នាំបន្តបន្ទាប់ទៀត។
លោក ឯក ប្រុស អ្នកទទួលការងារសាងសង់បានឲ្យដឹងថា អគារថ្មីដែលត្រូវសាងសង់នៅពេលនេះ សង់ពីថ្មីប្រក់ក្បឿងមានមួយខ្នង៣បន្ទប់ តាមការគ្រោងទុកអគារនេះ នឹងរួចរាល់នៅអំឡុង ខែមិថុនា ឆ្នាំ២០២៣ខាងមុខនេះ។
សូមបញ្ជាក់ថា ការសង់អគារសិក្សានេះ ក៏មានការអនុញ្ញាតិឲ្យមានការកសាងចេតីយអតីតព្រះគ្រូ ចៅអធិការ ស្ថិតនៅបរិវេណវត្តសង់ឃ្លាំងផងដែរ។
ឯកឧត្តម ជា ចាន់តូ បានក្រើនរំលឹកដល់អ្នកទទួលម៉ៅការសាងសង់ឲ្យបង្កើនស្មារតី ដោយការទទួល ខុសខ្ពស់ ចំពោះការងារមួយនេះធ្វើយ៉ាងណាឲ្យការសាងសង់ សម្រេចបានលឿនតាមផែនការ និងត្រូវគោរពឲ្យបានត្រឹមត្រូវ តាមបទដ្ឋានបច្ចេកទេសដោយធានាឲ្យបានទាំងគុណភាព និងសោ ភណ្ឌភាព។
សូមជម្រាបថា សាលាបឋមសិក្សា ឯក អេម សង់ឃ្លាំង បច្ចុប្បន្នមានតែអគារមួយខ្នង៥បន្ទប់ ប៉ុណ្ណោះ ដែលកសាងឡើងដោយមហាឧបាសិកា ឯក អេម នៅក្នុងឆ្នាំ២០១០ ដែលមានសិស្ស កំពុងសិក្សារហូតដល់៣១៧នាក់ ក្នុងនោះមានសិស្សស្រីចំនួន១៥២នាក់ បើប្រៀបធៀបទៅនឹង ពេលមុនសិស្សមានការកើនឡើងជាបន្តបន្ទាប់៕
