(ភ្នំពេញ)៖ នៅថ្ងៃទី០៨ ខែមិថុនា ឆ្នាំ២០២២នេះ នៅសាកលវិទ្យាល័យភូមិន្ទភ្នំពេញ ទីភ្នាក់ងារ សហប្រតិបត្តិការអន្តរជាតិកូរ៉េ (កយកា) និង ក្រសួងអប់រំ យុវជន និងកីឡា រៀបចំពីធីប្រគល់ទទួល រថយន្តចំនួន៧គ្រឿង ដែលជាអំណោយរបស់រដ្ឋាភិបាលសាធារណៈរដ្ឋកូរ៉េ (កូរ៉េខាងត្បូង) នៅ ក្រោមគម្រោងបង្កើតប្រព័ន្ធធុរកិច្ចថ្មីរវាងសាកលវិទ្យាល័យ និងវិស័យឧស្សាហកម្មនៅប្រទេសកម្ពុជា និងកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍។
ពិធីនេះមានការចូលរួមពីលោក ហ៊ាង ស៊ីណេ អនុរដ្ឋលេខាធិការ ក្រសួងអប់រំ យុវជន និងកីឡា លោក Hyunjun RHO ប្រធានតំណាងកយកាប្រចាំប្រទេសកម្ពុជា លោកបណ្ឌិត ជេត ជា លី សាកលវិទ្យាធិការនៃសាកលវិទ្យាល័យភូមិន្ទភ្នំពេញ តំណាងកម្មវិធីស្បៀងអាហារពិភពលោក លោកបណ្ឌិត ចាន់ សុភា ប្រធាននាយកដ្ឋានបឋមសិក្សា និងបុគ្គលិកពាក់ព័ន្ធមួយចំនួនទៀត។
ក្នុងចំណោមរថយន្តទាំង៧រឿងនេះ រថយន្តចំនួន២គ្រឿង ផ្តល់ជូនមជ្ឈមណ្ឌលជាតិបណ្តុះធុរកិច្ច ថ្មីនៃកម្ពុជាដើម្បីជួយសម្រួលដល់ដំណើរការងារគម្រោងការបង្កើតប្រព័ន្ធធុរកិច្ចថ្មីរវាងសាកលវិទ្យាល័យ និងវិស័យឧស្សាហកម្មនៅប្រទេសកម្ពុជា និងរថយន្ត៥គ្រឿងទៀត ផ្តល់ជូនក្រសួងអប់រំ យុវជន និងកីឡា និងមន្ទីរអប់រំយុវជន និងកីឡានៅខេត្តកំពង់ឆ្នាំង កំពង់ធំ និងពោធិ៍សាត់ សម្រាប់ គាំទ្រដំណើរការគម្រោងកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍។ សូមបញ្ជាក់ថា គម្រោងបង្កើតប្រព័ន្ធធុរកិច្ចថ្មីរវាងសាកលវិទ្យាល័យ និងវិស័យឧស្សាហកម្ម នៅប្រទេសកម្ពុជា ស្ថិតក្រោមជំនួយឥតសំណងរបស់សាធារណៈរដ្ឋកូរ៉េ ដែលមានទឹកប្រាក់ចំនួន ប្រមាណជា ៨លានដុល្លាសហរដ្ឋអាមេរិ តាមរយៈទីភ្នាក់ងារសហប្រតិបត្តិការអន្តរជាតិកូរ៉េ (កយកា) ដែលត្រូវបានអនុវត្តដោយ Korea Productivity Center (KPC) ក្រោមកិច្ចសហប្រតិបត្តិការជា មួយក្រសួងអប់រំ យុវជន និងកីឡា និងសាកលវិទ្យាល័យភូមិន្ទភ្នំពេញ ពីឆ្នាំ២០១៩-២០២៣។ គម្រោងនេះមានគោលបំណងបង្កើតប្រព័ន្ធធុរកិច្ចថ្មី និងបណ្តាញទីផ្សារ នៅប្រទេសកម្ពុជា តាមរយៈ ការពង្រឹងសមត្ថភាពប្រកួតប្រជែងអ្នកចាប់ផ្តើមធុរកិច្ចថ្មី និងលើកកម្ពស់កម្មវិធីគាំទ្រដល់ការបង្កើត ធុរកិច្ចថ្មី ដែលនឹងរួមចំណែកដើម្បីធ្វើពិពិធកម្មឧស្សាហកម្ម និងជួយសម្រេចបាននូវការអភិវឌ្ឍ ប្រកបដោយនិរន្តរភាព។
រីឯកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ មានរយៈពេល ៥ឆ្នាំ (២០២០-២០២៤) ដែលត្រូវបានអនុវត្តក្រោមជំនួយឥតសំណងរបស់សាធារណៈរដ្ឋកូរ៉េ តាមរយៈ ទីភ្នាក់ងារសហប្រតិបត្តិការអន្តរជាតិកូរ៉េ (កយកា) ក្នុងថវិកាប្រមាណ ១០លានដុល្លារសហរដ្ឋ អាមេរិច។ គម្រោងនេះអនុវត្ត នៅតាមសាលាបឋមសិក្សាចំនួន២៧២ ដែលមានចំនួនសិស្សសរុប ចំនួន ២៩,០៣២នាក់ ក្នុងខេត្កំពង់ឆ្នាំង កំពង់ធំ និង ខេត្តពោធិ៍សាត់៕
