(ភ្នំពេញ)៖ ឯកឧត្តម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បាន ជម្រាប ជូនឯកអគ្គរដ្ឋទូតសហភាពអឺរ៉ុប អំពីលទ្ធផលនៃការរៀបចំការបោះឆ្នោតជ្រើសរើសក្រុម ប្រឹក្សាឃុំ សង្កាត់ អាណត្តិទី៥ ឆ្នាំ២០២២។
បើតាមសេចក្តីប្រកាសព័ត៌មាន ដែលចេញផ្សាយដោយ គ.ជ.ប ក្រោយជំនួបពិភាក្សាគ្នារវាងលោក ប្រាជ្ញ ចន្ទ ប្រធាន គ.ជ.ប និងលោកស្រី ខាមិន ម៉ូរេណូ (Ms Carmen Moreno) ឯកអគ្គរដ្ឋទូត សហភាពអឺរុបប្រចាំនៅកម្ពុជា និងគណៈប្រតិភូអមដំណើរ ដែលជាមន្ត្រីការទូតជាន់ខ្ពស់នៃស្ថានទូត បារាំង ស្ថានទូតសាធារណរដ្ឋឆែក ស្ថានទូតស៊ុយអែត និងស្ថានទូតហុងគ្រី ដើម្បីពិភាក្សាការងារ ពាក់ព័ន្ធនឹងការបោះឆ្នោតនៅកម្ពុជា ដែលត្រូវប្រព្រឹត្តទៅក្នុងឆ្នាំ២០២២ និងឆ្នាំ២០២៣ ខាងមុខ នៅព្រឹកថ្ងៃទី១៧ ខែឧសភា ឆ្នាំ២០២២នេះ។
ក្នុងនោះ ប្រធាន គ.ជ.ប បានរំលេចអំពីការរៀបចំបញ្ជីបោះឆ្នោតឆ្នាំ២០២១ ដែលមានអ្នកបោះឆ្នោត ជាង ៩លាន ២សែននាក់ ធៀបនឹងប្រជាពលរដ្ឋដែលមានអាយុ ១៨ឆ្នាំ គិតដល់ថ្ងៃបោះឆ្នោត គឺបើ គិតជាភាគរយគឺ ៨៧.៩៤%។ នេះជាលទ្ធផលដែល គ.ជ.ប រៀបចំបញ្ជីបោះឆ្នោត សម្រាប់ការបោះ ឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២។
ឯកឧត្តម ប្រាជ្ញ ចន្ទ ប្រធាន គ.ជ.ប បានមានប្រសាសន៍អំពីដំណើរប្រព្រឹត្តជាទូទៅនៃគណៈកម្មាធិ ការជាតិរៀបចំការបោះឆ្នោត រួមមាន ប្រវត្តិនៃការរៀបចំការបោះឆ្នោតនៅកម្ពុជា តាំងពីឆ្នាំ១៩៩៣ ដែលរៀបចំដោយអ៊ុនតាក់ ក្រោយមកឆ្នាំ១៩៩៨ រៀបចំដោយ គ.ជ.ប ខ្លួនឯង ហើយការបោះឆ្នោត ទាំងសកល និងអសកល រៀបចំបានចំនួន ១៧លើក រួចមកហើយ។ ពីការបោះឆ្នោតមួយទៅការបោះឆ្នោតមួយទៀតត្រូវបានវាយតម្លៃថាកាន់តែល្អប្រសើរឡើងជាងការបោះឆ្នោតមុនៗ។
ប្រធាន គ.ជ.ប បានជម្រាបជូនភាគីសហភាពអឺរ៉ុបដែរថា គណបក្សនយោបាយ ចំនួន១៧ ត្រូវបាន គ.ជ.ប ទទួលស្គាល់ក្នុងការចុះបញ្ជីបេក្ខជននៃគណបក្សនយោបាយឈរឈ្មោះបោះឆ្នោតជាផ្លូវការ ហើយបច្ចុប្បន្ននេះ គ.ជ.ប ក៏បានត្រៀមរៀបចំសម្ភារបរិក្ខារបម្រើឱ្យការបោះឆ្នោត ដែលជាទូទៅ អាចវាយតម្លៃបានថា ជិតរួចរាល់ហើយ នៅសល់តែការងារតិចតួច ដែលត្រូវបំពេញតាមក្រោយ។
នៅក្នុងជំនួបប្រជុំនេះដែរ ប្រធាន គ.ជ.ប ក៏បានជម្រាបជូនថា កិច្ចការសំខាន់មួយទៀត គឺការជ្រើស រើស និងបណ្តុះបណ្តាលធនធានមនុស្សសម្រាប់គណៈកម្មការរាជធានី ខេត្ត រៀបចំការបោះឆ្នោត (គធ.ខប) គណៈកម្មការឃុំ សង្កាត់រៀបចំការបោះឆ្នោត (គឃ.សប) និងខាងមុខនេះ គ.ជ.ប នឹង ជ្រើសរើសគណៈកម្មការការិយាល័យបោះឆ្នោត (គ.ក.ប) សម្រាប់បម្រើការងារនៅការិយាល័យបោះឆ្នោតចំនួន ២៣,៦០២ការិយាល័យ ដែល គ.ជ.ប ត្រូវការជ្រើសរើសមនុស្សជាង ១៤ម៉ឺននាក់។
ភាគីសហភាពអឺរ៉ុប បានលើកឡើងពាក់ព័ន្ធនឹងការជ្រើសរើសមន្រ្តីបោះឆ្នោត ការបណ្តុះបណ្តាលធន ធានមនុស្ស ការលុបបញ្ជីបេក្ខជននៃគណបក្សនយោបាយមួយចំនួន លំហការងាររបស់ អង្គការមិន មែនរដ្ឋាភិបាល វេទិកាឃោសនាបោះឆ្នោតរបស់គណបក្សនយោបាយ និងកំណត់ហេតុនៃការរាប់ សន្លឹកឆ្នោត (ទ.១១០២)។
ប្រធាន គ.ជ.ប បានជម្រាបជូន និងឆ្លើយ គ្រប់សំណួរទាំងអស់របស់ភាគីសហភាពអឺរ៉ុប ហើយ ដែលត្រូវបានវាយតម្លៃដោយសហភាពអឺរ៉ុបថា ការបកស្រាយរបស់ប្រធាន គ.ជ.ប គឺបានល្អិតល្អន់ និងច្បាស់លាស់។
ភាគីសហភាពអឺរ៉ុប ស្នើសុំឱ្យភាគី គ.ជ.ប អនុញ្ញាតឱ្យមន្រ្តីនៃសហភាពអឺរ៉ុប ចូលរួមសង្កេត មើល ការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០២២ ខាងមុខនេះ ប៉ុន្តែមិនមែនក្នុងន័យ ចុះ បញ្ជីជាភ្នាក់ងារសង្កេតការណ៍បោះឆ្នោតផ្លូវការទេ។ ប្រតិភូសហភាពអឺរុប សុំអនុញ្ញាតពី គ.ជ.ប ដើម្បីបានចូលពិនិត្យ មើលការបោះឆ្នោតជាទូទៅ ដោយគ្មានការធ្វើរបាយការណ៍វាយតម្លៃអំពី បរិយាកាសនៃដំណើរការរៀបចំការបោះឆ្នោតឡើយ។
ឆ្លើយតបទៅនឹងចំណុចនេះ ឯកឧត្តម ទេព នីថា អគ្គលេខាធិការ គ.ជ.ប បានលើកឡើងថា កិច្ចការ នេះ គ.ជ.ប ធ្លាប់បានអនុវត្តរួចហើយ គឺ គ.ជ.ប ចេញលិខិតជូនជាភ្ញៀវពិសេស មិនមែនជាអ្នក សង្កេត ការណ៍នោះទេ។ លោកស្រី ខាមិន ម៉ូរេណូ ឯកអគ្គរដ្ឋទូតសហភាពអឺរ៉ុប សង្ឃឹមថា ភាគីទាំង ពីរ សហភាពអឺរ៉ុប និង គ.ជ.ប នៅមានកិច្ចប្រជុំជាបន្តបន្ទាប់ទៀត ដើម្បីពង្រឹងកិច្ចសហប្រតិបត្តិការ ទាក់ទងទៅនឹងការបោះឆ្នោតនៅកម្ពុជា៕
