(សៀមរាប)៖ ថ្ងៃទី១១ ខែមករា ឆ្នាំ២០២២ ឯកឧត្តម ទេសរដ្ឋមន្រ្តី លី ធុជ អនុប្រធានទី១ អាជ្ញាធរ មីន បានលើកឡើងថា «ការងារដោះមីនមិនអាចទាយទុកជាមុនបានឡើយ ហើយអ្វីគ្រប់យ៉ាងអាច ផ្លាស់ ប្តូរ ក្នុងរយៈពេលតិចជាងមួយវិនាទី ដែលធ្វើឲ្យពួកគេអាចបាត់បង់ជីវិតធ្លាក់ខ្លួនពិការ និង បាត់បង់ មនុស្សជាទីស្រលាញ់» ហើយការបាត់បង់ជីវិតរបស់ពួកគាត់ គឺកើតឡើងពីលទ្ធផល នៃ សង្រ្គាមដ៏ រ៉ាំរ៉ៃអូសបន្លាយរាប់ទសវត្សនៅកម្ពុជា។
នេះជាការលើកឡើងរបស់ ឯកឧត្តម ទេសរដ្ឋមន្រ្តី ក្នុងនាមសម្តេចតេជោនាយករដ្ឋមន្ត្រី និងជា ប្រធាន អាជ្ញាធរមីន និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ក្នុងឱកាសអញ្ជើញ ចូលរួម ពិធីបុណ្យសព របស់អ្នកដោះមីន ចំនួន៣នាក់ នៃអង្គការដោះមីនកម្ពុជា (CSHD) ដែល បានពលី ជីវិតដោយការផ្ទុះមីនតោន ក្នុងកិច្ចប្រតិបត្តិការប្រមូល និងកម្ទេចគ្រាប់កាលពីថ្ងៃទី១០ ខែមករា ឆ្នាំ២០២២ ក្នុងភូមិសាស្រ្តភូមិសែនតេជៈ ឃុំសែនតេជោ ស្រុកជាំក្សាន្ត ខេត្តព្រះវិហារ ដែលពួកគាត់ បានបម្រើការងារបោសសម្អាតមីនមនុស្សធម៌រយៈពេលជិត១០ឆ្នាំនេះ ចាប់តាំងពី ឆ្នាំ២០០២។
ឯកឧត្តម បន្តទៀតថា វីរជនក្លាហានទាំង៣រូបនេះ គឺលោក ស៊ុន វង្ស, លោក ម៉ា ស៊ីម៉េត និងលោក ម៉ន ចក់ បានប្រថុយគ្រប់យ៉ាងអស់ជាច្រើនឆ្នាំក្នុងការបម្រើប្រទេស និងប្រជាជនរបស់ខ្លួន។ ពួកគាត់បានលះបង់ជីវិតរបស់ខ្លួន ដើម្បីធ្វើឱ្យអ្នកដទៃមានសុវត្ថិភាព។ យើងទាំងអស់គ្នាសូមគោរព ជីវិត និងការលះបង់របស់ពួកគាត់។
ឯកឧត្តម ទេសរដ្ឋមន្រ្តី បានបង្ហាញពីអារម្មណ៍ក្ដុកក្ដួលយ៉ាងខ្លាំងចំពោះ ការបាត់បង់វីរជនដ៏ឆ្នើម របស់កម្ពុជា ព្រមទាំងបានពាំនាំនូវការយកចិត្តទុកដាក់ដ៏ខ្ពង់ខ្ពស់របស់ សម្តេចតេជោនាយករដ្ឋមន្រ្តី ចំពោះការបាត់បង់ជីវិត ពិការភាព និងរបួសរបស់បងប្អូនប្រជាពលរដ្ឋ ក៏ដូចជាអ្នកដោះមីនថា «ទោះ បីការបាត់បង់ជីវិត ឬពិការប្រជាជនសូម្បីតែម្នាក់ដោយសារមីន និងសំណល់ជាតិផ្ទុះពីសង្គ្រាម គឺជា ទុក្ខសោក និងជាការសោកស្តាយបំផុតសម្រាប់ ប្រទេសជាតិទាំងមូល»។
ក្នុងនាមរាជរដ្ឋាភិបាលកម្ពុជា ឯកឧត្តម ទេសរដ្ឋមន្រ្តី បានកោតសរសើរ និងវាយតម្លៃខ្ពស់ចំពោះ វីរភាពដ៏អង់អាចក្លាហានរបស់បងប្អូនអ្នកដោះមីនទាំងអស់ ដែលបានលះបង់ និងបំពេញការងារទាំង ប្រថុយប្រថាននិងគ្រោះថ្នាក់បំផុត ក្រោមពន្លឺថ្ងៃក្តៅ តាមវាលស្រែ និងព្រៃភ្នំ ដើម្បីចូលរួមបង្កើតនូវ ពិភពលោកមួយ ពោរពេញដោយសុវត្ថិភាពសម្រាប់ សហគមន៍ និងប្រទេសជាតិ ក៏ដូចជាមនុស្ស គ្រប់រូប។ ក្នុងនាមសម្តេចតេជោ ប្រធានអាជ្ញាធរមីន ឯកឧត្តម ទេសរដ្ឋមន្រ្តី បានអំពាវនាវអោយ បងប្អូនជនរួមជាតិ ក៏ដូចជា បងប្អូនអ្នកដោះមីនទាំងអស់ ត្រូវបន្តមានការប្រុងប្រយ័ត្នខ្ពស់ ចំពោះ គ្រោះថ្នាក់ ដែលអាចបង្កឡើងដោយសារមីន និងសំណល់ជាតិផ្ទុះពីសង្រ្គាម ព្រមទាំងអំពាវនាវឲ្យ មិត្តវិស័យមីនទាំងអស់ រួមមានសហគមន៍ម្ចាស់ជំនួយ ដៃគូអភិវឌ្ឍន៍ បន្តចូលរួមជាមួយរាជរដ្ឋាភិ បាលកម្ពុជា ធ្វើការបោសសម្អាតមីនឲ្យអស់ពីទឹកដីកម្ពុជា ដើម្បីកាត់បន្ថយគ្រោះថ្នាក់ និងចូលរួម ការអភិវឌ្ឍនៅកម្ពុជា។
ក្នុងនាមគ្រួសារសព ឯកឧត្តម ទេសរដ្ឋមន្រ្តី បានថ្លែងអំណរគុណដ៏ជ្រាលជ្រៅជូនចំពោះ សម្តេច កិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ដែលតែងតែយកចិត្តទុកដាក់ និងអាណិតអាសូរ ដល់ជនរងគ្រោះដោយសារមីន និងសំណល់ជាតិផ្ទុះពីសង្រ្គាម ព្រមទាំងតែងតែជួយឧបត្ថម្ភ គាំទ្រ ដល់ក្រុមគ្រួសារជនរងគ្រោះផងដែរ។
ក្នុងនាមថ្នាក់ដឹកនាំអាជ្ញាធរមីន ក៏ដូចជាគ្រួសារសព ឯកឧត្តម ទេសរដ្ឋមន្រ្តី បានថ្លែងអំណរគុណ យ៉ាជ្រាលជ្រៅចំពោះកងកម្លាំងកងទ័ពជើងគោកប្រចាំភូមិភាគខេត្តព្រះវិហារ ក្រោមការដឹកនាំរបស់ ឯកឧត្តមឧត្តមសេនីយ៍ឯក ហ៊ុន ម៉ាណែត ដែលបានជួយអន្តរាគមន៍ភ្លាមៗដល់កន្លែងកើតហេតុ។
បន្ទាប់ពីទទួលដំណឹងដ៏រន្ធត់នេះ សហគមន៍ផ្តល់ជំនួយ និងតំណាងស្ថានទូតប្រចាំនៅកម្ពុជា បាន បង្ហាញនូវក្តីសោកស្ដាយ និងបានផ្ញើសារ រំលែកមរណទុក្ខដ៏ក្រៀមក្រំ ជូនដល់ថ្នាក់ដឹកនាំអាជ្ញាធរមីន និងគ្រួសារសព ចំពោះការបាត់បង់នេះ។
គិតចាប់ពីឆ្នាំ១៩៩៧ ដល់បច្ចុប្បន្ន អ្នកដោះមីនដែលគ្រោះថ្នាក់ក្នុងកិច្ចប្រតិបត្តិការ បានបាត់បង់ជីវិត ពិការ និងរបួស សរុបចំនួន១៥៤ នាក់ ក្នុងនោះបាត់បង់ជីវិតចំនួន ៣១នាក់៕
