ប្រធានាធិបតីកូរ៉េខាងត្បូង នឹងប្រើពេលចុងក្រោយនៃអាណត្តិ ដើម្បីស្វែងរក «កិច្ចព្រមព្រៀង សន្តិភាព» ជាមួយកូរ៉េខាងជើង

 (សេអ៊ូល)៖  តាមការចេញផ្សាយដោយ ទីភ្នាក់ងារសារព័ត៌មាន Reuters នៅរសៀលថ្ងៃចន្ទ ទី០៣ ខែមករា ឆ្នាំ២០២២បញ្ជាក់ប្រាប់អោយដឹងថា ប្រធានាធិបតីកូរ៉េខាងត្បូង លោក មូន ចេអ៉ីន នៅថ្ងៃ​ចន្ទនេះបានសន្យាថា នឹងប្រើប្រាសឱកាសចុងក្រោយនៅសល់ប៉ុន្មានខែទៀតនេះ ដើម្បីស្វែងរក កិច្ចព្រមព្រៀងសន្តិភាពជាមួយកូរ៉េខាងជើង បើទោះជាទីក្រុងព្យុងយ៉ាងបន្តមិនអើពើក៏ដោយ។

ការសន្យាខាងលើធ្វើឡើងនៅក្នុងសុន្ទរកថាឆ្នាំថ្មី ដែលត្រូវជាលើកចុងក្រោយរបស់លោក មូន ចែអ៉ីន មុននឹងអាណត្តិជាប្រធានាធិបតីកូរ៉េខាងត្បូងរយៈពេល ៥ឆ្នាំរបស់លោក ត្រូវបញ្ចប់នៅខែឧសភា ឆ្នាំ២០២២នេះ។ លោក មូន ថ្លែងនាឱកាសនោះថា «រដ្ឋាភិបាលនឹងបន្តរក្សាទំនាកទំនងអន្តរ កូរ៉េជាប្រក្រតី និងមិនកែប្រែឡើយនូវជំហានឆ្ពោះទៅរកសន្តិភាព រហូតដល់ទីបញ្ចប់… ហើយក៏ខ្ញុំ សង្ឃឹមថា កិច្ចខិតខំប្រឹងប្រែងសម្រាប់កិច្ចសន្ទនា នឹងនៅតែបន្តនៅក្រោមរដ្ឋបាលថ្មី»។

សូមជម្រាបថា នៅក្នុងសុន្ទរកថាឆ្នាំថ្មីកាលពីប៉ុន្មានថ្ងៃកន្លងទៅនេះ, មេដឹកនាំកូរ៉េខាងជើង លោក គីម ជុងអ៊ុន មិនបានលើកឡើងពីការអំពាវនាវរបស់លោក មូន ចែអ៊ីន ក្នុងការស្វែងរកសន្តិភាពបិទ បញ្ចប់សង្រ្គាមកូរ៉េ (ឆ្នាំ១៩៥០-១៩៥៣) ទាំងស្រុង ឬក៏ចេតនាចង់ចូលរួមក្នុងកិច្ចចរចានុយក្លេអ៊ែរ ជាថ្មីជាមួយសហរដ្ឋអាមេរិកនោះទេ។ មកទល់នឹងពេលនេះ ជាលក្ខណៈបច្ចេកទេស កូរ៉េខាងជើង និងកូរ៉េខាងត្បូង នៅតែបន្តស្ថិតនៅក្នុងស្ថានភាពសង្រ្គាមដដែល ដ្បិតសង្រ្គាមកូរ៉េបានបិទបញ្ចប់ ទៅនៅក្រោម «បទឈប់បាញ់» មួយតែប៉ុណ្ណោះ ពោលគឺមិនមែនជាសន្ធិសញ្ញាសន្តិភាពឡើយ៕