កោះកុង÷ រដ្ឋបាលខេត្តកោះកុង បានបើកពិធីប្រកាសចូលកាន់មុខតំណែងប្រធានពន្ធនាគារខេត្តកោះកុងថ្មី ក្រោមអធិបតី ឯកឧត្ដម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ និងឯកឧត្តម ថុង ណារុង ប្រធានក្រុមប្រឹក្សាខេត្តកោះកុង លោក ជំទាវ មិថុនា ភូថង អភិបាលនៃគណៈអភិបាលខេត្តកោះកុង នៅរសៀលថ្ងៃទី ៣ មករា ឆ្នាំ ២០២៥ នៅសាលមហោស្រពខេត្តកោះកុង។
ថ្លែងក្នុងពិធីប្រកាសតែងតាំងមុខតំណែងឯកឧត្ដម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ បានមានប្រសាសន៍ផ្ដាំផ្ញើ ដល់មន្ត្រីពន្ធនាគារខេត្តកោះកុង ត្រូវខិតខំបំពេញកការងារ គោរពតាមឋានានុក្រម មុខងារ តួនាទីភារកិច្ច ដែលថ្នាក់លើនិងអង្គភាពប្រគល់ជូន ត្រូវប្រកាន់ភ្ជាប់នៅគោលការណ៍ វិជ្ជាជីវៈ គុណភាព ប្រសិទ្ធផល ភាពស្មោះត្រង់ ក្រោមសីលធម៌ និងបទវិន័យមន្ត្រីពន្ធនាគារ។
ពង្រឹងការគោរពអនុវត្តច្បាប់ នីតិវិធីបទបញ្ជាផ្ទៃក្នុងពន្ធនាគារ និងលិខិតបទដ្ឋានពាក់ព័ន្ធនានាដែលបម្រើដល់ការងារដឹកនាំគ្រប់គ្រងនិងផ្នែកជំនាញនិមួយៗ។
ពង្រឹងកិច្ចការពារសន្តិសុខ សុវត្ថិភាពប្រសិទ្ធភាព ត្រួតពិនិត្យឆែកឆេឧបករណ៍វត្ថុសម្ភារៈ ហាមឃាត់ ដែលប៉ុនប៉ងលួចលាក់ ទាំងនាំចូលក្នុងពន្ធនាគារ ស៊ើបអង្កេតស្រាវជ្រាវ បង្ការទប់ស្កាត់អំពើល្មើសផ្សេងៗ ជាពិសេសទូរសព្ទដៃ និងគ្រឿងញៀន។
ឯកឧត្ត មឧត្តមអគ្គានុរក្សថ្នាក់លេខ ១ មានប្រសាសន៍បន្ថែមថា ប្រធានពន្ធនាគារ ថ្មី ត្រូវខិតខំបំពេញការងារដោយស្មារតីទទួលខុសត្រូវខ្ពស់ សម្រេចបាននូវស្នាដៃ និងសមិទ្ធផលថ្មីៗបន្ថែម ទៀត ត្រូវពង្រឹងឱ្យបាននូវសាមគ្គីឯកភាពផ្ទៃក្នុងឱ្យបានល្អ ត្រូវមានទំនាក់ទំនងជាមួយអង្គភាពនានា ជាពិសេស ស្ថាប័នតុលាការ ត្រូវគោរព តួនាទីខ្លួនឯង ត្រូវបន្តខិតខំរក្សា សុវត្ថិភាព សុខភាព ជូនដលជនជាប់ឃុំ សំដៅប្រែក្លាយ ពន្ធនាគារ ទៅជាកន្លែងអប់រំ និងកែប្រែស្តារនីតិសម្បទា ប្រកបដោយមនុស្សធម៌ កន្លែងមួយដែលមានសារៈសំខាន់ សម្រាប់អប់រំ កែប្រែ និងស្តារនីតិសម្បទាដល់ជនជាប់ឃុំ ដើម្បីធានាថា ពេលដែលពួកគាត់ត្រឡប់ទៅរស់នៅក្ក្នុងសហគមន៍វិញ ក្លាយជា មនុស្សល្អ មានភាពរាងចាល និងកាត់បន្ថយបទល្មើស ជាពិសេសពន្ធនាគារជាកន្លែងសម្រាប់រក្សាសុខសុវត្ថិភាព សុខភាព និងមនុស្សធម៌ ស្របតាមគោលការណ៍អន្តរជាតិ ។
លោក.ចាន់ ចំណាន ប្រធានពន្ធនាគារទើបប្រកាសតែងតាំងថ្មី បានធ្វើការប្តេជ្ញាចិត្ត គោរពនិងប្រតិបត្តិ តាមច្បាប់លិខិតបទដ្ឋានគតិយុទ្ធនានា ពិសេសគោរព គោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជាក្រោមការដឹកនាំ ដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា, ស្មោះស្ម័គ្រគោរពប្រតិបត្តិ តាមគោលការរបស់ក្រសួង មហាផ្ទៃ, រៀនសូត្រយកគំរូដឹកនាំគ្រប់គ្រងល្អៗ របស់ថ្នាក់ដឹកនាំពន្ធនាគារមុនៗ គួបផ្សំជាមួយចំណេះដឹងបទពិសោធន៍ ផ្ទាល់ខ្លួនផងដែរ៕ ដោយ សេន ពិសិដ្ឋ
