(គូឡាឡាំពួ)៖ យោងតាមការចេញផ្សាយដោយ សារព័ត៌មាន CNA នាព្រឹកថ្ងៃអង្គារ ទី២១ ខែធ្នូ ឆ្នាំ២០២១ គឺបានបញ្ជាក់ថា ទឹកជំនន់ដែលបង្កឡើងដោយភ្លៀងធ្លាក់យ៉ាងគំហុក ទៅលើឧបទ្វីប ម៉ាឡេស៊ីកាលពីចុងសប្តាហ៍មុននេះ គឺជាភស្តុតាងបន្ថែមទៀត ដែលបង្ហាញយ៉ាងច្បាស់អំពីផល ប៉ះពាល់កាន់តែធ្ងន់ធ្ងរ បង្កឡើងដោយការប្រែប្រួលបរិយាកាសផែនដី ខណៈរដ្ឋាភិបាលម៉ាឡេស៊ី បានចាត់ទុកថា វាជាគ្រោះទឹកជំនន់ដ៏អាក្រក់ មិនធ្លាប់មានឡើងក្នុងរយៈពេល ១០០ឆ្នាំមកនេះ។
ស្ថានការណ៍អាសន្នដែលទើបកើតមានឡើងនេះ បាននាំឲ្យក្រុមអ្នកជំនាញផ្នែកបរិស្ថាន នៅក្នុង ប្រទេសម៉ាឡេស៊ី ជំរុញឲ្យអាជ្ញាធរបង្កើនការសិក្សា និងរៀបចំផែនការ ដើម្បីលើកស្ទួយការអភិវឌ្ឍ ប្រកបដោយចីរភាព នោះគឺការអភិវឌ្ឍដែលមិនបង្កផលប៉ះពាល់ ទៅដល់បរិស្ថានធម្មជាតិ។ កាលពីថ្ងៃសុក្រ និងថ្ងៃសៅរ៍សប្តាហ៍មុននេះ រដ្ឋមួយចំនួនរបស់ម៉ាឡេស៊ីដូចជា សេឡាំងហ្គ័រ (Selangor), ណេហ្គឺរី សឹមប៊ីឡាន (Negeri Sembilan), កេឡាន់តាន់ (Kelantan), ផេហាង (Pahang), មេឡេកា (Melaka) និង ទែរែងហ្គានូ (Terengganu) បានទទួលរងភ្លៀងយ៉ាងដំណំ ដែលបានបង្កទៅជាគ្រោះទឹកជំនន់។
រដ្ឋាភិបាលម៉ាឡេស៊ីបានអះអាងថា ទឹកជំនន់ខាងលើនេះ គឺជាអ្វីមួយដែលមិនធ្លាប់កើតមានឡើយ ក្នុងរយៈពេល ១០០ឆ្នាំមកនេះ ហើយនៅក្នុងឆ្នាំ ២០២១ យើងបានឃើញព្រឹត្តិការណ៍ស្រដៀង គ្នានេះ កើតមានឡើងរួចទៅហើយ នៅប្រទេសអាល្លឺម៉ង់, តួកគី, ចិន, ឥណ្ឌា និងបណ្តារដ្ឋភាគឦ សានសហរដ្ឋអាមេរិក ដោយរដ្ឋញូយ៉កបានទទួលរងគ្រោះធ្ងន់ធ្ងរជាងគេ។
បើតាមក្រសួងធនធានទឹក និងបរិស្ថាននៃប្រទេសម៉ាឡេស៊ី បានអះអាងនៅដើមសប្តាហ៍នេះថា ប្រព័ន្ធសម្ពាធទាបបានបង្កឲ្យមានភ្លៀងធ្លាក់ នៅបណ្តារដ្ឋក្នុងឧបទ្វីបម៉ាឡេស៊ីរយៈពេល ២៤ម៉ោង ឯណោះ ហើយកម្រិតទឹកភ្លៀង ដែលបានធ្លាក់មកនោះ គឺស្មើនឹងចំនួនទឹកភ្លៀងដែលធ្លាក់ក្នុងរយៈ ពេល ១ខែ។ ខេត្តមួយចំនួនរបស់ប្រទេសថៃ ដែលជាប់នឹងព្រំដែនម៉ាឡេស៊ី ក៏បានកើតមានគ្រោះ ទឹកកកជំនន់ផងដែរ។
ក្រសួងដដែលបានសង្កត់ធ្ងន់ទៀតថា «កម្រិតទឹកភ្លៀងសម្រាប់រដ្ឋធានីគូឡាឡាំពួគឺ ២,៤០០មីលី ម៉ែត្រក្នុងមួយឆ្នាំ ដូច្នេះវាមានន័យថា ភ្លៀងធ្លាក់កាលពីចុងសប្តាហ៍មុននេះ គឺស្មើនឹងកម្រិតទឹកភ្លៀង ក្នុងរយៈពេល ១ខែ… វាហួសពីការរំពឹងទុករបស់យើង ហើយវាតែងតែងកើតឡើងម្តង ក្នុងអំលុងពេល រាប់រយឆ្នាំ»៕
