(ភ្នំពេញ)៖ ការប្រកួតកីឡាទូកក្ដោងជ្រើសជើងឯកអាស៊ីអាគ្នេយ៍ ឆ្នាំ២០២១ បានដំណើរការប្រកួតជាផ្លូវការហើយ នៅថ្ងៃទី១៣ ខែធ្នូនេះ ខណៈលទ្ធផលបច្ចេកទេសថ្ងៃដំបូង ក្រុមកីឡាករកម្ពុជា ដណ្ដើមបានចំណាត់ថ្នាក់លេខ១ បណ្ដោះអាសន្នចំនួន ៣វិញ្ញាសា ក្នុងចំណោម ៥វិញ្ញសា នៅឆ្នេរសុខា ខេត្តព្រះសីហនុ ។យោងតាមរបាយការណ៍ ស្ដីពីការប្រកួតថ្ងៃទី១ នេះ កីឡាករកម្ពុជា ធ្វើបានយ៉ាងល្អប្រសើរ ក្នុងចំណោម ៤វិញ្ញាសា ដែលកម្ពុជា បានបញ្ជូនអត្តពលិកចូលរួមប្រកួត លើកលែងវិញ្ញាសា ILCA 4 ដែលកម្ពុជាមិនបានបញ្ជូនកីឡាករចូលរួមប្រកួត ។ ចំពោះលទ្ធផលការប្រកួតថ្ងៃបើកឆាក បន្ទាប់ពីបញ្ចប់ការប្រកួតចំនួន ៣ជុំ រួមមាន៖
១-វិញ្ញាសា ILCA 7 កីឡាករកម្ពុជាចូលរួម ២រូប ទទួលបានចំណាត់ថ្នាក់លេខ ១ និងលេខ ៣ ក្នុងចំណោមកីឡាករ ៣រូប ។
២-វិញ្ញាសា ILCA 6 កីឡាករកម្ពុជាចូលរួម ២រូប ទទួលបានចំណាត់ថ្នាក់លេខ ៤ និងលេខ ៥ ក្នុងចំណោមកីឡាករ ៥រូប ។
៣-វិញ្ញាសា RS:One កីឡាករកម្ពុជាចូលរួម ៣រូប ទទួលបានចំណាត់ថ្នាក់លេខ១ លេខ២ និងលេខ ៣ ក្នុងចំណោមកីឡាករ ៥រូប ។
៤-វិញ្ញាសា Techno 293 កីឡាករកម្ពុជាចូលរួម ៥រូប ទទួលបានចំណាត់ថ្នាក់ លេខ១ និងលេខ៣ ក្នុងចំណោមកីឡាករសរុប ៨រូប ។
លោក ថោង រដ្ឋសក្ដិ អនុប្រធានសហព័ន្ធកីឡាទូកក្ដោងកម្ពុជា បានឲ្យដឹងថា ព្រឹត្តិកាណ៍នេះ មានកីឡាករ-កីឡាការិនី ២៧នាក់ មកពី ៣ប្រទេសចូលរួម គឺមានកម្ពុជា សិង្ហបុរី និងម៉ាឡេស៊ី ដោយប្រកួតលើវិញ្ញាសាចំនួន ៥ ក្នុងនោះវិញ្ញាសានីមួយៗ កីឡាករ-កីឡាការិនីម្នាក់ៗ ត្រូវប្រកួតយ៉ាងហោច ១៦ជុំ ចាប់ពីថ្ងៃទី១៣-១៧ ខែធ្នូ បន្ទាប់មកទើបគណៈកម្មការធ្វើការបូកសរុបពិន្ទុ ដើម្បីកំណត់កីឡាករ-កីឡាការិនីជ័យលាភី ៕
