ពលរដ្ឋមួយគ្រួសារ មានគ្នា ៥នាក់ បានធ្វើដំណើរ តាមរថយន្តដឹកជញ្ជូនអ្នកដំណើរ យីហោ ” រថយន្តក្រុង ភ្នំពេញ ពេញចិត្ត ” ១ គ្រឿង ជាមួយអ្នកដំណើរជាច្រើនទៀត ពីរាជធានីភ្នំពេញ មកផ្ទះនៅភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ បានត្រូវក្រុមគ្រូពេទ្យ រកឃើញមានវិជ្ជមានជំងឺកូវីដ ១៩ ទាំងអស់គ្នា ក្រោយពេល លទ្ធផល នៃការពិនិត្យសំណាក រួចមក ។
នេះបើតាមលោក ហ៊ឹល រ៉ាយ៉ា អភិបាលក្រុងសិរីសោភ័ណ បានអោយដឹង នាថ្ងៃទី១៥ ខែមិថុនា ឆ្នាំ២០២១ ។
លោក ហ៊ឹល រ៉ាយ៉ា និងសមត្ថកិច្ចនគរបាល កងរាជអាវុធហត្ថ បានអោយដឹងថាៈ ពួកគាត់ ជាអ្នកជិះ រថយន្តក្រុង យីហោភ្នំពេញពេញចិត្ត ចេញដំណើរក្នុងទិសដៅ ពីភ្នំពេញ -ប៉ោយប៉ែត កាលពីយប់ថ្ងៃទី ១៤ ខែមិថុនា ឆ្នាំ២០២១ មកដល់វេលាម៉ោង ១១ ថ្ងៃត្រង់ ។
បន្ទាប់ចុះពីរថយន្ត អ្នក ៥ នាក់ ខាងលើ បានជិះ ម៉ូតូកង់បី(ផាសអាប់) ពីបេនទៅផ្ទះ ។
ហេតុនេះ លោកអភិបាលក្រុងសិរីសោភ័ណ បានសូមអំពាវនាវ ដល់អ្នកពាក់ព័ន្ធ មានអ្នកដំណើរមួយគ្រួសារ ដែលមានគ្នា៥នាក់ ដែលជិះរថយន្តក្រុងនេះ អ្នកបើកបរ អ្នកប្រាស្រ័យទាក់ទង អ្នកបើក បរផាសអាប់ សូមប្រញាប់ប្រញាល់ មកយកសំណាក និងដាក់ខ្លួនអោយនៅ ដាច់ដោយឡែក និងធ្វើចត្តាឡីស័ក រយៈពេល ១៤ ថ្ងៃ ៕
