ភ្នំពេញ ៖ ស្ថានទូតជប៉ុន រួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន និងមជ្ឈមណ្ឌលអាស៊ីនៃមូលនិធិជប៉ុន នឹងរៀបចំនូវសប្តាហ៍គីហ្សូណាជប៉ុន-កម្ពុជា២០២១ ជាអនឡាញ ដែលនឹងប្រព្រឹត្តិទៅចាប់ពីថ្ងៃទី១៨ ដល់ថ្ងៃទី២៨ ខែកុម្ភៈ ឆ្នាំ២០២១។
ក្នុងនាមមហោស្រពគីហ្សូណា ដែលជាកម្មវិធីវប្បធម៌ត្រូវបានរៀបចំឡើងជារៀងរាល់ឆ្នាំចាប់តាំងពីឆ្នាំ២០១២ ក្នុងគោលបំណងបង្ហាញពីវប្បធម៌ជប៉ុន និងកម្ពុជា ក៏ដូចជាជំរុញការផ្លាស់ប្តូរបន្ថែមរវាងប្រជាជន និងប្រជាជននៃប្រទេសទាំងពីរផងដែរ។ នេះបើយោងតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំនៅកម្ពុជា។
ក្នុងសេចក្ដីប្រកាសបានបញ្ជាក់ថា ក្នុងសប្តាហ៍គីហ្សូណាជប៉ុន-កម្ពុជា២០២១ នឹងមានកម្មវិធីវប្បធម៌ និងអប់រំតាមអនឡាញជាច្រើននៅលើទំព័រហ្វេសប៊ុកផ្លូវការ “Japan Cambodia Kizuna” ដូចជាការសម្តែងល្ខោនស្បែកតូច របាំហោមរោងយីកេ ការប្រគំតន្រ្តីខ្នាតតូចជប៉ុន-កម្ពុជា ការណែនាំស្តីពីអាហារូបករណ៍រដ្ឋាភិបាលជប៉ុន(MEXT) អាហារូបករណ៍អាស៊ីកាកេហាស៊ី វីដេអូថ្នាក់ភាសាជប៉ុនរបស់អ៊ីរ៉ូដូរី “តើភាសាជប៉ុនរបស់អ្នកដូចមេ្តចហើយ?” របៀបធ្វើ “ឈិរ៉ាស៊ិ ស៊ូស៊ី” និង“និហ្គិរិ ស៊ូស៊ី” របៀបបត់ក្រដាស អូរីហ្កាមិ ការរៀបចំផ្កាបែបជប៉ុន អ៊ិកេបាណា និងមានកម្មវិធីជាច្រើនផ្សេងទៀត។
ស្ថានទូតជប៉ុនសង្ឃឹមថា អ្នកចូលរួមនឹងមានអារម្មណ៍កាន់តែស្និទ្ធស្នាលជាមួយប្រទេសជប៉ុន និងបានយល់ដឹងកាន់តែស៊ីជម្រៅទៅលើវប្បធម៌ខ្មែរ និងជប៉ុនតាមរយៈការចូលរួមកម្មវិធីនានាជាអនឡាញនេះ៕
