ភ្នំពេញ ៖ សមត្ថកិច្ច បានតាមរកឃើញរថយន្តលុចសីសពណ៌ខ្មៅមួយគ្រឿង ដែលគេអះអាងថា ជារថយន្តរបស់ខ្មាន់កាំភ្លើងបាញ់សម្លាប់លោកនាយរងការិយាល័យកម្រិតស្រាលនៃស្នងការរាជធានីភ្នំពេញ និងជាថៅកែហាងលក់បាយម្តុំបាក់ទូក កាលពីរំលងអធ្រាត្រចូលថ្ងៃទី៣០ ខែធ្នូ ឆ្នាំ២០២០ នេះ ត្រូវបានប្រទះឃើញរថយន្តនៅក្បែរវីឡាតឿកូនកាត់មួយខ្នង ស្ថិតនៅក្នុងភូមិស្វាយឧត្តម សង្កាត់ពញ្ញាពន់ ខណ្ឌព្រែកព្នៅ ។
ប្រភពព័ត៌មានបន្តថា រថយន្តនេះបានបែកខ្ទេចផ្នែកខាងមុខ ហើយត្រូវបានគេដោះផ្លាកលេខចេញទៀតផង ដោយចតអែបកៀនផ្ទះយ៉ាងត្រឹមត្រូវតែម្តង ។ ហើយសមត្ថកិច្ចក៏កំពុងសង្ស័យមានជាប់ពាក់ព័ន្ធជាមួយម្ចាស់ផ្ទះនេះផងដែរ ។
បើតាមម្ចាស់ផ្ទះបានអះអាងប្រាប់សមត្ថកិច្ចថា កាលពីម៉ោងប្រហែល ២រំលងអធ្រាត្រ ថ្ងៃដដែល គាត់បានធុំក្លិនឈ្ងៀមនៅជិតផ្ទះ ហើយគាត់បានចេញមកមើល ក៏ឃើញបុរសម្នាក់បានឡើងជិះម៉ូតូមួយគ្រឿងចេញទៅបាត់ហើយ ដោយទុករថយន្តចតចោលនៅទីនេះ ។
គួររំលឹកថា លោករ៉េត ស៊ីនេត អាយុ៤០ឆ្នាំ ជានាយរងការិយាល័យព្រហ្មទណ្ឌស្រាលនៃស្នងការរាជធានីភ្នំពេញ ត្រូវខ្មាន់កាំភ្លើងបាញ់ជាច្រើនគ្រាប់បណ្តាលអោយស្លាប់ពេលបញ្ជូនទៅមន្ទីរពេទ្យ ។ ការបាញ់នេះ ក្រោយជនរងគ្រោះ និង ក្រុមជនបង្កជួបគ្រោះថ្នាក់ចរាចរណ៍ បន្តិចបន្តួច ។
អំពើបាញ់ប្រហារយ៉ាងសាហាវ នេះ កើតឡើងកាលពីយប់រំលងអាធ្រាត្រឈានចូលថ្ងៃទី៣០ ខែធ្នូ ឆ្នាំ២០២០ តាមបណ្តោយមហាវិថីសហព័ទ្ធរុស្ស៊ី មុខអាកាសយាន្តដ្ឋានអន្តរជាតិភ្នំពេញ ក្នុងភូមិក្បាលដំរីទី២ សង្កាត់កាកាបទី២ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុ បានអោយដឹងថា ជនរងគ្រោះ បើករថយន្តម៉ាក FORD ពណ៌ ស ពាក់ស្លាកលេខភ្នំពេញ 2BD-3738 តាមមហាវិថីហសព័ន្ធរុស្ស៊ី ក្នុងទិសដៅពីកើតទៅលិច ។
ខណៈមកដល់ចំណុចកើតហេតុ ស្រាប់តែមានរថយន្តឡិចស៊ីស ពណ៌ខ្មៅមួយគ្រឿង បើកមកបុកគូទឡានបណ្តាលឲ្យរងការខូចខាតបន្តិចបន្តួច ។ បន្ទាប់មកភាគីទាំងសងខាងបានឈប់ដើម្បីចរចាគ្នាដោយភាគីបានសម្រួលគ្នា ដោយគ្រាន់តែអោយភាគីបង្កយករថយន្តទៅជួសជុលដើម្បីបញ្ចប់រឿងប៉ុណ្ណោះ ។
តាមប្រភពព័ត៌មានដដែលបន្តថា បន្ទាប់មក ស្រាប់តែម្ចាស់រថយន្តបង្កឡើងទៅលើរថយន្តចំណែកបក្ខពួក២នាក់ទៀតបានដកកាំភ្លើងមិនចាំម៉ាកបាញ់ប្រហារទៅលើជនរងគ្រោះជាច្រើនគ្រាប់ ។ ក្រោយមក ក្រុមជនបង្កបានរត់គេចខ្លួនបាត់ស្រមោល ។
បន្ទាប់មកទៀត ជនរងគ្រោះត្រូវបានរថយន្តសង្គ្រោះដឹកយកទៅសង្គ្រោះតែអកុសលជនរងគ្រោះបានស្លាប់បាត់ទៅហើយ ។
ទោះបីយ៉ាងណា ពេលនេះ សមត្ថកិច្ចកំពុងស៊ើបអង្កេតយ៉ាងយកចិត្តទុកដាក់ ចំពោះការបាញ់ប្រហារ នេះ តើកើតឡើងភ្លាមៗក្រោយជួបគ្រោះថ្នាក់ចរាចរណ៍ ឬ ជាការរៀបចំគម្រោងបាញ់សម្លាប់ជនរងគ្រោះ ជាមុន ។
ទោះបីជាយ៉ាងណា សមត្ថកិច្ចបានឃាត់ខ្លួនម្ចាស់ផ្ទះខាងលើនាំយកទៅសាកសួរបន្ត ខណៈកំពុងមានការសង្ស័យច្រើនទៅលើម្ចាស់ផ្ទះនេះ ៕
