ភ្នំពេញ ៖ នៅក្នុងពេលជំងឺកូវីដ១៩នៅតែបន្តជះឥទ្ធិពលដល់សកម្មភាពទេសចរណ៍ក្នុងប្រទេសកម្ពុជា ក្រសួងនឹងរៀបចំកម្មវិធីបណ្ដុះបណ្ដាលដល់ធនធានមនុស្សក្នុងវិស័យទេសចរណ៍ ដើម្បីឆ្លើយតបភ្លាមៗទៅនឹងការឆ្លងរាលដាលនិងដើម្បីបង្ហាញទៅជនបរទេសថា កម្ពុជាពិតជាមានសុវត្ថិភាពសម្រាប់ពួកគេ ស្នាក់នៅនិងទស្សនាក្នុងប្រទេសកម្ពុជា ។
លោកថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា បុគ្គលិកនិយោជិតក្នុងវិស័យទេសចរណ៍ដែលបាត់បង់ការងារក្នុងពេលជួបវិបត្តិកូវីដ១៩ នឹងត្រូវបណ្ដុះបណ្ដាលឡើងវិញដើម្បីអោយគេមានជំនាញកាន់តែល្អជាងមុន សម្រាប់ត្រៀមបម្រើសេវាកម្មទេសចរណ៍ នៅពេលកូវីដ១៩ចប់ ឬបណ្ដុះបណ្ដាលដើម្បីឆ្លើយតបនឹងជំងឺនេះ ក្នុងពេលបច្ចុប្បន្នផងដែរ ។
លោកបន្តថា បើសិនជាស្ថានភាពកូវីដ១៩ មានសភាពធូរស្រាលឡើងវិញនៅចុងឆ្នាំ ២០២០នេះ រាជរដ្ឋាភិបាលអាចនឹងអនុញ្ញាតអោយរៀបចំបុណ្យសមុទ្រឡើងវិញ ដែលបុណ្យសមុទ្រសម្រាប់ឆ្នាំ ២០២០នេះ គ្រោងនឹងធ្វើនៅខេត្តព្រះសីហនុ ។ ក្រសួងក៏គ្រោងនឹងបណ្ដុះបណ្ដាលដល់មគ្គុទេសក៍ឡើងវិញផងដែរពីខេត្តព្រះសីហនុ ក្នុងនោះដូចជាភាពទាក់ទាញនៅក្នុងខេត្តនេះ រួមមានមហាវិថី សំខាន់មួយចំនួន ដែលរាជរដ្ឋាភិបាលបាននិងកំពុងសាងសង់និងស្ថាបនារួចរាល់និងជិតរួចរាល់ខ្លះ ។
លោកបន្ថែមថា ក្រសួងនឹងបន្តផ្សព្វផ្សាយដល់អន្តរជាតិពីគោលដៅទេសចរណ៍សំខាន់ៗនៅក្នុងព្រះរាជាណាចក្រកម្ពុជា ហើយក៏ត្រូវពង្រឹងគុណភាពសេវាកម្មទេសចរណ៍ អោយល្អប្រសើរជាងមុនផងដែរ ដើម្បីត្រៀមទទួលភ្ញៀវទេសចរដែលនឹងត្រលប់មកវិញនៅពេលចប់ការរីករាលដាលនៃជំងឺកូវីដ១៩ ។ សម្រាប់ជំហានដំបូង ក្រសួងនឹងជំរុញការផ្សព្វផ្សាយតំបន់ទេសចរណ៍ ដែលមានសក្ដានុពលដូចជាខេត្តព្រះសីហនុ និងខេត្តនៅតំបន់ឆ្នេរទាំងមូលផងដែរ ។
លោកតុប សុភ័ក អ្នកនាំពាក្យក្រសួងទេសចរណ៍ បានអោយដឹងផងដែរថា បញ្ហាពាក់ព័ន្ធនឹងការបណ្ដុះបណ្ដាលធនធានមនុស្សក្នុងវិស័យទេសចរណ៍ ក្រសួងបានគិតគូររួចហើយ និងតម្រូវឱ្យសិក្ខាកាមទាំងអស់ដែលមានចំណងសិក្សាពាក់ព័ន្ធនឹងការបម្រើអោយវិស័យទេសចរណ៍ គឺត្រូវសិក្សាតាមអនឡាញ ។
លោក មាន វ៉ាន់ដេត ប្រធាននាយកដ្ឋានបណ្ដុះបណ្ដាលវិជ្ជាជីវៈទេសចរណ៍ នៃក្រសួងទេសចរណ៍ ក៏បានអោយដឹងថា វគ្គបណ្ដុះបណ្ដាលនេះ នឹងត្រូវចាប់ផ្ដើមនៅថ្ងៃទី២២ខែមិថុនា អាទិត្យក្រោយនេះហើយ ដោយមិនមានការបង់ថវិកាឡើយ ហើយសិក្ខាកាមដែលបានចុះឈ្មោះសិក្សាក្នុងវគ្គទី១នេះ មានចំនួនប្រមាណពី៨០ទៅ៩០នាក់ជាជំហានដំបូង ។
លោកបន្តថា កម្មវិធីអភិវឌ្ឍន៍សមត្ថភាពអ្នកជំនាញទេសចរណ៍ឆ្លើយតបនឹងជំងឺឆ្លងកូវីដ ១៩ មានឯកតាសមត្ថភាពចម្បង៥សំខាន់ៗ ក្នុងនោះរួមមាន ១) ចំណេះដឹងអំពីវិធានការ ការពារជាមូលដ្ឋាន និងគោលការណ៍ ណែនាំស្ដីពីការបង្ការ និងត្រួតពិនិត្យការចម្លងរោគសម្រាប់ឧស្សាហកម្មទេសចរណ៍ ២) អនុវត្តការងារស្របតាមនីតិវិធីអនាម័យនៅកន្លែងការងារ ៣) អនុវត្តនីតិវិធីសុខភាពនិងសុវត្ថិភាពក្នុងអាជីព ៤) សម្អាតបរិវេណនិងឧបករណ៍ និងទី៥) ក្រមប្រតិបត្តិនិងវិធានសុវត្ថិភាព ទេសចរណ៍ សម្រាប់អាជីវកម្មទេសចរណ៍ ។នៅពេលរៀនចប់ សិក្ខាកាមក៏តម្រូវអោយធ្វើតេស្តសាកល្បងសមត្ថភាពសម្រាប់ការអនុវត្តការងារផ្ទាល់ផងដែរ ។
លោកបន្តថា គោលដៅសំខាន់ៗសម្រាប់ការបណ្ដុះបណ្ដាលធនធានមនុស្សជំនាញទេសចរណ៍មានមកពីសៀមរាប ភ្នំពេញ និងខេត្តព្រះសីហនុ ដែលជាគោលដៅសំខាន់ៗសម្រាប់ភ្ញៀវទេសចរបរទេស ។
យោងតាមរបាយការណ៍របស់ក្រសួងទេសចរណ៍កម្ពុជាបានបញ្ជាក់ថា ក្នុងរយៈពេល៤ខែកម្ពុជាទទួលបានភ្ញៀវទេសចរបរទេសចំនួនប្រមាណ១,១៦លាននាក់ប៉ុណ្ណោះ ហើយក្នុងខែមេសាកន្លងទៅនេះ ភ្ញៀវទេសចរបរទេសដែលមកដល់កម្ពុជាមានចំនួនតែ ៤.៨៤១នាក់ប៉ុណ្ណោះ ដែលមានការធ្លាក់ចុះខ្លាំងតែម្ដង ។ការធ្លាក់ចុះនៃភ្ញៀវទេសចរបរទេសមកកម្ពុជានេះនឹងអាចធ្វើអោយបាត់ចំណូលសម្រាប់ទ្រទ្រង់សេដ្ឋកិច្ចជាតិផងដែរ ជាក់ស្ដែងធនាគារពិភពលោកប្រចាំកកម្ពុជាបានព្យាករណ៍ សេដ្ឋកិច្ចកម្ពុជា អាចនឹងធ្លាក់ចុះដល់កម្រិតទាបបំផុត -២,៩ភាគរយ ខណៈកម្ពុជាព្យាករណ៍ថាអាចនឹងធ្លាក់ចុះ-១,៩ភាគរយ ក្នុងឆ្នាំ ២០២០ ៕
