ភ្នំពេញ ៖ បើទោះបីស្ថានភាពជំងឺកូវីដ ១៩ នៅក្នុងប្រទេសកម្ពុជានិងលើពិភពលោកបានគំរាមកំហែងដល់ការនាំចេញក្ដី តែការនាំចេញកសិផលរបស់កម្ពុជាទៅកាន់ទីផ្សារអន្តរជាតិនៅតែទទួលបានផលជាវិជ្ជមាន ជាក់ស្ដែងក្នុងរយៈពេល៤ខែ ដើមឆ្នាំ២០២០នេះ កម្ពុជាបាននាំចេញអង្ករទៅកាន់ទីផ្សារបរទេសបានប្រមាណ៣០ម៉ឺន២៥៧តោន ក្នុងនោះចិននៅតែជាទីផ្សារនាំមុខសម្រាប់អង្ករកម្ពុជា ។ នេះបើតាមរបាយការណ៍របស់ក្រសួងកម្មរុក្ខាប្រមាញ់ និងនេសាទ ។
តាមរបាយការណ៍ នេះបានបង្ហាញថាការនាំចេញរយៈពេល៤ខែដើមឆ្នាំ ២០២០នេះ ការនាំចេញអង្ករទៅកាន់ទីផ្សារអន្តរជាតិកំណើនប្រមាណ៤០,៤៦ភាគរយធៀបនឹងរយៈពេលដូចគ្នាកាលពីឆ្នាំមុន បើទោះបីជាឆ្នាំនេះ មានបញ្ហានឹងកូវីដ១៩ក្ដី ។
យោងតាមរបាយការណ៍ដដែលនេះ បានបង្ហាញផងដែរពីការនាំចេញកសិផលសរុបក្នុងរយៈពេល៤ខែនេះ ដោយមានបរិមាណនាំចេញប្រមាណ២លាន៧ពាន់តោន ក្នុងនោះដែរ រួមមានចំណិតដំឡូងមី ដំឡូងមីស្រស់ ម្សៅដំឡូងមី គ្រាប់ស្វាយចន្ទី គ្រាប់ពោត ចេក ផ្លែស្វាយ ដំណាប់ស្វាយ ម្រេចនិងបន្លែស្រសស់ជាដើម ៕
