(ប៉េកាំង)៖ យោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃព្រហស្បតិ៍ ទី២១ ខែធ្នូ ឆ្នាំ២០២៣ បញ្ជាក់ប្រាប់អោយដឹងថា រដ្ឋមន្ត្រីការបរទេសចិន លោក វ៉ាង យី បានព្រមានសម ភាគីហ្វីលីពីនរបស់លោកថាទីក្រុងម៉ានីល ត្រូវតែធ្វើសកម្មភាពប្រកបដោយការប្រុងប្រយ័ត្ន បន្ទាប់ ពីការប្រឈមមុខដាក់គ្នាជាបន្តបន្ទាប់ នៅក្នុងតំបន់ជម្លោះសមុទ្រចិនខាងត្បូង ខណៈទំនាក់ទំនង រវាងប្រទេសទាំង២ កំពុងស្ថិតនៅលើផ្លូវបំបែក។
តាមក្រសួងការបរទេសចិន ការព្រមានរបស់លោក វ៉ាង យី ធ្វើឡើងនៅក្នុងកិច្ចសន្ទនាតាមទូរស័ព្ទ ជាមួយរដ្ឋមន្ត្រីការបរទេសហ្វីលីពីន លោក Enrique Manalo កាលពីថ្ងៃទី២០ ខែធ្នូកន្លងទៅនេះ។ លោក វ៉ាង យី ក៏បានសង្កត់ធ្ងន់ដែរថាចិន និងហ្វីលីពីន កំពុងប្រឈមនឹងស្ថានការណ៍ដ៏លំបាកនៅ ក្នុងទំនាក់ទំនងរវាង ប្រទេសទាំង២ ដោយសារតែការផ្លាស់ប្ដូរគោលនយោបាយរបស់ទីក្រុង ម៉ានីល។
លោក វ៉ាង យី បានគូសបញ្ជាក់ដូច្នេះថា «ទំនាក់ទំនងរវាងចិន និងហ្វីលីពីន បច្ចុប្បន្នកំពុងប្រឈម មុខនឹងស្ថានការណ៍ដ៏លំបាក…ហើយដើមហេតុគឺមកពីហ្វីលីពីន បានផ្លាស់ប្ដូរគោលនយោបាយ និងការប្ដេជ្ញាចិត្តយូរអង្វែងមកហើយរបស់ខ្លួន ដោយបន្តបង្កហេតុ ព្រមទាំងបង្កភាពច្របូលច្របល់ នៅក្នុងដែនសមុទ្រ និងបំផ្លាញ សិទ្ធិស្របច្បាប់របស់ចិន»។ ប្រមុខការទូតចិនរូបនេះបន្ថែមថាទំនាក់ទំនងរវាងចិន និងហ្វីលីពីន កំពុងស្ថិតនៅលើផ្លូវបំបែក ពោលគឺត្រូវប្រឈមនឹងជម្រើសថាតើ ត្រូវដើរទៅទីណា ហើយហ្វីលីពីនត្រូវតែធ្វើសកម្មភាពដោយ ប្រុងប្រយ័ត្ន។
សូមបញ្ជាក់ថា ហ្វីលីពីន កាលពីថ្ងៃទី១១ ខែធ្នូ បានកោះហៅឯកអគ្គរដ្ឋទូតចិនប្រចាំទីក្រុងម៉ានីល ឱ្យចូលជួបដើម្បីសម្ដែងការតវ៉ា ក្រោយឆ្មាំសមុទ្រហ្វីលីពីន ចោទថានាវាឆ្មាំសមុទ្រចិនបានប្រើ កាណុងបាញ់ទឹក ដាក់ទូករបស់ខ្លួនដែលកំពុងធ្វើបេសកកម្មផ្គត់ផ្គង់សម្ភារៈចាំបាច់ ដល់អ្នកនេសាទ និងទាហានហ្វីលីពីន មួយក្រុមតូច ដែលកំពុងឈរជើងនៅតំបន់ថ្មប៉ប្រះទឹក Second Thomas Shoal។ នៅក្នុងឧប្បត្តិហេតុនោះ ក៏មានការបុកទង្គិចគ្នារវាងនាវាចិន និងទូកហ្វីលីពីន ផងដែរ ហើយទាំងប៉េកាំង និងម៉ានីល បានទម្លាក់កំហុសដាក់គ្នាទៅវិញទៅមក៕
