(ហាណូយ)៖ យោងតាមទីភ្នាក់ងារព័ត៌មាន Bloomberg បានអោយដឹងថា លោក Nguyen Phu Trong ប្រធានបក្សកុម្មុយនិស្តវៀតណាមបានឱ្យដឹងថា សេដ្ឋកិច្ចរបស់វៀតណាមអាចកើនឡើង ខ្ពស់ជាង ៥% នៅឆ្នាំនេះ ដោយសារប្រទេសដែលពឹងផ្អែកលើការនាំចេញមួយនេះ បន្តប្រឈមនឹង បញ្ហាសកលនានា។
ទីភ្នាក់ងារព័ត៌មាន Bloomberg បានរាយការណ៍ថា លោក Trong បានឱ្យដឹងនៅក្នុងសុន្ទរកថាមួយ ដែលថ្លែងនៅឯកិច្ចប្រជុំសន្និសីទបក្ស នៅទីក្រុងហាណូយ កាលពីថ្ងៃអាទិត្យថា៖ «មានការព្យាករថា នៅចុងឆ្នាំនេះ កំណើនផលិតផលក្នុងស្រុកសរុបរបស់វៀតណាមនឹងកើនឡើងដល់ប្រហែល ៥%។ ទោះបីជាទាបជាងគោលដៅ ៦,៥% ក៏ដោយ ក៏វានៅតែខ្ពស់គួរសមបើធៀបនឹងប្រទេសជាច្រើននៅ ក្នុងតំបន់ និងក្នុងពិភពលោក»។
ធនាគារអភិវឌ្ឍន៍អាស៊ី (ADB) បានកាត់បន្ថយការព្យាករកំណើនសេដ្ឋកិច្ចឆ្នាំ២០២៣ របស់វៀត ណាម ពី ៦,៥% មកនៅត្រឹម ៥,៨% ដោយសារ «ការធ្លាក់ចុះសេដ្ឋកិច្ចពិភពលោកអាចដាក់បន្ទុក ដល់ការនាំចេញរបស់វៀតណាម និងប៉ះពាល់ដល់ចក្ខុវិស័យកំណើនសេដ្ឋកិច្ច»។
លោក Trong បានមានប្រសាសន៍ថា «ស្ថានភាពពិភពលោកនិងក្នុងស្រុកមានការលំបាក និង បញ្ហាប្រឈមជាច្រើន ដែលស្មុគស្មាញជាងការព្យាករទៅទៀត»។
យោងតាមទិន្នន័យដែលចេញផ្សាយដោយការិយាល័យស្ថិតិទូទៅ របស់វៀតណាមកាលពីថ្ងៃទី២៩ ខែកញ្ញាបានឱ្យដឹងថា សេដ្ឋកិច្ចរបស់ប្រទេសវៀតណាមបានកើនឡើងពីរត្រីមាសជាប់គ្នា ដោយ សម្រេចបានកំណើន ៥,៣៣% នៅត្រីមាសទី៣ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទីភ្នាក់ងារព័ត៌មាន Bloomberg៕
